Tulongeshayi ne broshire wa Lumu luimpe
1. Mmushindu kayi udibu benze broshire wa Lumu luimpe?
1 Anu bu mutuvua balonge mu Mudimu wetu wa Bukalenge wa ngondo wa 7, broshire wa Lumu luimpe lua kudi Nzambi ntshimue tshia ku biamu bietu binene bia mudimu bia kulongesha nabi. Ki mbatele mêyi a mvese idibu bafunde to, bua muntu utudi tuyukila nende anyishe bua kulongela malu buludiludi mu Bible nkayende. Mbenze mikanda yetu ya bungi ya kulonga nayi mu mushindu wa ne: muntu udi ubala udi mua kudilongela nkayende, kadi mbenze broshire eu mu mushindu wa ne: mulongeshi amumvuije. Bualu bukuabu, patudi tufila broshire eu, tudi ne bua kuleja muntu mutu dilonga dienzeka bua amone mua kuanyisha dilonga dia lumu luimpe ludi mu Bible.—Mat. 13:44.
2. Mmunyi mutudi mua kuyisha ne broshire wa Lumu luimpe patudi tupetangana ne muntu musangu wa kumpala?
2 Paudi upetangana ne muntu musangu wa kumpala: Udi mua kuamba ne: “Ndi mulue kukutangila bualu bantu ba bungi badi ne buôwa bua tshiabafikila kumpala eku. Udi wela meji ne: malu nealongolokaku anyi? [Lekela muntu andamune.] Bible udi ne lumu luimpe ludi mua kutupesha ditekemena. Mona imue nkonko idi Bible wandamuna.” Pesha muntu broshire, umulombe bua asungule lukonko kampanda ludi panyima pa broshire. Pashishe ku diambuluisha dia tshikoso tshia kumpala tshia dilongesha adi, umuleje mutu dilonga dienzeka. Mushindu mukuabu ngua kuela muntu lukonko ludi lumujula dijinga luangatshila mu dilongesha diudi musungule, ne pashishe umuleje mudi broshire eu mua kumuambuluisha bua kupeta diandamuna dia mu Bible. Bikalaku filme udi upetangana ne dilongesha adi mu jw.org, bamue bamanyishi batu bamuelela muntu patubu bayukila nende.
3. Umvuija mutudi mua kulombola dilonga ku diambuluisha dia broshire wa Lumu luimpe.
3 Mua kulombola dilonga: 1) Bala lukonko ludi ne nomba mufunda kumpala kualu ludi mu maleta mafikisha bua kuambuluisha muntu bua kuimanyina pa lungenyi lunene. 2) Bala tshikoso tshidi tshilonda. 3) Bala mvese idi mu maleta maladika, ne wele nkonko ne bukalanga bua kuambuluisha muntu bua amone mudi Bible wandamuna lukonko ludi mu maleta mafikisha. 4) Koku tshikoso tshikuabu muinshi mua lukonko, ambulula bualu 2 ne 3. Bikalaku filme udi upetangana ne lukonko ne kutu muanji kumuleja muntu, mulejayi panudi nuyukila malu kampanda. 5) Bua kujikija, ela muntu lukonko ludi mu maleta mafikisha bua kumanya bikalaye mumvue.
4. Tshiatuambuluisha bua kuyisha bimpe ne tshiamu tshia mudimu tshia mushinga mukole etshi ntshinyi?
4 Ibidilangana ne tshiamu tshimpe etshi. Yisha natshi misangu yonso idi mpunga umueka. Kumpala kua kulombola dilonga dionso, ku diambuluisha dia mvese idi mu dilongesha, elela mulongi meji ne ukebe mushindu uudi mua kumueleshisha meji. (Nsu. 15:28; Bien. 17:2, 3) Paudi wenda upiluka ne umanya mua kuenza nende mudimu, neumone ne: broshire eu ntshiamu tshia mudimu tshimpe tshia kulongesha natshi bantu bulelela.