TUIKALAYI NE NSOMBELU WA BUENA KRISTO

Ukadi mudilongolole bua dinyanguka dia malu a mpetu anyi?

Kabiena bitutonda bua kumona mudi malu adi enzeka lelu enda anyanga malu a mpetu pa buloba bujima to. Bua tshinyi? Bualu tudi mu matuku a ndekelu a matuku a ku nshikidilu ne Bible udi utudimuija bua kubenga kuteka ditekemena dietu ku “bubanji budi mua kujimina.” (1Tm 6:17; 2Tm 3:1) Ntshinyi tshidi tshilejilu tshia mukalenge Yehoshafata tshitulongesha bua didilongolola bua ntatu ya malu a mpetu?

Pavuabu babaluishe kudi bisamba bikuabu, Yehoshafata wakeyemena anu Yehowa. (2Ku 20:9-12) Wakenza kabidi malu kampanda masunguluke bua kulongolola tshisamba, kukoleshaye bimenga ne kutekaye bisumbu bia basalayi. (2Ku 17:1, 2, 12, 13) Mbimpe tueyemene Yehowa anu bu Yehoshafata ne tuikale badilongolola bua kutua nsombelu mikole tshiadi.

NTSHINYI TSHITUDI MUA KUENZA BUA KUDILONGOLOLA BUA NTATU YA MALU A MPETU?

Kolesha bulunda buebe ne Yehowa: Ikala usanka ne biudi nabi, ne eyemena bukole budi nabu Yehowa bua kukupesha biudi nabi dijinga dituku dionso. (Mat 6:26; 1Tm 6:8) Ikala mudisuike bua kubenga kushipa dîyi dinene dia mu Bible nansha dimue bua kudikumbajila majinga au. (Lom 2:21) Mona tshidi mua kukuambuluishe bua kuikala kupeta biakudia bia mu nyuma nansha padi nzebu anyi Enternete kabiyiku. Ikala ne mikanda ndambu ya pa mabeji iudi musungule, ne koku mushindu udi muakudianjila kuambula mikanda mu tshiamu tshiebe.

Longolola bintu bia ku mubidi: Kumpala kua ntatu ya malu a mpetu kumueneka, kepesha mabanza ne epuka disumba bintu bidi kabiyi ne mushinga. (Nsu 22:7) Padiku mushindu udi mua kulama ndambu wa biakudia ne bintu bikuabu bidi ne mushinga. Bamue bantu badi mua kudimisha bua kulama makuta.

NUTANGILE FILME WA UKADI MUDILONGOLOLE BUA BIPUPU ANYI? NE PASHISHE NUANDAMUNE NKONKO EYI:

Tshimfuanyi tshia mu filme wa “Ukadi mudilongolole bua bipupu anyi?” Tshimfuanyi tshia Bible, tshibuta tshia kunyema natshi ne telefone, ne bena mu mudimu wa luibaku.

Ntshinyi tshidi yonso wa kutudi mua kuenza bua kudilongolola bua bipupu?

Diandamuna diebe

Tshimfuanyi tshia mu filme wa “Ukadi mudilongolole bua bipupu anyi?” Bana betu ba balume ba mu mudimu wa luibaku bambuluisha bana babu mu tshikondo tshia tshipupu, babakajila nzubu ne batulula bintu mu mashinyi.

Mmunyi mutudi mua kudilongolola bua kuambuluisha bakuabu?

Diandamuna diebe