Mua kuenza mudimu ne mêyi makuata a mikanda yetu
1. Pa kumbusha mikanda yetu idi pa mabeji, ntshinyi tshikuabu tshitudi natshi tshidi tshituambuluisha?
1 Bantu ba bungi batu basue kubuela mu jw.org bua kubala mêyi a bulelela mimpe ne majalame. (Muam. 12:10) Kadi ukadiku muenze mudimu ne mêyi makuata a mikanda yetu anyi? Adi atuambuluisha bua kuteleja malu a bungi adi mu site wetu. Mmunyi mudi mêyi adibu bakuate aa mua kutuambuluisha?
2. Mmunyi mutudi mua kuenza mudimu ne mêyi makuata a mikanda yetu bua kudilongela anyi bua kulonga mu dîku?
2 Bua didilongela dietu anyi dia dîku: Kuteleja mudibu babala Bible, bibejibeji bietu anyi mukanda wetu kampanda patudi tuenza luendu anyi tuenza midimu yetu ya buatshia buila kudi mua kutuambuluisha bua kukuata mudimu bimpe menemene ne dîba dietu. (Ef. 5:15, 16) Pa kumbusha mishindu itutu tuenza ntendelelu wa mu dîku, tudi mua kulondesha kabidi dibala dia mukanda wetu kampanda tuenda tulondesha petu dibala mu wetu mukanda. Kuteleja dibala patudi tudilongela kudi nangananga mua kutuambuluisha bituikala basue kuakaja mutudi tubala anyi basue kulonga muakulu kampanda.
3. Mêyi a mikanda yetu makuata adi mua kuambuluisha banganyi mu teritware wetu?
3 Mu buambi: Bantu ba mu teritware wetu badi bamona ne: kabena ne dîba dia kubala, badi mua kuanyisha bua kuteleja mêyi makuata a mikanda yetu. Peshi tudi mua kupetangana ne muntu udi wakula muakulu mukuabu udi umueneka ne: neanyishe bulelela yeye muteleje mukenji wetu wa Bukalenge “mu muakulu wa kuabu kumulela.” (Bien. 2:6-8) Miaba mikuabu, bantu batu ne tshilele tshia kuteleja malu adibu babalondela bikole. Tshilejilu, bilondeshile tshilele tshia bena mu Hmong, bantu batu balondela bana malu a kale mukana ne bana batu baakuata bimpe menemene. Bilondeshile bilele bia bungi bia mu Afrike, bantu batu basue kulonga malu ku diambuluisha dia malu a kale adibu babalondela.
4. Nnkonko kayi itudi mua kudiela yatusaka bua kuambuluisha bantu ba mu teritware wetu?
4 Mu teritware wenu, bidiku mua kuambuluisha muntu wewe mumuelele mêyi makuata mu muakulu wende anyi? Wewe mutumine muntu mêyi makuata a mukanda wetu kampanda mu mesage ku Enternete, kaenaku mua kumuambuluisha anyi? Udiku mua kuambula ku Enternete mêyi makuata a mukanda wetu kampanda, kuela mu ditadi ne kuapesha muntu udi muanyishe bulelela pamuapa pamue ne mukanda wawu anyi? Tuetu bapeshe muntu mu buambi mukanda mujima, anyi broshire, tshibejibeji peshi trakte, tudi mua kutshifunda mu luapolo luetu lua buambi. Mbakuate mêyi a mikanda yetu bua tuikale tuateleja patudi tudilongela ne kabidi bua kukuna ntete ya bulelela ya Bukalenge.—1 Kol. 3:6.