Nuidikije ditabuja diabu
1. Kutuadijila mu lumingu lua matuku 19/10/2015, netulonge tshinyi mu Dilonga dia Bible dia Tshisumbu?
1 Kutuadijila mu lumingu lua matuku 19/10/2015, netutuadije kulonga mukanda wa Nuidikije ditabuja diabu mu Dilonga dia Bible dia Tshisumbu. Mukanda eu udi wakula bua miyuki ya bantu balume ne bakaji 14 bavua ne ditabuja. Mbaufunde mu mushindu udi utuambuluisha bua kumona bantu abu mu lungenyi luetu, kubamona bu bantu balelela bavua batantamene ntatu pavuabu benzela Yehowa mudimu. Mukanda eu udi kabidi upatula malongesha mu miyuki idimu bua kutuambuluisha bua tutumikile malu au mu nsombelu wetu lelu.—Eb. 6:12.
2. Umvuija amue malu adi mu mukanda wa Nuidikije ditabuja diabu.
2 Malu adimu: Mu mukanda eu mudi mulongo wa bikondo ne tuarte bidi bituambuluisha bua kumanya dîba ne muaba uvua muntu kampanda udibu bakuila musombele. Bualu bukuabu, mu nshapita yonso mudi tshitupa tshia “Nkonko ya kuelela meji” tshidi tshituambuluisha bua kuelela meji pa miyuki ne kutumikila malongesha mimpe atudi balonge. Mu mukanda eu mudi bimfuanyi bia bungi bia mekala bidibu bumvuija ne benzele makebulula bimpe menemene bidi bituambuluisha bua kudifuanyikijila mu lungenyi malu adi mu miyuki ayi.
3. Ntshinyi tshitudi mua kuenza bua dilonga dia mukanda eu dituambuluishe?
3 Mudi dilonga mua kukuambuluisha: Mukanda wa Kasumbu Kaludiki udi ku ntuadijilu kua mukanda eu udi utukankamija ne mêyi aa: “Enza mudimu ne lungenyi luebe; udifile ku malu audi ubala ne muoyo webe wonso. Teta mua kumvua muvua bantu ba mu Bible aba badiumvua, kumona malu muvuabu baamona. Teta kumona tshivuabu benza pavua malu kampanda abafikila, ne muudi pebe mua kubidikija.” Bushuwa, kuenza mudimu ne lungenyi luetu kakuena kumvuija kuela meji bikole bua kubuka malu to, kadi kudi kumvuija kumona miyuki idi mifundisha ku nyuma wa Nzambi eyi mu lungenyi ne kuditeka pa muaba wa bantu badi mu tshialu. Kuenza nanku kudi kulomba dîba dia bungi ne kuelangana meji. (Neh. 8:8) Dilonga diodi dituadijila munkatshi mua nshapita, mulombodi neanji kuangata sekonde 30 anyi 60 bua kuambulula malu anuvua balonge musangu mushale. Binuikala kanuyi ku ndekelu kua nshapita bua kukonkonona katshiena-bualu ka “Nkonko ya kuelela meji,” udi mua kuela lukonko lumue anyi ibidi bua kuenza diambulula.
4. Bua tshinyi tudi ne bua kulonga mukanda wa Nuidikije ditabuja diabu?
4 Tudi mu bulongolodi budi bukeba kunyanga ditabuja dietu anyi kuditekesha mu mushindu kampanda anyi kansanga dituku dionso. Mukanda eu ne tshiena-bualu tshia mu Tshibumba tshia Nsentedi tshidibu bawangatshile tshitshidi tshitungunuka ne kupatuka ndipa dia kudi Yehowa didi dituambuluisha bua kukolesha ditabuja dietu. (Yak. 1:17) Tuikalayi tubuela mu Dilonga dia Bible dia Tshisumbu lumingu luonso ne tuandamunamu bikole padiku mushindu patudi tulonga mukanda eu bua dilonga edi dituambuluishe bikole.