Difila dia bijadiki bimpe

PAUDI wamba bualu, bateleji badi ne bukokeshi bua kudiebeja ne: “Tshidi tshileja ne: malu adiye adiye wamba aa mmalelela ntshinyi? Ntshijadiki kayi tshidi tshileja ne: tudi ne bua kuitaba malu adiye wamba?” Bu muudi mulongeshi, udi ne tshia kuandamuna nkonko eyi peshi kuambuluisha bateleji bua kupetabu mandamuna ayi. Bikala bualu buikale ne mushinga menemene, leja bantu tshidibu ne bua kubuitabila. Nunku, muyuki webe neubatuishe.

Mupostolo Paulo uvua mumanye mua kufikisha bantu ku ditaba bivuaye ulongesha. Wakakeba bua kushintulula lungenyi lua bateleji bende pa kufila bijadiki bimpe, kuelangana nabu meji biakane, ne pa kubasengelela ne muoyo umue. Wakatushila tshilejilu tshilenga. (Bien. 18:4; 19:8) Kadi tshidibi, bamue bangamba-malu batu batuisha bantu ne meji mabi a kubapambula. (Mat. 27:20; Bien. 14:19; Kolos. 2:4) Badi mua kutuadija ne bualu kampanda bua dishima, kushindamena pa bintu bidi kabiyi bijalame, pa bijadiki bia pa mutu pa mutu, anyi pa malu adi asankisha mubidi pamutu pa adi atangila meji. Tudi ne tshia kuepuka ngenzelu ya nunku eu.

Bishindamene pa Dîyi dia Nzambi. Katuena ne bua kulongesha bantu malu etu nkayetu nansha. Tudi tukeba kumanyisha bakuabu bitudi balonge mu Bible. Mikanda ya kasumbu ka mupika wa lulamatu ne wa budimu mmituambuluishe bikole pa mushindu wa kulongesha. Mikanda eyi idi ituambila bua kulonga Mifundu ne muoyo mujima. Ku luetu luseke, tudi tuludika bantu ku Bible, ki nne dijinga dia kubaleja mutudi tuamba bulelela to, kadi ne bupuekele buonso, bua kubalekela badimuenene nkayabu tshidi Bible wamba. Tudi tuitaba tshiakamba Yezu pavuaye usambila Tatu wende ne: ‘Dîyi diebe mbulelela.’ (Yone 17:17) Kakuena muntu udi ne bukokeshi bunene bu bua Yehowa Nzambi, Mufuki wa diulu ne buloba. Bua bijadiki bietu kuikalabi bimpe, bidi ne bua kushindamena pa Dîyi diende.

Newakule imue misangu ne bantu badi kabayi bibidilangane ne Bible anyi badi kabayi bamuangata bu Dîyi dia Nzambi to. Mbimpe kuikala ne busunguluji bua kumanya dîba ne mushindu wa kuela mvese mu diyikila ne bantu. Kadi kunengi bua kutuma ntema ya bantu ku Bible, tshiamu tshietu tshinene tshia mamanyisha to.

Kadi tudi mua kuamba ne: kufila mvese muakane patupu nkukumbane bua kufila tshijadiki tshidi muntu kayi mua kuelesha mpata anyi? Tòo, ki ng’amu nanku to. Udi mua kuakula pa mvese idi pabuipi bua kuleja mudi mvese uudi mubale ukuatshisha tshiudi wamba menemene. Paudi wangata anu dîyi kampanda mu mvese idi pabuipi nende idi kayiyi yakula pa tshiena-bualu tshiebe, nebikengele bua wewe kuamba manga malu. Udi mua kufila mvese mikuabu idi yakula pa tshilumbu atshi bua kuleja bateleji ne: malu audi wamba mmashindamene menemene pa Mukanda wa Nzambi.

Kuedi nseka kupitshishi pa tshidi mvese wamba. Umubale bimpe bimpe. Udi mua kuikala wakula mu ka-bujima ka tshiena-bualu tshiebe. Kadi, bua bijadiki kutuishabi bantu, badi ne tshia kumona mudibi bijadika menemene malu audi wamba.

Bijadiki bikuabu. Imue misangu, tudi mua kufila bijadiki biangatshila muaba mukuabu udi bantu banemeka (pa kumusha Bible) bua bamone mudi Mifundu mikale yamba malu a meji.

