Mmushale anu ne dikima ne umona malu mu mushindu muimpe nansha mudiye ne disama dikole

Virginia (udi Ntemu wa Yehowa) udi ukenga ne disama dikole. Mmutekete mubidi. Kadi udi mua kumona anyi kumvua, kutabala anyi kubuita ku mêsu, peshi kunyungisha mutu kakese. Kena mua kuakula anyi kudia to. Pabi tshikondo kampanda uvua ne makanda ne mubidi tumatuma. Kadi dituku dikuabu mu dinda mu 1997, mubidi wakamutakanyika bikole, mutu kutuadija kumusamina mu dikoshi kawuyi utalala. Bayende wakaya nende mu lupitadi, ne dilolo dia dituku adi wakashalamu mufue tshipuka. Wakafululuka panyima pa mbingu ibidi, kudisanganaye mu lupitadi. Wakashalamu muteketangane kayi unyunga, upuyakena ku biamu. Munkatshi mua matuku makese, katshivua uvuluka kabidi malu to, nansha yeye muine katshivua uvuluka tshivuaye to.

Virginia wakumvuija tshivua tshienzeke wamba ne: “Ku kakese ku kakese lungenyi kutuadija kumvuila. Ngakasambila ne muoyo mujima. Tshivua musue kufua bua kushiya muananyi wa balume muana wa nshiya to. Mvua nditatshisha bua kuvuluka mvese ya bungi bua kukolesha dikima dianyi.

“Ndekelu wa bionso badoktere bakampatula muaba utu bena masama atu alomba dîsu dikole. Bakampatula panyima pa ngondo 6, tuetu bamane kutambakana mu mpitadi mishilashilangane. Ngakashala muteketangane mubidi mujima, bivua bilomba bikale bangenzela malu onso. Biakantonda bikole be! Tshivua kabidi ndimona ne mushinga kudi bakuabu anyi kudi Yehowa to. Biakansamisha mutu bua mumvua tshiyi kabidi ne tshia kuenzela muananyi to.

“Ngakuatuadija kubala miyuki ya bana betu bavua ne disama bu dianyi, ne bivua binkemeshe bua bivuabu bafike ku dienzela Yehowa. Bia kangambuluisha bua kuikala ne mmuenenu muimpe wa malu bua kuenza anu bimvua mua kukokesha bua kuenza. Kumpala kua disama kunkuata, tshivua ne dîba dia bungi dia kuyisha, kudilongela ne kusambila to. Kadi mpindieu ndi ne dîba dia bungi bua kuenza malu aa. Pamutu pa meme kuteketa mu mikolo, ngakadifila bikole kudi Yehowa.

“Ngakalonga ordinatere. Ndi ngenza mudimu ne programe wa difunda utu munteketele. Bidi bintshiokesha, kadi ordinatere utu ungambuluisha bua kulonga Bible ne kuambila bantu bakuabu malu andi ngitabuja, aba mbatumina mikanda bakuabu mbamfundila ku Enternete. Ndi ngenza mudimu ne tablo udi ne maleta bua kuyukila ne bantu badi nanyi pabuipi. Muntu uvua ku luseke luanyi uvua umfunkuina dileta ku dileta. Yeye musungule dia tshianana, mvua ntonona mêsu, kadi yeye mutue pa dileta dimpe, diakamue mvua mbuita ku mêsu. Tuvua tuenza nanku misangu ne misangu bua kulamakaja miaku ne kupatula biambilu. Bamue ba ku bana betu ba bakaji bavua bashala nanyi mutantshi mule, bavua badianjila kumanya ntshivua musue kuamba. Imue misangu pavuabu batupakana, tuvua tuditua mu tuseku.

“Ntu ngumvua disanka pantu ndifila ku malu a mu tshisumbu. Mvua ndonda bisangilu dîba dionso ku biamu bia bamonangane. Mvua mfunda mandamuna, ne muntu mukuabu uambadila padiku bitupa bia nkonko ne mandamuna. Mvua ndisangisha kabidi ne kasumbu ka bana betu bua kutangila ndongamu wa ku TV wa JW.a

“Mvua ne disama dikole dia mu buongo kukadi bidimu 23 mpindieu. Matuku makuabu bivua bimbungamija. Kadi disambila, bena Kristo nanyi ne mudimu undi ngenzela Yehowa ke bidi bingambuluisha bua kukankamana. Ku diambuluisha dia bana betu mu tshisumbu, ndi muenze bumpanda-njila buambuluishi bidimu bipite pa 6 bijima. Mvua ngenza muanyi muonso bua kuikala tshilejilu tshimpe kudi Alessandro, muananyi wa balume ukadi musele ne udi mpindieu mukulu. Yeye ne mukajende mbampanda-njila ba pa tshibidilu.

“Ntu ngela meji a malu angikale ngenza mu Mparadizu. Bualu bua kumpala bundi musue kuenza nkuakula bua Yehowa ne dîyi dianyi nkayanyi. Ndi musue kuendakana kabidi ku kala kua mâyi bua kubandila miaba mimpe. Ne bu mundi mudia anu bintu bia mâyi mâyi bidimu bia bungi bishale ebi, ne mbidiila mu nshinga, tshia kuindila bua kupola tshimuma tshia pome ne kutshidia to. Kabidi bu mundi mukolele mu ditunga dia Italie, ndi mutekemene ne muoyo kuulu kuulu bua kulamba ne kudia biakudia bia tshiena kuetu, ne piza kabidi.

“‘Ditekemena dia lupandu,’ ndingambuluishe bua kukuba meji anyi. (1 Tesalonike 5:8) Kudimona nkadi mu bulongolodi bupiabupia, kudi kumpetesha disanka nansha mundi ne masama, andi mutekemene ne: mu matuku makese emu neajike. Ndi nzuka bua kuikala ne ‘muoyo wa bushuwa,’ udi Yehowa mutulaye ku diambuluisha dia Bukalenge buende.”​—1 Timote 6:19; Matayi 6:9, 10.