Nshapita 1
Udi mua kupeta diakalenga bua matuku atshilualua!
1, 2. Ntshinyi tshidi Mufuki webe musue bua upete?
DIKUUPUKILA dia musangelu kudi muntu uudi munange. Tuseku tua disanka munkatshi mua didia dimpe ne balunda ba pa muoyo. Milowo ya kutangila mudi bana bebe banaya ne disangala. Bikondo bia nunku mbikondo bia disanka mu nsombelu. Kadi bua bantu bavule nsombelu udi umueneka wa ntatu mikole milondangane. Pikalabi nunku buebe wewe, ikala ne dieyemena.
2 Disua dia Nzambi ndia se: wikale ne diakalenga dia kashidi mu nsombelu mutambe bulengele mu muaba wa mpatshi. Etshi ki ntshilota patupu, bualu Nzambi udi bushuwa ukupesha nsapi wa diakalenga bua matuku atshilualua. Nsapi au ndimanya.
3. Ndimanya kayi didi nsapi wa diakalenga, ne bua tshinyi tudi mua kuikala bajadike se: Nzambi udi mua kutupetesha dimanya adi?
3 Tudi tuakula bua dimanya dia mushindu wa pa buawu didi ditambe meji a bantu kule. ‘Ndimanya mene dia Nzambi.’ (Nsumuinu 2:5, NW) Kukadi bidimu bitue ku 2 000, mufundi wa Bible kampanda wakamba ne: “Nzubu yonso mmuibaka kudi kampanda, kadi udi muibake bintu bionso n’Nzambi.” (Ebelu 3:4, NW) Elaku meji pa dimanya didi Mufuki wa bintu bionso ne bua kuikala nadi! Bible udi wamba ne: Nzambi udi ubala ne ubikila mitoto yonso ku mêna ayi. Ndungenyi kayipu lupapuishi, bualu kudi nkama ya miliyare ya mitoto mu galaksi wetu nkayamu, ne bashikuluji ba malu a mabulunge badi bamba ne: kudi galaksi mikuabu mitue ku miliyare lukama! (Musambu wa 147:4) Nzambi mmumanye kabidi bionso pa bidi bitutangila, nunku nnganyi mukuabu udi mua kufila mandamuna mimpe matambe ku nkonko ya mushinga pa muoyo?—Matayo 10:30.
4. Bua tshinyi tudi ne bua kutekemena bua Nzambi kutupeteshaye bushidimunyi budi ne bua kutuludika, ne mmukanda kayi udi ukumbaja dijinga edi?
4 Fuanyikijabi bantu babidi bateta mua kulongolola mashinyi abu. Mutondeshibue, umue udi wimansha biamu bia dilongolola nabi panshi. Mukuabu udi ulongolola tshilema ne lutulu, utemesha mashinyi, ne utua mimuemue padi mashinyi atema ne enda bimpe. Kabiakukukolela bua kutshinka eu wa ku bantu babidi aba uvua ne mukanda wa mamanyisha wa kudi muenji wa mashinyi. Ki mbia meji bua se: Nzambi udi mua kutupetesha mêyi-mashidimunyi bua kutulombola mu nsombelu anyi? Muudi mua kuikala mubimanye, Bible udi udiamba mudiye nanku menemene—mukanda wa bushidimunyi ne bulombodi bia kudi Mufuki wetu, muakaja bua kutupa dimanya dia Nzambi.—2 Timote 3:16.
5. Mmushinga kayi udi nawu dimanya didi mu Bible?
5 Bikala tshidi Bible udiamba tshilelela, ela meji ku biûma bia mushinga bia dimanya bidi ne bua kuikala mu mukanda eu! Udi utusaka bikole mu Nsumuinu 2:1-5 (NW) bua kukeba meji, kumbula bua kuapeta anu bu mutudi mua kuenza bua biûma bisokoka—ki mmu buloba bua meji a bantu, kadi mmu Dîyi mene dia Nzambi. Bituakebamu, “netupete dimanya mene dia Nzambi.” Bu mudi Nzambi mumanye mikalu ne majinga bietu, udi utupesha bushidimunyi buatuambuluisha bua kulombola nsombelu yetu ne disanka ne ditalala. (Musambu wa 103:14; Yeshaya 48:17) Kusakidila apu, dimanya dia Nzambi didi ditupa lumu luimpe lusonsodi.
