Kanyinganyinga ntshinyi?

Kanyinganyinga mmushindu uudi umvua paudi ne lutatu lukole. Buongo buebe budi butuma tuntu tua bungi tudibu babikila ne: hormone mu mubidi mujima. Dituma adi didi mua kuvudija bungi bua misangu idi muoyo webe ututa, dishintulula luendu luebe lua mashi, dienza bua utuadije kupuyakana lukasa lukasa ne disamisha mifungu yebe bikole. Kumpala kua wewe kumanya tshidi tshienzeka menemene, mubidi webe newikale pabuipi bua kuenza bualu kampanda. Padi tshikondo atshi tshijika, mubidi webe udi wenza “tshionso tshidiwu mua kuenza”, ne upingana mutuwu konso eku.

KANYINGANYINGA KIMPE NE KABI

Kanyinganyinga mmushindu uudi umvua udi ukuambuluisha bua kutantamena ntatu anyi nsombelu mikole. Bitu bituadijila mu buongo. Kanyinganyinga kimpe kadi kenza bua wenze malu ne lukasa. Kadi kakuambuluisha kabidi bua kukumbaja bipatshila biebe anyi kuenza mudimu bimpe, pamuapa mu mateta a mu kalasa, padibu bakuela nkonko bua kukuangata ku mudimu, peshi mu malu a manaya.

Kanyinganyinga kakole ka munanunanu koku kadi mua kukuenzela bibi. Misangu yonso padi mubidi webe pabuipi bua “kuenza bualu kampanda,” udi mua kutuadija kusama anyi kuenza malu bu mudi: kufiika tshiji anyi kubungama, peshi lungenyi kalutshiyi kabidi kaba kamue anyi ukadi upampakana. Mushindu uudi wenzela bakuabu malu udi mua kushintuluka. Kanyinganyinga ka munanunanu kadi kabidi mua kukufikisha ku dinua bintu bidi bikuata ne ku bibidilu bikuabu bibi. Kadi mene mua kukufikisha ku disama dia kabungama, ku ditshioka bikole, peshi ku diela meji a kudishipa.

Nansha mudi bantu bonso kabayi mua kumvua kanyinganyinga mu mushindu wa muomumue, kadi mua kufikisha ku masama a bungi. Kadi mua kutatshisha mubidi mujima.