Tuakajayi mishindu yetu ya kuyisha: Utabalele muntu ne muoyo mujima

Mushinga: Yezu uvua wangata muntu yonso ne mushinga, umutabalela ne muoyo mujima ne dinanga dionso. Tshilejilu, musangu kampanda pavua Yezu mumone ne: mpudi matshi kansanga uvua umueneka bu udi ne bundu, wakaya nende kule ne bantu bua kumondapa. (Mâko 7:31-35) Wakaleja muvuaye wangata bayidi bende ne mushinga bualu uvua mumanye mikalu yabu, kayi ubalongesha malu mapitepite bungi. (Yone 16:12) Yezu udi utabalela muntu ne muntu ne muoyo mujima nansha mudiye mu diulu. (2 Tim. 4:17) Bu mutudi bayidi bende, tudi basue kumuidikija. (1 Pet. 2:21; 1 Yone 3:16, 18) Tuetu tuangata muntu ne mushinga ne tukeba mua kumanya nsombelu wende, malu adiye munange ne ntatu yende, tudi mua kupatula bipeta bimpe bia bungi mu mudimu wa buambi. Pamuapa udi mua kututeleja yeye mumone ne: mudimu wetu kawena anu wa kumuyisha ne kumushila bibejibeji patupu to, kadi tudi tumutabalela ne muoyo mujima.

Mushindu wa kuenza malu:

Wikale mudilongolole bimpe. Wikale mudilekelele, utua mimuemue, ne udienza bu mulunda wa muntu.
Wikale utangila ne ntema. Udiku umona bintu bidi bileja ne: udi ne bana anyi? Utu munange kuenza kabudimi kumbelu kuende anyi kumuna anyi? Utu mu tshitendelelu kampanda anyi? Udi pamuapa mua kuakaja mbuelelu webe bilondeshile nsombelu wende.
Umuebeje mmuenenu wende, umuteleje ne ntema yonso kuyi umukosa ku mêyi tshianana tshianana. Ushale mumutangile bua kuleja ne: udi umuteleja. Umuele tuasakidila bua mandamuna ende, umuele kalumbandi ne muoyo mujima pikalabi bikengela. Kukebi bua kuelangana nende mpata to.
Uyishe muntu bilondeshile nsombelu wende. Pikalabi bikengedibua, ushintulule mbuelelu webe bua kuakula bua malu adi mamutonde. Mbipepele bua kuenza nanku, bualu trakte, broshire ne bibejibeji bietu bidi ne biena-bualu bishilashilangane. Wewe muye kutangila muntu dîba dibi, bu mudi padiye ne mudimu wa bungi wa kuenza, witabe ne: udi mulue kumutangila dîba dibi; pashishe wipidije muyuki webe.

Tshitudi mua kuenza mu ngondo eu:

Mu ntendelelu wenu wa mu dîku anyi panudi mu buambi, nuenze manaya bua kuleja mushindu udi mumanyishi ne bua kushintulula muyuki bua kuandamuna muntu bilondeshile tshidiye wamba.
Mu bimue bisangilu bia mudimu wa buambi, muanetu udi ulombola bisangilu ebi udi mua kuakula bua mishindu itudi mua kutabalela bantu ne muoyo mujima anyi kuenzeja manaya.