MUOYO WA KASHIDI!
6. Ntshinyi tshivua Yezu Kristo mushindike pa bidi bitangila dimanya dia Nzambi?
6 Muntu mumanyike bimpe mu mianda ya kale Yezu Kristo wakumvuija bualu ebu bua dimanya Nzambi mu mêyi matokesha. Wakamba ne: “Etshi tshidi tshiumvuija muoyo wa kashidi: balonge mua kukumanya,dipeta diabo dia dimanya diebe wewe, Nzambi umuepele mulelela, ne eu uwakatuma, Yezu Kristo.” (Yone 17:3, NW) Elaku meji—dimanya didi difikisha ku muoyo wa kashidi!
7. Ntshijadiki kayi tshidi tshileja ne: Nzambi kavua mutulongoluele lufu?
7 Kuangatshi lukasa muoyo wa kashidi bu tshilota patupu. Pamutu pa nanku, tangila mushindu udi mubidi wa muntu muenza. Mmulongolola bimpe bitambe bua kulabula, kuteleja, kununkila, kumona, ne kulenga. Kudi bintu bivule bitambe pa buloba bidi bisankisha biumvuilu bietu—biakudia bisheme, musambu musangalaji wa kanyunyi, bilongo bia dipembu, tshimuenenu tshilengele, bu-nyana bua musangelu! Ne buongo buetu bukemeshi budi bupite ordinatere munenanenayi kule, bualu budi butupa makokeshi a kuanyisha ne kusankila mu bintu bionso bia mushindu’eu. Udi wela meji se: Mufuki wetu mmusue bua tufue ne tujimije bionso ebi anyi? Ki mbia meji bua kukoma se: mmusue bua tuikale ne muoyo wa disanka ne tuikale nawu kashidi anyi? Eyowa, ke tshidi dimanya dia Nzambi mua kumvuija buebe wewe.
MUOYO MU MPARADIZU
8. Ntshinyi tshidi Bible wamba bua matuku atshilualua a bukua-bantu?
8 Tshidi Bible wamba bua matuku atshilualua a buloba ne a bukua-bantu tshidi mua kuambibua mu muaku umue—Mparadizu! Yezu Kristo wakakula pa bualu ebu pakambilaye muntu kampanda ukavua pa kufua ne: “Netuikale nebe mu mparadizu.” (Lukas 23:43, Mukenji Mulenga) Ditela mparadizu kabiyi mpata diakatuma lungenyi lua muntu au ku nsombelu wa diakalenga wa baledi betu ba kumpala, Adama ne Eva. Pakabafuka Nzambi, bavua bapuangane ne basombe mu lupangu lunene lufuane budimi luvua Mufuki mulongolole ne muenze. Luvua lubikidibua mu mushindu muakanyine ne: budimi bua Edene, dîna didi diumvuija disanka.
9. Nsombelu mu Mparadizu wa ku ntuadijilu uvua mushindu kayi?
9 Mmushindu kayipu uvua budimi abu bulenga! Buvua mparadizu mulelela. Munkatshi mua mitshi yabu milengele muvua mitshi ivua ikuama bimuma bisheme. Pavua Adama ne Eva bendakana mu lupangu luabu, banua mâyi mimpe, ne bapola bimuma ku mitshi yamu, kabavua ne kabingila ka kuikala ne disumpakana anyi ditshina. Nansha nyama kayivua njiwu to, bualu Nzambi wakapesha mulume ne mukajende bukokeshi bua dinanga pa nyama yonso. Kusakidila apu, bena dibaka babidi ba kumpala aba bavua ne makanda a mubidi makole. Pavuabu ne ditumikila kudi Nzambi, muoyo wa kashidi mu disanka uvua mubatekela kumpala. Bakapeshibua mudimu wa disanka wa kutabalela tshisombelu tshiabu tshia mpatshi, Mparadizu. Kusakidila apu, Nzambi wakapesha Adama ne Eva bukenji bua ‘kuuja buloba tente ne kubukokesha.’ Buobu ne ndelanganyi yabu bavua ne bua kualabaja mikalu ya Mparadizu too ne pavua dibulunge dietu dionso ne bua kulua muaba muimpe ne mulenga.—Genese 1:28, NW.
