TUIKALAYI NE NSOMBELU WA BUENA KRISTO

Kuyisha ne kulongesha kudi ne mushinga bua kuvuija bantu bayidi

Yezu wakambila bayidi bende bua kuvuija bantu bayidi. (Mat 28:19) Bualu ebu budi bukongoloja kuyisha ne kulongesha. Yonso wa kutudi udi ne bua kudiebeja misangu yonso ne: ‘Mmushindu kayi undi mua kuakaja bibadi bia mushinga bia mudimu wa kuvuija bantu bayidi ebi?’

KUYISHA

Tuenze ne muetu muonso bua kukeba ‘bantu badi bakumbane’ pamutu pa kuindila bua balue kutudi. (Mat 10:11) Patudi tuyisha, tudiku tubabidila mpunga itudi nayi bua kuyukila ne bantu ‘batudi tupetangana nabu’ anyi? (Bz 17:17) Tshisumi tshivua natshi Paulo mu mudimu wa diyisha tshiakenza bua Ludia alue muyidi.—Bz 16:13-15.

Samuel upesha Ezekiel tshibejibeji; Salomon ne Marie bayisha Ezekiel ne Abigail — “Kuna mamiinu ebe mu dinda ne kulekedi tshianza tshiebe tshikisha too ne dilolo” (Mbi 11:6)

NUTANGILE FILME WA TUNGUNUKA NE KUYISHA “KUYI ULEKELA”: PADI MPUNGA UMUENEKA, NE KU NZUBU NE KU NZUBU, PASHISHE NUANDAMUNE NKONKO EYI:

Mu malu a Samuel a matuku onso, mmunyi muvuaye muleje ne: uvua ukeba ne muende muonso bua kukuna ntete ya bulelela?
Bua tshinyi tudi ne bua kunanukila mu mishindu yonso ya diyisha?
Mbanganyi baudi mua kuyisha mukenji wa Bukalenge paudi wenza midimu yebe ya matuku onso?

KULONGESHA

Bua kuvuija bantu bayidi, katuena anu ne bua kubashila bibejibeji patupu to. Bua kubambuluisha bua baye kumpala mu nyuma, tudi ne bua kubapinganyina ne kulonga nabu Bible. (1Ko 3:6-9) Kadi tudi mua kuenza tshinyi tuetu badienzeje ne muoyo mujima bua kulongesha muntu bulelela bua Bukalenge, kadi katuyi tupatula bipeta bimpe? (Mat 13:19-22) Tudi ne bua kutungunuka ne kukeba bantu badi mioyo yabu mikale bu “buloba buimpe.”—Mat 13:23; Bz 13:48.

Salomon ne Marie balongesha Ezekiel ne Abigail; Ezekiel ne Abigail bayisha muaba udi bantu ba bungi — “Meme mvua mukune, Apolo uvua mumiamine mâyi, kadi Nzambi uvua wenda ubikolesha” (1Ko 3:6)

NUTANGILE FILME WA TUNGUNUKA NE KUYISHA “KUYI ULEKELA”: MIABA IDI BANTU BA BUNGI, NE UBAVUIJE BAYIDI, PASHISHE NUANDAMUNE NKONKO EYI:

Mmushindu kayi uvua Salomon ne Marie bamiamine mâyi ku ntete ya bulelela ivua mu muoyo wa Ezekiel ne wa Abigail?
Tudi ne bua kuikala ne tshipatshila kayi patudi tuyisha ne mishindu yonso ya diyisha idiku, nansha patudi tuyisha miaba idi bantu ba bungi?
Bua tshinyi mbimpe kudifila bikole bua kulongesha bakuabu bulelela?