Udi musue kumanya malu a bungi a mu Bible anyi?

Bua tshinyi bidi bikengela kubala Bible?

BIBLE mmukanda mushilangane ne mikuabu yonso; udi ne malongesha mimpe a kudi Nzambi. (1 Tesalonike 2:13) Wewe mutumikile malu adi Bible ulongesha, neupete diakalenga divule. Neufike ku dinanga Nzambi bikole ne neusemene pabuipi nende, yeye udi mufidi wa ‘kupa kuonso kuimpe ne dipa dionso diakane tshishiki.’ (Yakobo 1:17) Neumanye mushindu wa wewe kuikala umusambila. Nzambi neakuambuluishe mu bikondo bia ntatu. Biwatumikila mêyi a mu Bible mu nsombelu webe, Nzambi neakupeshe muoyo wa kashidi.​—Lomo 6:23.

Mu Bible mudi malongesha malelela adi afila butoke. Aba badi bapeta dimanya dia mu Bible badi bapikudibua ku malongesha a mashimi adi makondakaje nsombelu wa miliyo mivule ya bantu. Tshilejilu, dimanya dia bulelela bua tshidi tshitufikila kunyima kua lufu didi ditumbusha buôwa bua se: bafue badi mua kutuenzela bibi anyi se: balela ne balunda betu bakadi bafue badi bakenga. (Yehezekele 18:4) Dilongesha dia mu Bible dia dibishibua dia bantu ku lufu didi disamba aba badi bafuishe. (Yone 11:25) Dimanya bulelela pa bidi bitangila banjelu babi didi ditudimuija ne: dibuelakana mu malu a bakishi didi ne njiwu ne kabidi didi dituambuluisha bua kumvua tshidi ntatu mikadile bungi nunku pa buloba.

Mêyi a Nzambi adi mu Bible adi atulongesha bua kuikala ne nsombelu udi wambuluisha bua kulama mubidi wetu bimpe. Tshilejilu, kuikala ‘kudia pa ndilu [ne] kunua pa nnuinu’ kudi kuambuluisha muntu bua kushala ne makanda a mubidi makane. (1 Timote 3:2, Mukanda wa Mvidi Mukulu [Katolike, MMM]) ‘Kudilengeja ku manyanu onso a mubidi ne a nyuma’ kudi kutuepula ku dinyanga mubidi wetu. (2 Kolinto 7:1) Kulonda mibelu ya Nzambi idi mu Bible kudi kabidi kufila disanka mu dibaka ne kupetesha muntu kanemu.​—1 Kolinto 6:18.

Biwatumikila Dîyi dia Nzambi, neupete disanka dia bungi. Dimanya dia malu a mu Bible didi dituambuluisha bua kupeta ditalala dia mu mutshima ne disanka, ditupetesha kabidi ditekemena. Didi dituambuluisha bua kuikala ne ngikadilu milenga bu mudi: luse, dinanga, disanka, ditalala, buimpe, ne ditabuja. (Galatia 5:22, 23; Efeso 4:24, 32) Ngikadilu ya nunku idi ituambuluisha bua kuikala balume anyi bakaji bimpe, batatu anyi bamamu ba tshitembu, ne bana ba malu malenga kabidi.

Ukadiku mudiebeje bualu pa bidi bitangila matuku atshilualua anyi? Milayi ya mu Bible idi ituleja muaba ukadi mianda ya bukua-bantu mifikile. Milayi eyi kayena anu yumvuija nsombelu udi pa buloba lelu patupu nansha, kadi idi kabidi ileja ne: mu katupa kîpi emu Nzambi neakudimune buloba mparadizu.​—Buakabuluibua 21:3, 4.

Diambuluisha bua kumvua Bible

Pamuapa ukadi mutete bua kubala Bible pashishe wewe kulua kumona ne: ki mmupepele bua kumumvua to. Pamuapa kuena mumanye muaba uudi mua kupeta mandamuna a nkonko yebe mu Bible to. Bikalabi nanku, kuedi meji ne: udi nkayebe to. Tuetu bonso tudi dijinga ne diambuluisha bua kumona mua kumvua Dîyi dia Nzambi. Bantemu ba Yehowa badi balonga Bible ne bantu miliyo mivule mu matunga matue ku 235 kabayi balomba bantu difutu to. Badi ne disanka dia kukuambuluisha nansha wewe pebe.

Pa tshibidilu bitu bimpe kulonga Bible ku kakese ku kakese, ubanga ne malongesha a ntuadijilu. (Ebelu 6:1) Nunku paudi utungunuka ne dilonga, neukumbane bua kudia “biakudia bikole to,” mbuena kuamba ne: malongesha a bulelela matantamane. (Ebelu 5:14) Bible ke udi ne dîyi dia ndekelu ditudi ne bua kulonda. Kadi mikanda yetu bu mudi broshire wa Ntshinyi tshidi Nzambi utulomba?, neyikuambuluishe bua kumvua mvese ya mu Bible mu biena-bualu bishilashilangane.

Udiku mua kudilamina dîba lumingu luonso bua kulonga mua kumvua Bible anyi?

Kudi bantu badi mua kudilongolola bua kuikalabu balonga nebe Bible misangu yonso pa dîba ne muaba uudi musue. Bantu ba bungi batu balongela ku nzubu yabu. Bakuabu batu balongela nansha ku telefone. Dilonga edi kadiena bu kalasa ka bantu ba bungi musangu umue to, kadi ndia ulongela pa nkayebe bilondeshile mudi majinga ebe anyi nsombelu webe, mudi dimanya diebe ne tulasa tuudi mulonge. Kakuena mateta a kuenza to, ne kakuakuikala bualu nansha bumue buenzabu budi mua kukutondesha to. Nkonko ya mu Bible iudi nayi neyipete mandamuna, ne neulonge mushindu wa kusemena pabuipi ne Nzambi.

Kuakufuta kantu bua dilonga edi dia Bible nansha. (Matayo 10:8) Badi balonga ne bantu ba bitendelelu bionso, ne badi kabayi batendelela Nzambi kadi bikale bajinga ne muoyo mujima bua kuvudija dimanya diabu dia Dîyi dia Nzambi, ne badi balonga nabu nunku kakuyi dibafutshisha dikuta nansha dimue.

Nnganyi mukuabu udi mua kulonga pende? Dîku dienu dijima. Mulunda webe yonso uudi musue kubikila udi pende mua kulua kulonga. Anyi biwikala musue, badi mua kulonga anu nebe wewe pa nkayebe.

Bantu ba bungi batu badilamina dîba dimue ku lumingu bua kulonga Bible. Nansha wewe ne mushindu wa kuikala ulonga ku lumingu luonso mêba mavule peshi anu mu dîba dikese, Bantemu nebadiakaje bua kukuambuluisha.

Tudi tukulomba bua kulonga nebe

Tudi tukulomba bua umonangane ne Bantemu ba Yehowa. Bua kupetangana nabu udi mua kubafundila mu adrese umue wa ku idi kuinshi eku. Nebalongolole bua umue wa kudibu ikale ulua kulonga nebe Bible kuyi ufuta kantu.

□ Ntuminayiku broshire wa Ntshinyi tshidi Nzambi utulomba?

□ Suayi nulue kuntangila bua kulonga nanyi Bible kakuyi difuta makuta.

Padiku kakuyi kamanyinu, mvese yonso mmiangatshila mu Mukanda wa Nzambi.