Uyishe ne site wa jw.org: “Ulue mulunda wa Yehowa”

Mu tshitupa tshia “La Bible et vous” tshidi mu jw.org mudi tshiena-bualu tshia bana tshia ne: “Deviens l’ami de Jéhovah.” Mu tshiena-bualu etshi mudi misambu, filme ne malu makuabu. Ukadiku muyishe ne tshiena-bualu etshi anyi? Biwikala ulonga Bible ne muledi udi ne bana batshidi bapuekele, kuenaku mua kumulejatshi anyi? Wewe muenze nunku, bidi mua kumusaka bua kutangila bitupa bikuabu bia mu site wetu.

Pavua muanetu mukuabu wa balume wenda wabanya Ngumu ya Bukalenge No. 38, wakapesha mamu kampanda dibeji dia ngumu edi, diakamue mamu au kutuadija kudibala. Uvua ne bana batshivua bapuekele bavua bazukila trakte au. Muanetu au wakabumvuija malu avua mu trakte mu mêyi makese ne kubalejaye adrese wa site wetu uvua panyima pa trakte au. Bu muvua mamu au muleje dianyisha, muanetu eu wakangata telefone wende, kulejaye mamu au ne bana bende filme wa Caleb.

Muanetu kampanda wa bakaji wakambila muena mudimu wabu uvua ne bana bapuekele bua site wetu ne malu a bena mu dîku adimu. Muena mudimu wabu au pamue ne bana bende bakabuela mu jw.org. Wakalua kuambila muanetu wa bakaji au ne: bana bende bavua banyunguluka nzubu benda bimba musambu wa “Ambila bantu Dîyi dia Nzambi,” udi mu tshitupa tshia “Deviens l’ami de Jéhovah.”

Wibidilangane ne tshitupa tshia mu jw.org etshi ne wikale wambulamu filme, misambu ne malu makuabu bua kubiela mu telefone webe. Nanku newikale mudiakaje bua kuyisha ne tshitupa etshi tshia mu jw.org. Etshi ntshintu tshia mushinga mukole tshidi tshituambuluisha bua kuenzela Mukalenge mudimu bu bapika.​—Bien. 20:19.