10. Pakakula Yezu bua Mparadizu, ntshinyi tshivuaye natshi mu lungenyi?
10 Kadi pakatela Yezu Mparadizu, kavua ulomba muntu ukavua pa kufua bua kuela meji ku bualu bua kale. Tòo, Yezu uvua wakula bua matuku atshilualua! Uvua mumanye se: buloba bujima budi tshisombelu tshietu nebulue mparadizu. Nenku Nzambi neakumbaje dilongolola diende dia ntuadijilu bua bukua-bantu ne bua buloba buetu. (Yeshaya 55:10, 11) Eyowa, Mparadizu neasuludibue! Ne neikale mushindu kayi? Bible, Dîyi dinsantu dia Nzambi, didi diandamuna.
NSOMBELU MU MPARADIZU MUASULULA
11. Mu Mparadizu muasulula, ntshinyi tshienzeka bua masama, bukulakaje, ne lufu?
11 Masama, bukulakaje, ne lufu kabiakuikalaku kabidi. ‘Mu dituku adi mesu a mufofo neatabale, ne matshu a badi ne mapapa neajikuke. Mu diba adi, muntu mulema neatupike bu ngulungu, ludimi lua kamama neluimbe misambu.’ (Yeshaya 35:5, 6) “Ne Nzambi yeye muine neikale ne [bukua-bantu]. Ne neakupule tshinsonji tshionso ku mêsu abu, ne lufu kaluakuikalaku kabidi, nansha madilu, nansha mbila, nansha bisama kabiakuikalaku kabidi. Bintu bia kale biajiminyi.”—Buakabuluibua 21:3, 4, NW.
12. Bua tshinyi tudi mua kuikala bajadike se: kakuakuikala kabidi dibunda dia bibawu, tshikisu, ne bubi mu Mparadizu utshilualua?
12 Dibunda dia bibawu, tshikisu, ne bubi nebijimine tshiendelele. ‘Benji ba malu mabi nebabutudibue . . . Tshitupa tshipi katshiyi tshianji kulepa, muntu mubi kena wikalaku kabidi . . . kena wikalaku. Kadi badi ne mitshima mipuekele nebapiane buloba.’ (Musambu wa 37:9-11) “Bua benji ba malu mabi, nebumbushibue pa buloba; ne bena tshitungu nebatukudibuepu.”—Nsumuinu 2:22, NW.
13. Mmunyi muatuala Nzambi ditalala?
13 Ditalala nedikale pa buloba bujima. “Udi [Nzambi] ukosesha mvita ne ku ntengu ya buloba, udi utshibula buta, utshibula difuma.” (Musambu wa 46:10, MMM) “Muntu muakane neatuadija kukola, ne ditalala divule too ne pikale ngondo katshiyiku kabidi.”—Musambu wa 72:7, NW.
14, 15. Ntshinyi tshidi Bible wamba bua nzubu, mudimu, ne biakudia mu Mparadizu muasulula?
14 Nzubu ne mudimu wa disanka nebikale bipepele mua kubipeta. ‘Nebase nzubu, nebashikamemu . . . Kabena basa nzubu bua mukuabu abuelemu; kabena bakuna bintu bua mukuabu abidie; bualu bua bu mudi matuku a muoyo wa mutshi mbu mudi matuku a bantu banyi, ne bantu banakusungula nebasanke musangu mule mu mudimu wa bianza biabo. Kabena bakuata mudimu wabo patupu, kabena balela bana bua kabutu kakuate bana lubilu.’—Yeshaya 65:21-23.
