Tuakajayi mishindu yetu ya kuyisha: Mua kufila mukanda wa Bible ulongesha

Mushinga: Mukanda wa Bible ulongesha ntshiamu tshinene tshitutu tulongesha natshi. Kadi kumpala kua kulongesha muntu Bible ne mukanda eu, tudi ne bua kuanji kumupeshawu. Nanku tuetu bonso tudi ne bua kuenza muetu muonso bua kumanya mua kufila mukanda wa Bible ulongesha bimpe menemene. (Nsu 22:29) Kudi mishindu ya bungi ya kuwufila, ne bamanyishi badi ne bua kusungula udi mupepele kudibu.

Mushindu wa kuenza malu:

Ela muntu lukonko ludi lukoka ntema yende ludi mua kukuambuluisha bua kuya nende mu nshapita kampanda wa mukanda eu. Udi nansha mua kusungula lukonko lumue lua ku idi ku ntuadijilu kua nshapita yonso. Wewe mumane kuteleja diandamuna dia muntu, mubadile mvese udi umvuangana ne lukonko luuvua mumuele pashishe umuleje tshikoso kampanda tshia mu tshiena-bualu atshi, nudi mua kuyukila pamuapa nende mu minite mikese.
Mushindu mukuabu wa kufila mukanda eu ngua kuleja muntu mabeji a ntuadijilu bua kumujula dijinga ne pashishe kumuleja muaba udi diandamuna dia mu Bible. Tshilejilu, udi mua kuakula bua dikenga kampanda didi dikuate bantu matuku adi panshi aa, ne kumvuija muntu ne: bantu ba bungi batu bakeba mandamuna a nkonko idi mu dibeji 3 eyi. Peshi udi mua kuamba ne: ndi ngenda tangila bena mutumba nanyi bua kubambila bualu buimpe bua matuku atshilualua. Pashishe umuleje foto idi mu dibeji 4 ne 5 ne umuebeje ne: “Ku malu onso aa, mbuepi buudi musue bua bukumbane?” Mushindu mukuabu ngua kuamba ne: udi wenda utangila bantu bua minite mikese bua kubambuluisha bua bapete mandamuna a nkonko minene ya mu nsombelu. Pashishe uleje muntu nkonko idi kuinshi kua dibeji 6, ne umuebeje bua asungule lukonko ludi lutamba kumusankisha.
Lomba muntu bua utuadije kulonga nende Bible diakamue. Udi mua kuamba ne: “Tudi tuenda tuleja bantu mukanda eu udi ubambuluisha bua kulonga Bible. Ukadiku muumone anyi? [Lekela muntu andamune.] Wewe ne minite mikese ndi mua kukuleja mutudi mua kulonga nawu malu adi mu Bible webe.

Tshitudi mua kuenza mu ngondo eu:

Nuenze manaya mu ntendelelu wenu wa mu dîku.
Paudi mu buambi, wambile bamanyishi bakuabu tshiudi mulongolole bua kuamba. (Nsu. 27:17) Ushintulule mêyi ebe a mua kubanga muyuki bikalawu kaayi apatula bipeta bimpe.