Londayi tshilejilu tshia baprofete: Habakuka
1. Bua tshinyi tudi mua kudiumvua petu anu muvua Habakuka mudiumvue?
1 Bu mutudi tutuilangana ne malu mabi a bungi mu bulongolodi ebu, tudi mua kudiumvua anu bu Habakuka wakebeja Yehowa ne: ‘Bua tshinyi udi ummueneshisha bienzedi bibi ne utangijija mêsu anyi ku dikengeshangana dia bantu?’ (Hab. 1:3; 2 Tim. 3:1, 13) Kuelangana meji pa mukenji uvua Habakuka uyisha ne bua tshilejilu tshiende tshia lulamatu nekutukoleshe bua kuindila dituku dia dilumbuluisha dia Yehowa.—2 Pet. 3:7.
2. Mmushindu kayi utudi mua kuleja lelu ne: tudi ne muoyo bua lulamatu?
2 Ikala ne muoyo bua lulamatu: Pamutu pa Habakuka kulekela nsombelu mubi uvuaku umutekesha, wakashala mutabale mu nyuma, kutungunukaye ne kuenza mudimu wende. (Hab. 2:1) Yehowa wakajadikila muprofete eu ne: dîyi diende nedikumbane mu tshikondo tshidiye mujadike, kabidi ne: ‘muntu muakane neikale ne muoyo bua lulamatu luende.’ (Hab. 2:2-4) Mmunyi mudi bualu ebu butangila bena Kristo badi ne muoyo matuku a ku nshikidilu aa? Tshidi ne mushinga wa bungi nkuikala batuishibue ne: nshikidilu nealue, kadi ki nkumanya dituku dialuaye to. Ditabuja didi ditusaka bua kushala batabale ne kuteka mudimu wetu wa kuyisha pa muaba wa kumpala.—Eb. 10:38, 39.
3. Bua tshinyi tudi ne bua kushala anu ne disanka mu mudimu wa Yehowa?
3 Usanke mu Yehowa: Nebatete ditabuja dietu pikala Gogo wa ku Magoga mua kubunda bantu ba Yehowa. (Yeh. 38:2, 10-12) Mvita itu ikebela bantu ntatu, nansha aba batu bafika ku ditshimuna. Bantu badi mua kupangila biakudia, kujimija bintu biabu ne nsombelu udi mua kubakolela. Netuenze tshinyi pikala ntatu mua kutufikila? Habakuka uvua mumanye ne: neapete ntatu, nanku uvua mudiakaje bua kushala anu ne disanka mu mudimu wa Yehowa. (Hab. 3:16-19) “Disanka dia Yehowa” nedituambuluishe bua kutantamena mateta alua kumpala eku.—Neh. 8:10; Eb. 12:2.
4. Ndisanka kayi ditudi nadi lelu ne dituapeta kumpala eku?
4 Bantu bikala Yehowa mua kusungila ku dituku diende dia dilumbuluisha nebatungunuke ne kulonga bua kumanya nsombelu udiye musue bua bikale nende. (Hab. 2:14) Bantu babishabu nebalonge pabu malu a Yehowa. Nansha lelu, tudi ne bua kubuelela pa mpunga yonso udi umueneka bua kuakula malu a Yehowa ne midimu yende ya kukema.—Mus. 34:1; 71:17.