TUIKALAYI NE NSOMBELU WA BUENA KRISTO
Tumikila mikenji ya bikadilu ya Yehowa
Yehowa mmuelele bantu mikenji ya bikadilu. Tshilejilu, udi wamba ne: padi mulume ne mukaji baselangana, badi ne bua kusomba pamue bua kashidi. (Mat 19:4-6, 9) Mmukandike masandi a mishindu yonso. (1Ko 6:9, 10) Mmuele too ne mikenji bua mvuadilu ne mushindu wa kudilengeja idi yenza bua bantu bende bashilangane ne bakuabu.—Dut 22:5; 1Tm 2:9, 10.
Mu bulongolodi ebu, bantu ba bungi mbabenge mikenji ya Yehowa ya bikadilu. (Lom 1:18-32) Badi bavuala, badilengeja, ne benza malu bilondeshile tshidi bantu ba bungi basue. Badi benze malu mabi manene kabayi bundu ne babipisha badi ne bikadilu bishilangane ne biabu.—1Pt 4:3, 4.
Bu mutudi Bantemu ba Yehowa, tudi ne bua kutumikila mikenji ya Nzambi ya bikadilu ne dikima dionso. (Lom 12:9) Mushindu kayi? Tudi ne bua kuleja tshidiye muanyishe ne budimu buonso. Kadi tudi kabidi ne bua kuikala ne bikadilu bimpe menemene mu nsombelu wetu. Tshilejilu, patudi tusungula tshilamba anyi mushindu wa kudilengeja, tudi ne bua kudikonka ne: ‘Disungula dindi muenze edi didi dileja mikenji ya Yehowa anyi ya bena panu? Mvuadilu wanyi ne kudilengeja kuanyi bidiku bileja mundi muena Kristo udi utshina Nzambi anyi?’ Peshi patudi tusungula ndongamu kampanda wa ku bisanji anyi filme wa kumona, tudi mua kudikonka ne: ‘Yehowa udiku mua kuanyisha ndongamu eu anyi? Mmikenji kayi ya bikadilu idi ndongamu eu ukankamija? Disungula dianyi dia mushindu wa kujikija lutetuku didiku ditekesha mikenji ya bikadilu intu inkuba anyi? (Mis 101:3) Didiku mua kulenduisha bena mu dîku peshi bantu bakuabu anyi?’—1Ko 10:31-33.
Bua tshinyi bidi ne mushinga bua kutumikila mikenji ya bikadilu ya Yehowa? Kristo Yezu ukadi pa kubutula bukua bisamba ne malu mabi onso. (Yhz 9:4-7) Anu bantu badi benza disua dia Nzambi ke bashala. (1Yn 2:15-17) Nunku tuimanyinayi mikenji ya Yehowa ya bikadilu bua bantu badi badimuena bikadilu bietu bimpe batumbishe Nzambi.—1Pt 2:11, 12.
Disungula dianyi dia mvuadilu ne didilengeja didi dileja tshinyi bua mikenji ya bikadilu indi ndonda?
NUMONE FILME WA IKALA MULUNDA WA YEHOWA: MULUME UMUE, MUKAJI UMUE, PASHISHE NUANDAMUNE NKONKO EYI:
Bua tshinyi mbimpe kutumikila mikenji ya Yehowa mu nsombelu wetu?
Bua tshinyi baledi badi ne bua kutuadija kulongesha bana babu mikenji ya bikadilu ya Yehowa ku buana buabu?
Mmunyi mudi bana nansha bakulumpe mua kuambuluisha bantu bua kupetelabu masanka ku buimpe bua Nzambi?