Mukenji wa mu Bible

Bia pa mabeji

Yehowa Nzambi udi ne bukenji bua kukokesha. Mushindu wende wa kukokesha mmuimpe mutambe. Malu adiye mulongolole bua buloba ne bua bantu neakumbane.

Adama ne Eva mu budimi bua Edene pabuipi ne nyoka

Panyima pa 4026 K.B.B.

“Nyoka” udi wela bukenji bua Yehowa bua kukokesha ne mushindu wende wa kukokesha mpata. Yehowa udi ulaya bua kujula ‘muana’ anyi “dimiinu” wikala ndekelu wa bionso ne bua kuzaza nyoka, Satana. (Genese 3:1-5, 15, dim.) Kadi, Yehowa mmushiye tshikondo bua bantu badilombole ku buenzeji bua nyoka.

Mu 1943 K.B.B.

Yehowa udi wambila Abalahama ne: ‘muana’ uvuabu balaye neikale umue wa mu ndelanganyi yende.—Genese 22:18.

Panyima pa 1070 K.B.B.

Yehowa udi ujadikila Mukalenge Davidi ne pashishe muanende Solomo ne: ‘muana’ udibu balaye udi ne bua kupatukila mu mulongo wa ndelanganyi yabu.—2 Samuele 7:12, 16; 1 Bakalenge 9:3-5; Yeshaya 9:6, 7.

Mu 29 B.B.

Yehowa udi uleja mudi Yezu muikale ‘muana’ uvuabu balaye udi Mupianyi wa nkuasa wa Davidi.—Galatiya 3:16; Luka 1:31-33; 3:21, 22.

Mu 33 B.B.

Nyoka, Satana, udi usuma ‘muana’ uvuabu balaye bua tshitupa tshîpi padiye ushipesha Yezu. Yehowa udi ubisha Yezu bua kupetaye muoyo mu diulu ne udi witaba mushinga wa muoyo mupuangane wa Yezu, nunku ufila tshishimikidi bua kubuikila mpekatu ne kupesha ndelanganyi ya Adama muoyo wa tshiendelele.—Genese 3:15; Bienzedi 2:32-36; 1 Kolinto 15:21, 22.

Nyoka, Satana muimansha pa buloba anu mukavuabu bambe mu Buakabuluibua

Bu mu 1914 B.B.

Yezu udi wimansha nyoka, Satana, pa buloba bua tshitupa tshîpi, kayi mua kuya muaba mukuabu.—Buakabuluibua 12:7-9, 12.

Yezu mu nkuasa wa bukalenge mu diulu ukokesha buloba anu mukavuabu bambe mu Buakabuluibua

Matuku atshilualua

Yezu udi wela Satana mu buloko bua bidimu tshinunu, pashishe udi umubutula anyi uzaza mutu wende. Dijinga dia Yehowa dia ku ntuadijilu bua buloba ne bua bantu didi dikumbana, udi umbusha tshipendu ku dîna diende, ne ubingisha mushindu wende wa kukokesha.—Buakabuluibua 20:1-3, 10; 21:3, 4.