Newidikije tshisumi tshia Yehowa ne tshia Yezu mu tshikondo tshia Tshivulukilu etshi anyi?

1. Bantemu ba Yehowa batu benza tshinyi tshikondo tshia Tshivulukilu?

¹ Yehowa utu ukumbaja malu adiye mulongolole ne tshisumi. Yeshaya 9:7 udi wakula bua amue mabenesha a Bukalenge wamba ne: “Lukunukunu [anyi tshisumi] lua Yehowa wa misumba neluenze bualu ebu.” Bia muomumue, pavua Muana wa Nzambi wenza mudimu wende pa buloba, uvua ne tshisumi tshia bungi bua ntendelelu mulelela. (Yone 2:13-17; 4:34) Tshidimu tshionso mu tshikondo tshia Tshivulukilu, bamanyishi ba bungi pa buloba bujima batu badienzeja mu mushindu wa pa buawu, bavudija mudimu wabu wa buambi bua kuidikija tshisumi tshia Yehowa ne tshia Yezu. Newikale umue wa kudibu anyi?

2. Tshisumi netshitusake bua kuenza tshinyi kutuadijila mu dia 7 ngondo 3?

² Kubikila bantu mu Tshivulukilu: Tshidimu etshi netutuadije kubikila bantu mu Tshivulukilu mu Disambombo dia 7 ngondo 3. Dilongolola mpindieu bua kuyisha ne tshisumi. Bena mu bisumbu bia bungi nebikale ne disanka dia kuyisha mu teritware wabu yonso. Tudienzeje bikole bua kupesha balongi betu ba Bible, bantu batutu tuya kukumbula, bena mudimu netu, balela betu, balongi betu dibeji dia dibikila anyi tuenze mudimu ne jw.org.

3. Mmunyi mutudi mua kuyisha bikole mu ngondo 3 ne 4?

³ Bumpanda-njila buambuluishi: Tshisumi netshitusake kabidi bua kuvudija mudimu wetu wa buambi. Kakuyi mpata, bana betu ba bungi nebalue bampanda-njila bambuluishi mu ngondo 3 ne 4, bualu kudi mushindu wa kusungula bua kuenza bumpanda-njila bua mêba 30. Mu ntendelelu wenu wa mu dîku, anyi paudi udilongela pa nkayebe, wele meji bikole bua mushindu uudi mua kulua mpanda-njila muambuluishi. (Nsu. 15:22) Tshisumi tshiebe bua mudimu eu tshidi mua kusaka bakuabu bua kuyishabu pabu ne tshisumi. Wewe muakaje programe webe bua kuyisha bikole, newidikije tshisumi tshia Yezu.​—Mâko 6:31-34.

4. Mmasanka kayi atuapeta tuetu bidikije tshisumi tshia Yehowa ne tshia Yezu?

⁴ Tuetu bidikije tshisumi tshia Yehowa ne Yezu mu tshikondo tshia Tshivulukilu netupete masanka a bungi. Netuyishe bantu ba bungi ba mu teritware wetu. Netuikale ne disanka bua mutudi benzele Yehowa ne bantu bakuabu mudimu. (Bien. 20:35) Bualu bua mushinga mukole budi ne: netusankishe Nzambi wetu wa tshisumi ne Muanende.