“Mêyi aa ikale mu mutshima webe”

Baledi badi bu balami ba mikoko. Badi ne bua kulama bana babu bimpe, bualu badi mua kusesuka bipepele ne kubakuatabu mu buteyi. (Nsu. 27:23) Mmushindu kayi udi baledi mua kukumbaja mudimu eu? Badi ne bua kusomba ne bana babu mêba a bungi dituku dionso bua kuyukila nabu bua bafike ku dimanya tshidi mu lungenyi luabu ne mu muoyo wabu. (Nsu. 20:5) Baledi badi kabidi ne bua kuibaka ne bintu bidi kabiyi mua kuoshika ne kapia bua kukolesha ditabuja dia bana babu. (1 Kol. 3:10-15) Filme wa “Ces paroles devront être sur ton cœur” udi uleja mushinga wa kuenza ntendelelu wa mu dîku lumingu luonso. Tangilayi filme eu mu dîku, pashishe nuyukidilangane pa nkonko idi ilonda eyi.

1) Tshivua tshifikishe dîku dia Roman bua kubenga kudifila mu malu a mu nyuma ntshinyi? 2) Bua tshinyi muanetu Roman wakapangila bua kulombola ntendelelu wa mu dîku musangu wa kumpala? 3) Mmêyi kayi a mu Bible adi mua kuambuluisha baledi bua kukolesha bana bimpe? (Dut. 6:6, 7) 4) Ntshinyi tshidi mua kuambuluisha bena mu dîku bua kuyukidilangana bimpe? 5) Mmalu kayi adi bana bajinga kudi baledi babu? 6) Mmushindu kayi uvua muanetu Martin ne mukajende bambuluishe dîku dia Roman? (Nsu. 27:17) 7) Ntshinyi tshidi mfumu wa dîku mua kuenza kumpala kua dîba bua ntendelelu wa mu dîku ikale muimpe? 8) Ntshinyi tshivua muanetu Roman muenze bua kuakaja malu mu dîku diende? 9) Bua tshinyi bidi ne mushinga bua ntendelelu wa mu dîku ikale wenzeka lumingu luonso? (Ef. 6:4) 10) Ngimue ngenyi kayi mimpe itudi mua kulonda bua ntendelelu wa mu dîku? 11) Mmushindu kayi uvua muanetu Roman muambuluishe Matthias ne lutulu kadi ne muoyo umue bua kuanyishaye mushinga wa kuenza malu makane? (Yel. 17:9) 12) Mmunyi muvua Roman ne mukajende beleshe Rébecca meji bua kumuambuluisha bua kuangata dipangadika dimpe bua malanda ende ne Justin? (Mâko 12:30; 2 Tim. 2:22) 13) Mmunyi muvua Roman ne mukajende baleje ditabuja pavuabu bakaja malu mu nsombelu wabu? (Mat. 6:33) 14) Mmushindu kayi udi filme eu uleja mudibi bikengela bua bamfumu ba mêku kukumbaja majinga a mu nyuma a bena mu mêku abu? (1 Tim. 5:8) 15) Bu muudi mfumu wa dîku, udi muangate dipangadika kayi?

BUA BAMFUMU BA MÊKU: Bavua benze drama eu mu mpungilu wa rejon wa 2011. Tshikondo atshi, uvuaku mumone mushinga wa kuakaja amue malu mu ntendelelu wenu wa mu dîku anyi? Kadi mpindieu? Bikalaku malu makuabu a kuakaja, usambile Yehowa bua uakaje bua dîku diebe dipete masanka a kashidi.​—Ef. 5:15-17.