Mua kulenga muoyo wa batudi tulongesha
1. Malu avua Yezu ulongesha avua menzele bavua bamuteleje tshinyi?
1 Yezu wakalenga muoyo wa bantu bavua bamuteleja. Musangu kampanda, mioyo ya bayidi bende ivua “itema” panyima pa yeye mumane kubumvuija bimpe Mifundu minsantu. (Luka 24:32) Bu mudibi ne: kutumikila Nzambi kudi kumbukila mu muoyo, mmunyi mutudi mua kulenga muoyo wa bantu batudi tulongesha bua tubasake bua kushintululabu nsombelu wabu?—Lomo 6:17.
2. Bua kulenga muoyo wa muntu, bukalanga ne busunguluji bidi ne mudimu kayi?
2 Ikala ne bukalanga ne busunguluji: Bua bantu ba bungi, kubambila patupu tshidi tshimpe ne tshidi tshibi kakuena kubasaka ku bualu nansha bumue to. Nansha kubipisha mene malongesha abu ne mvese ya bungi ya mu Bible kudi mua kubanyemesha. Bua kulenga muoyo wa muntu, tudi ne bua kuanji kumanya malu adi amusaka bua kuitaba malongesha kampanda ne kuenza malu adiye wenza au. Kuela muntu nkonko misungula ne bukalenga bua aleje mmuenenu wende nekumusake bua kuamba ngenyi misokome idi munda muende. (Nsu. 20:5) Pashishe tudi mua kusungula malu adi mu Dîyi dia Nzambi adi mua kulenga muoyo wende. Nanku tudi ne bua kuleja mutudi tutabalela muntu ne muoyo mujima ne kuikala ne lutulu. (Nsu. 25:15) Umanye ne: bantu batu bakola mu nyuma mu mishindu mishilangane. Shila nyuma wa Yehowa dîba dia yeye kushintulula meji ne bienzedi bia muntu.—Mâko 4:26-29.
3. Mmunyi mutudi mua kuambuluisha bantu batudi tulongesha bua bikale ne ngikadilu mimpe?
3 Tubambuluishayi bua bikale ne ngikadilu mimpe: Mvese idi yakula bua buimpe ne dinanga bia Yehowa idi mua kuambuluisha bantu batudi tulongesha bua bikale ne ngikadilu mimpe. Tudi mua kubala mvese bu mudi Musambu wa 139:1-4 anyi Luka 12:6, 7 bua kuleja mudi Nzambi ututabalela tuetu bonso bikole. Padi bantu batuadija kuanyisha ngasa wa Yehowa bikole menemene, dinanga diabu ne lulamatu luabu kudi Nzambi nebikole. (Lomo 5:6-8; 1 Yone 4:19) Bualu bukuabu, padibu bamanya ne: malu adibu benza adi asankisha Yehowa anyi amubungamija, bidi mua kubasaka bua kuenza malu adi amusankisha ne amutumbisha.—Mus. 78:40, 41; Nsu. 23:15.
4. Mmunyi mutudi mua kuleja ne: tudi tunemeka budikadidi budi nabu muntu bua kudisunguila malu patudi tuyisha?
4 Yehowa katu wenzeja muntu ku bukole bua atumikile mikenji yende to. Kadi udi ulomba bantu bua bamone buimpe bua kulonda mibelu yende. (Yesh. 48:17, 18) Tudi tuidikija Yehowa patudi tulongesha bantu mu mushindu wa kubambuluisha bua badiangatshile nkayabu dipangadika. Padi bantu badijadikila ne: mbimpe bashintulule nsombelu wabu, malu enzabu adi ashala muntatshi mule. (Lomo 12:2) Bidi kabidi bibasemeja pabuipi menemene ne Yehowa, Nzambi “udi uteta mitshima.”—Nsu. 17:3.