TUIKALAYI NE NSOMBELU WA BUENA KRISTO

Yehowa mmunange bena mankenda

Baledi ba bungi batu balongesha bana babu tshia kuenza bua kuikala ne mankenda. Batu babambila ne: “Owa bianza, longolola mu nzubu, komba kumbelu, anyi ne: imansha butshiafu.” Kadi malu a mankenda adibu babalongesha aa adi afumina kudi Nzambi wetu wa tshijila. (Eks 30:18-20; Dut 23:14; 2Ko 7:1) Patudi tudilama ne mankenda tuetu ne bintu bietu, tudi tutumbisha Yehowa. (1Pt 1:14-16) Kadi bua nzubu yetu ne miaba itudi basombele? Tuetu bena Kristo tudi tudienzeja bua kulama miaba itudi ne mankenda; katuena bu bantu batu bimansha bintu bia bukoya mu njila to. (Mis 115:16; Bua 11:18) Nansha mu tumalu tukese bu mudi miaba itudi tuimansha mabeji, tubudimbu, bindundu bia mâyi anyi makopo a misangi, tudi tuleja mutudi tumona tshilumbu tshia mankenda. “Tudi tudianyishisha bu bena mudimu ba Nzambi” mu malu onso atudi tuenza.—2Ko 6:3, 4.

NUTANGILE FILME WA NZAMBI MMUNANGE BENA MANKENDA, PASHISHE NUANDAMUNE NKONKO IDI ILONDA EYI:

Mmunyi mutu bantu bakuabu badibingisha padibu kabayi balama bintu biabu ne mankenda?
Mmunyi muvua mikenji ya Mose ileja mutu Yehowa umona mankenda?
Mmunyi mutudi mua kutumbishisha Yehowa katuyi tuakula?

Tatu ubuela mu mashinyi a muanende mikale ne manyanu; Tatu uyukila ne muanende bua mikenji ya mankende ya Yehowa; bakuidi babidi ba mu Isalele wa kale bimane pabuipi ne dilongo dinene dia tshiamu tshia mitaku bua kuowa mâyi; bena mu kasumbu ka buambi bapatuka mu mashinyi a muana au akadiye musukule — Mmunyi mundi mua kuleja mmuenenu wa Yehowa wa mankenda mu malu andi ngenza?