Enza bua didilongela diebe dikuambuluishe bikole

BUA TSHINYI?: Didilongela Dîyi dia Nzambi didi dituambuluisha bua “kujingulula bimpe menemene tshidi butshiama ne bule ne butumbuke ne buondoke” bua bulelela. (Ef 3:18) Didi kabidi dituambuluisha bua kushala katuyi ne tshia kutubandabu natshi mu ndongoluelu wa malu mubi eu, ne ‘kulamata ku dîyi dia muoyo bikole.’ (Flp 2:15, 16) Patudi tudilongela Dîyi dia Nzambi, tudi mua kudisunguila malu adi mua kutuambuluisha pa nkayetu. Ntshinyi tshitudi mua kuenza bua malu atudi tubala mu Bible ne tudilongelamu kutuambuluishawu bikole?

TSHIA KUENZA:

• Nansha Bible webe wa kudilongela nende muikale wa mabeji anyi wa mu tshiamu, ela tushonyi mu imue mvese ne fundamu amue malu

• Paudi ubala Dîyi dia Nzambi, diebeja nkonko eyi: ‘Nnganyi? Ntshinyi? Ndîba kayi? Mmuaba kayi? Bua tshinyi? Mushindu kayi?’

• Enza bua upete malu audi ukeba. Uakebe bilondeshile biena-bualu anyi mvese ya mu Bible, wangate bintu bia kuenza nabi makebulula bidiku bua kuakeba

• Elangana meji a malu audi ubala bua kujingulula muudi mua kuatumikila

• Tumikila malu audi ulonga dituku dionso.​—Luk 6:47, 48

ELA FILME WA ‘NULAMATE KU DÎYI DIA MUOYO BIKOLE’: PA KUDILONGELA BIMPE, PASHISHE NUANDAMUNE NKONKO EYI:

• Ntshinyi tshidi bamue bambe bua didilongela diabu?

• Mbimpe kutuadija didilongela dietu dionso ne disambila bua tshinyi?

• Tuetu basue kumvua mvese kampanda wa mu Bible bimpe, tudi ne bua kuenza tshinyi?

• Ntumanyinu kayi tutudi mua kuela mu Bible wetu wa kudilongela nende?

• Bua tshinyi kuelangana meji patudi tudilongela Dîyi dia Nzambi kudi ne mushinga wa bungi?

• Malu atudi tulonga, tudi ne bua kuenza nawu tshinyi?