Tshivua mumpele mupatukile mu tshitendelelu tshivuaye

Tulondelaku muudi mukole.

Ndi mulela mu 1943 mu Italie. Meme ne bana betu ba balume ne ba bakaji tudi bakolele mu kamusoko kampanda kakese muvua tatu tshidime ne muenji wa mabaya. Baledi betu bavua basue bua tulue bena Katolike ba nshinshinshi.

Bua tshinyi uvua musue kulua mumpele?

Pamvua muana, mvua musue kuteleja muvua bamumpele balongesha. Mushindu wabu wa kuakula ne wa kulombola masambila uvua unsankisha bikole. Nunku ngakangata dipangadika dia kulua mumpele. Pamvua ne bidimu 13, mama wakaya kunshiya mu enterna wa mu tshilongelu tshivua tshilongolola bana ba balume bua matuku abu atshilualua, bua kulonga tulasa tubandile tua bamumpele.

Nuvua nulonga Bible mu tshilongelu atshi anyi?

Ku misangu. Pamvua ne bidimu 15, mulongeshi wetu mukuabu wakampesha mukanda wa Evanjeliyo inayi idi ne miyuki ya nsombelu wa Yezu ne mudimu wende, meme kubala mukanda au misangu ya bungi. Pangakakumbaja bidimu 18, ngakaya ku Lomo bua kulonga mu tulasa tubandile tua bapape tudi bapape nkayabu balombola. Ngakalonga Latin, tshiena Greke, malu a kale, malu a nkindi, a dimanya bantu ne a Nzambi. Nansha mutuvua tuamba ku muoyo mvese ya mu Bible ne batubadilaye mu miyuki ivuabu benza mu Dia lumingu, katuvua mu bulelela balonge Bible to.

Pauvua mulue mulombodi wa tshilongelu, uvua ulongesha anyi?

Mudimu wanyi munene uvua wa kulombola midimu. Nansha nanku, mvuaku mulongeshe mikenji ya tshipangu tshia Vatican II.

Bua tshinyi wakatuadija kuelakana bua bidi bitangila tshitendelelu?

Kudi malu asatu avua mampeteshe dielakana. Tshitendelelu tshivua tshidibuinke mu malu a tshididi. Bavua babuikila mêsu pa buenzavi bua badiambike ne bua bena kuitabuja. Kabidi, amue malongesha a tshitendelelu tshia Katolike avua amueneka kaayi malelela to. Tshilejilu, mmunyi mudi Nzambi wa dinanga mua kunyoka bantu bua kashidi panyima pa lufu luabu? Tshilejilu tshikuabu, mu bulelela Nzambi mmusuaku bua tuikale tuambulula masambila makuata ku muoyo ne lunzadi mu tshianza anyi?a

Wakenza tshinyi?

Ngakadila bikole ndomba Nzambi buludiki mu disambila. Ngakasumba Bible wa bena Katolike wa Jérusalem, uvuabu bafuma ku dipatula mu tshiena Italie, meme kutuadija kumubala. Pashishe mu Dia lumingu kampanda mu dinda pamvua nkudika muzabi wanyi kuulu panyima pa misa, bantu balume babidi bakalua ku seminere. Kudimanyishabu kundi ne: bavua Bantemu ba Yehowa. Tuakayukila nabu malu a mu Bible ne bua tshidiye wamba bua bimanyinu bia ntendelelu mulelela mutantshi wa dîba dijima ne pa mutu.

Wakamona bantu abu mushindu kayi?

Ngakanyisha muvuabu bakula ne dishindika ne muvuabu batela bipepele mvese ya mu Bible wa bena Katolike. Pashishe Ntemu mukuabu diende Mario wakatuadija kulua kuntangila. Uvua ne lutulu ne munemeki wa tshipungidi, mu Disambombo dionso nansha mvula uloka anyi munya mukenuke, mvua mmumvua udidisha ngonga wa ku tshibueledi tshia seminere pa dîba 9.

Badiambike bakuabu bavua bamba tshinyi pavuabu balua kukutangila?

Mvua mbabikila pabu bua balue kuteleja bituvua tuyukila, kadi nansha umue wa kudibu kakasuminyina bua kulonga Bible to. Nansha nanku kuvua kunsankisha meme bikole. Ngakalonga malu mimpe bu mudi: bua tshinyi Nzambi mmuanji kulekela malu mabi ne makenga, bualu buvua buntatshisha bikole mu lungenyi.

Bantu bavua ku mutu kuebe bavuaku batete kukukandika bua kulonga Bible anyi?

Mu 1975, ngakaya ku Lomo njila ya bungi bua kubumvuija mmuenenu wanyi. Bantu bavua ku mutu bakateta kuenza bua nshintulule ngelelu wanyi wa meji, kadi nansha umue wa kudibu kavua umbadisha Bible to. Ndekelu wa bionso mu dia 9 ngondo wa 1 mu 1976, ngakatuma mukanda ku Lomo bua kuleja ne: tshitshivua kabidi muena Katolike to. Matuku abidi pashishe, ngakumbuka mu seminere, meme kuangata kawulu bua kuya kubuela mu bisangilu bia Bantemu ba Yehowa bua musangu wa kumpala ne tshivua mpuilu muvua bantu ba mu bisumbu bia bungi badisangishe. Malu onso avua mashilangane bikole ne atuvua tuenza kumpala! Ntemu yonso uvua ne wende Bible ne uvua ulondesha pavua bangamba-malu bumvuija biena-bualu bishilashilangane.

Bena mu dîku dienu bakamba tshinyi?

Ba bungi ba kudibu bakanduisha bikole menemene. Kadi ngakalua kumvua ne: umue wa ku bana betu uvua ulonga Bible mu Lombardie, tshimenga tshia ku nord kua Italie. Ngakaya kumumona, Bantemu ba kuntu aku kungambuluishabu bua kupeta mudimu ne muaba wa kusomba. Ku ndekelu kua tshidimu atshi, meme kubatijibua kulua Ntemu wa Yehowa.

Udiku unyingalala anyi?

Nansha kakese! Mpindieu ndi ndiumvua pabuipi ne Nzambi bualu malu onso andi mumanye mmangatshila mu Bible, kadi ki mmu malu a nkindi anyi mu bilele bia ntendelelu to. Ndi mene mua kulongesha bantu bakuabu ne dishindika ne muoyo mujima.