Longela malu kudi bamanyishi bakadi bapiluke bikole

Tutu tuangata bamanyishi bapiluke badi mu tshisumbu tshietu ne mushinga wa bungi. Bamue ba kudibu bakadi benzele Yehowa mudimu ne lulamatu luonso munkatshi mua bidimu bia bungi. Bakuabu badi mua kuikala bapete dimanya dia bungi mu mudimu wa buambi anu matuku abidi aa. Bamanyishi aba mbadimuenene mudi Yezu ulombola tshisumbu tshia bena Kristo mu matuku a ku nshikidilu aa padiye uvudija mudimu wa kuyisha ne kuvuija bantu bayidi. (Mat. 28:19, 20) Padibu bayisha, mbapete “bukole budi bupite bua pa tshibidilu” mu ntatu ne mu mateta. (2 Kol. 4:7) Tudi mua kulongela malu a bungi kudi bamanyishi bapiluke aba. Badi ne disanka dia bungi dia kulongesha bakuabu malu adibu balonge padi mpunga umueneka. (Mus. 71:18) Nanku tudi ne bua kukeba mpunga wa kulonga malu kudibu. Mmunyi mutudi mua kuenza nanku?

Mu buambi. Bua bamanyishi bapiabapia anyi badi kabayi banji kupiluka kuyishabu bimpe, bidi bikengela kubalongesha. Badi mua kulonga malu a bungi padibu bamona mudi bamanyishi bashindame bayisha. (Bala tshiena-bualu tshia ne: “Lama tshisumi tshiebe bua mudimu wa buambi” mu tshikoso 3 tshidi muinshi mua kamutu ka bualu ka ne: “Ambuluisha bantu bapiabapia” mu Tshibumba tshia Nsentedi tshia mu dia 15/2/2015.) Kuyisha ne bamanyishi aba nkukuambuluishe mushindu kayi?

Kuenaku mua kuambila mumanyishi kampanda utu uyisha bimpe menemene bua ayishe nebe anyi? Bikalaye kayi ne makanda a mubidi mimpe, imue misangu udi mua kuya ne balongi bebe ba Bible kuende bua kulongelaku. Panudi nujikija kulonga, webeje mumanyishi au malu adiye mumone audi mua kuakaja.

Usombe nabu: Ikala usomba ne bamanyishi bapiluke bua wewe kubamanya bimpe. Ubikile umue wa kudibu mu ntendelelu wenu wa mu dîku ne umuele nkonko. Bikalaye kayi ne bukole bua mubidi, kuenaku mua kulongolola bua kuenzela ntendelelu wenu wa mu dîku kuende anyi? Ukebe mua kumanya muvuaye mufike ku dimanya bulelela. Mmalu kayi mimpe avuaye mupete? Ndidiunda kayi didiye mumone muaba unudi basombele? Mmasanka kayi adiye mupete bua mudiye wenzela Yehowa mudimu?

Ikala ubumvuila ne kubalombi bua bakuambuluishe mu malu adibu kabayi mua kukokesha to. Anu bu tuetu bonso, bamanyishi bakadi bayishe bidimu bia bungi badi pabu ne bipedi bishilashilangane. (Lomo 12:6-8) Bamue bakadi bakulakaje, kabena mua kupitshisha netu dîba dia bungi to. Kadi tudi mua kulongela malu a bungi kudibu bualu bakadi bamone malu a bungi bu mudibu benzela Yehowa mudimu ne lulamatu.