15 Biakudia bikoleshi bia mubidi nebikale bivule. “Matete neabodiame pa buloba, pa nsongo ya mikuna nepikale dibodiama.” (Musambu wa 72:16, NW) ‘Buloba buakukuamisha bintu biabu bivule; Nzambi, Nzambi wetu mene, neatuvudijile disanka.’—Musambu wa 67:6.
16. Bua tshinyi nsombelu mu Mparadizu neikale wa disanka?
16 Muoyo wa kashidi mu mparadizu pa buloba newikale wa disanka. “Bakane nebapiane buloba, nebasemu kashidi.” (Musambo wa 37:29, MMM) “Tshipela ne buloba buume nebikale ne disanka divule; mpata neasanke, neamene bilongo bu bia kapapankole.”—Yeshaya 35:1, MMM.
DIMANYA NE MATUKU EBE ATSHILUALUA
17. (a) Ntshinyi tshiudi ne bua kuenza bikala muoyo mu Mparadizu ukusankisha? (b) Mmunyi mutudi bamanye se: Nzambi neatuale mashintuluka manene pa buloba?
17 Bikala muoyo wa kashidi ukusankisha, kulekedi tshintu nansha tshimue tshikukanda bua kupeta dimanya dia Nzambi. Mmunange bukua-bantu ne neatuala mashintuluka adi akengedibua bua kukudimuna buloba mparadizu. Tuamba eku tuela eku, bu wewe muikale ne bukokeshi bua kujikija dikenga ne dipanga buakane bidi pa buloba, kuvuaku mua kuenza nanku anyi? Tudi mua kutekemena se: Nzambi udi mua kuenza bishadile ku ebi anyi? Bushuwa, Bible udi wakula mu miaku ya lusasu bua tshikondo tshialua Nzambi kumbusha ndongoluelu eu muule ne difuilakana ne kupingaja pa muaba wende bukokeshi bupuangane, buakane. (Danyele 2:44) Kadi Bible udi utuambila makuabu malu kupita apa. Udi utuleja mushindu wa kupanduka bua kubuela mu bulongolodi bupiabupia bulaya kudi Nzambi.—2 Petelo 3:13; 1 Yone 2:17.
18. Ntshinyi tshidi dimanya dia Nzambi mua kukupetesha lelu’eu?
18 Dimanya dia Nzambi didi kabidi mua kukupetesha mabenesha mavule lelu’eu. Bible udi wandamuna ku nkonko mitambe kuondoka ne milubakaji. Kuitaba buludiki buende nekukuambuluishe bua kudia bulunda ne Nzambi. Ndia muabi bunene kayipu! Ne ebi nebikupeteshe ditalala didi anu Nzambi nkayende mua kufila. (Lomo 15:13, 33) Bu muudi mutuadije kupeta dimanya edi dipeteshi dia muoyo, udi mubangishe kuenza madikolela a mushinga mukole ne mafutshi bua muoyo webe. Kuakunyingalala nansha musangu umue bua dipeta dia dimanya dia Nzambi didi difikisha ku muoyo wa kashidi.
19. Ndukonko kayi lutuakonkonona mu nshapita udi ulonda?
19 Tuvua batele Bible bu mukanda udi ne dimanya dia Nzambi. Nunku, mmunyi mutudi bamanye se: ki mmukanda wa meji a bantu, kadi mmuyipite ne kule? Netukonkonone lukonko elu mu nshapita udi ulonda.
TETA DIMANYA DIEBE
Bua tshinyi dimanya dia Nzambi didi mua kukufikisha ku diakalenga dia kashidi?
Muoyo newikale mushindu kayi mu Mparadizu wa pa buloba utshilualua?
Bua tshinyi neupetele mabenesha ku dipeta dimanya dia Nzambi lelu’eu?