Tshilejilu, udi mua kuakula bua bukua-mabulunge bua kuleja mudi Mufuki muikaleku. Udi mua kuakula bua mikenji idi ilombola bukua-bintu (bu mudi wa dikokangana dia bukua-mabulunge) ne kubaleja ne: dikalaku dia mikenji eyi didi dileja bulelela ne: kudi Muntu wakela mikenji eyi. Lungenyi luebe neluikale luimpe pikalalu lumvuangana ne tshidibu bambe mu Dîyi dia Nzambi. (Yobo 38:31-33; Mus. 19:1; 104:24; Lomo 1:20) Bijadiki bia nunku bidi ne diambuluisha bualu bidi bileja mudi malu adi Bible wamba mikale umvuangana ne adi amueneka.

Udi ukeba bua muntu afike ku ditaba ne: Bible n’Dîyi dia Nzambi menemene anyi? Udi mua kutela bashikuluji ba malu kampanda badi bitaba ne: Bible n’Dîyi dia Nzambi. Kadi kuenza nunku nkujikija tshilumbu anyi? Kuenza nunku nekusankishe anu bantu badi banemeka bashikuluji aba tshianana. Udi mua kukuata mudimu ne malu a siyanse bua kujadika bulelela bua Bible anyi? Wewe mua kuangata meji a bena siyanse (badi bapange bupuangane) bu nshindamenu wa biudi wamba, udi washila pa tshishimikidi tshitekete. Kadi wewe mutuadije ne Dîyi dia Nzambi, ulua kuleja pashishe malu a siyanse adi aleja mudi Bible wamba malu malelela, apu newashile bijadiki biebe pa tshishimikidi tshikole.

Tshintu tshionso tshiudi musue kujadika, utshifidile bijadiki bikumbane. Bungi bua bijadiki bia kufila budi bulonda tshidi bateleji bebe. Tshilejilu, paudi wakula bua matuku a ku nshikidilu bilondeshile 2 Timote 3:1-5, udi mua kutela bualu bua mu ngumu buikale bumanyike bimpe budi buleja mudi bantu kabayi ‘banange bana babu.’ Tshilejilu tshimue etshi tshidi mua kukumbana bua kuleja ne: tudi mu matuku a ku nshikidilu.

Difuanyikija bintu bibidi bidi ne malu kampanda manene a muomumue didi mua kuambuluisha bantu bikole. Kadiakujadika nkayadi bualu to; Bible ke udi mua kuleja bikala difuanyikija edi dikale diakane. Tshidibi, didi mua kuleja muntu mudi lungenyi kampanda luikale luimpe. Udi mua kuenza nadi mudimu tshilejilu, paudi umvuija mudi Bukalenge bua Nzambi buikale mbulamatadi. Udi mua kuamba ne: Bukalenge bua Nzambi budi ne bakokeshi, budi bantu badibu bakokesha, ne mikenji, ne ndongoluelu wa dikosa nsambu ne wa dilongesha anu bu mbulamatadi ya bantu.

Misangu mivule udi mua kulonda malu atu menzeke bua kuleja buimpe bua kutumikila mibelu ya Bible. Udi kabidi mua kulonda malu madimuenena nkayebe. Tshilejilu, paudi uleja muntu mushinga wa kubala ne kulonga Bible, udi mua kumulondela mutubi bikuambuluishe wewe. Pavua mupostolo Petelo usua kukankamija bena kuitabuja nende, wakakula bua dikudimuka dia Yezu (bualu buvuaye mumone ne ende abidi). (2 Pet. 1:16-18) Paulo wakalonda pende malu avuaye mupete. (2 Kol. 1:8-10; 12:7-9) Kadi nansha nanku, tshidibi mbimpe kulonda malu madimuenena aa anu misangu mibala bua kubenga kukoka patupu meji a bantu kuudi wewe.

Umanye ne: bu mudi nkoleshilu ne meji a bantu bishilangane, tshijadiki tshidi imue misangu mua kutuisha muntu umue katshiena mua kutuisha mukuabu to. Nanku, bidi bikengela wanji kumanya mmuenenu wa muntu kumpala kua kukeba bijadiki bia kumupesha ne mushindu wa kubifila. Nsumuinu 16:23 udi wamba ne: “Bantu ba meji badi basunguluja tshia kuamba. Ke mudibu batuisha bantu ne miaku yabu.”​—MMV.