BIUMA BIA MU DÎYI DIA NZAMBI | LUKA 8-9
Ndonda: Bidi bikengela kuenza tshinyi?
Bua tshidime kuela mabula malulame, kabivua bimpe atangile bintu bivua bishale panyima to, bualu bivua mua kumubueja mu ditanaji. Bia muomumue, muena Kristo kena ne bua kulekela bintu bidiye mushiye mu ndongoluelu eu bimubueja mu ditanaji nansha.—Flp 3:13.
Patudi tupeta ntatu mbipepele bua tuetu kujinga nsombelu muimpe utuvua nende kale, pamuapa nsombelu utuvua nende kumpala kua kubuela mu bulelela. Tuetu tumujinga, misangu ya bungi tudi mua kuakula kuela kalele bua masanka atuvua nawu, ne kupepeja ntatu ituvua nayi. Ke tshiakenza bena Isalele pakumbukabu mu Ejipitu. (Nom 11:5, 6) Tuetu anu tuela meji bua malu aa, bidi mua kutusaka bua kupingana ku nsombelu utuvua nende kale. Nanku mbimpe tuikale tuela meji bua masanka atudi nawu lelu ne atuapeta mu Bukalenge bua Nzambi!—2Ko 4:16-18.