Muana yeye mupatuke bua kutuandamuna

Muana yeye mupatuke bua kutuandamuna, tumuambile ne: tudi basue kuyukila ne baledi bende. Ebi bidi bileja ne: tudi tunemeka muaba udibu nawu. (Nsu 6:20) Muana yeye mutulombe bua kubuela, tubenge. Baledi bende bobu kabayiku, tupingane dîba dikuabu.

Pikala muana ukadi mutantamane, pamuapa ne bidimu bipite pa 16, mbimpe anu kumuleja ne: tudi basue kuyukila ne baledi bende. Bobu kabayiku, tudi mua kumuebeja bikala baledi bende batu bamuitabila bua kudisunguila malu a kubala. Biobi nanku, tudi mua kumupesha mukanda anyi kumuleja site wa jw.org.

Patudi tupinganyina muana uvua muleje dijinga, tudi ne bua kumulomba bua tumonangane ne baledi bende. Kuenza nunku nekutuambuluishe bua kubumvuija kendela ketu ne kubaleja mibelu mimpe ya kueyemena idi Bible ufila bua mêku. (Ms 119:86, 138) Kuleja baledi kanemu ne kubatua mushinga mmushindu muimpe wa kuyisha, ne kudi kutupetesha mpunga mikuabu ya kuyisha bena mu dîku lumu luimpe.​—1Pt 2:12.