Bantemu ba Yehowa batu babenga bisalu anyi?
Tòo. Bantemu ba Yehowa kabatu babenga bisalu to. Tudi tumona diangata bisalu bu dipangadika didi muena Kristo yonso ne bua kudiangatshila. Bantemu ba Yehowa ba bungi mbitabe bua kudituisha bisalu.
Tutu tukeba ngondapilu muimpe ne tutu tumona dilubuluka dia mamanya a malu a luondapu ne mushinga bua mudidi dikepeshisha njiwu ya kupeta masama makole. Tudi ne dianyisha dia bungi bua mudimu mukole udi baminganga benza, nangananga mu tshikondo tshia lutatu.
Bantemu ba Yehowa batu bayukila ne bibambalu bia bukole bua mubidi bia mbulamatadi. Tshilejilu, katshia tshipupu tshia Korona tshiatua ntanga tshibua, Bantemu ba Yehowa mbatungunuke ne kupatula mavuluija mu miakulu nkama ne nkama mu site wa jw.org; badi bakankamijamu bantu bua kutumikila mikenji ya mua kudikuba. Mikenji eyi nya kuikala ntanta ne bakuabu, kubenga kudisanga ba bungi pamue, kuikala kule ne bakuabu, kuowa mâyi ku bianza, ne kuvuala maske anyi kuenza malu makuabu a mua kudikuba adi bakokeshi ba mbulamatadi batume dîyi bua kualonda.—Lomo 13:1, 2.
Munkatshi mua bidimu bia bungi, mikanda ya Bantemu ba Yehowa mmiele kashonyi pa mêyi manene aa:
Muntu ne muntu udi ne bua kudisunguila mushindu wa kuondopibua.—Galatiya 6:5.
“[Tshibejibeji etshi] katshiena tshiamba bua kulonda mushindu kampanda wa luondapu pa muaba wa mukuabu to, ne katshiena tshifila mibelu ya luondapu to. Tshipatshila tshiatshi ntshia kuleja mubadi bulelela bua bualu ne kumulekela udiangatshila nkayende mapangadika.”—Tabulukayi!, 8/2/1987 mu Mfualansa.
“Kumanya ni wewe ne bana bebe nudi ne bua kuangata bisalu mbualu budi bukutangila anu wewe nkayebe.”—Tabulukayi!, 8/8/1993 mu Mfualansa.
Tutu tudiondopesha bualu tudi tuangata muoyo ne mushinga wa bungi.—Bienzedi 17:28.
“Bantemu batu baya kudi bamanyi bapiluke ba malu a bukole bua mubidi bua kukeba luondapu padibu basama. Mbanange muoyo ne mbasue kuenza tshionso tshidi tshikumbana ne tshipetangana ne Mifundu bua kuwulama.”—Tshibumba tshia Nsentedi, 1/10/1975 mu Mfualansa.
“Bantemu ba Yehowa batu bitaba luondapu ne diambuluisha dia baminganga. Mbasue kulama makanda abu a mubidi ne kushala ne muoyo matuku a bungi. Bualu bukuabu, anu bu Luka muena Kristo wa mu bidimu lukama bia kumpala, bamue Bantemu ba Yehowa mbaminganga. . . . Bushuwa Bantemu ba Yehowa batu baleja dianyisha bua mudimu mukole udi baminganga benza. Badi kabidi baleja dianyisha bua mudi baminganga aba buondopa mabedi abu.”—Tshibumba tshia Nsentedi, 1/2/2011 mu Mfualansa.