NSHAPITA WA 10
Dibaka ntshintu tshimpe tshia kudi Nzambi udi mutunange
‘Kabena mua kutula mionji isatu milukakaja lukasa.’—MUAMBI 4:12.
1, 2. (a) Nkonko kayi itutu tudiela padi bantu baselengana? Bua tshinyi? (b) Nkonko kayi ituandamuna mu nshapita eu?
UTUKU musue kuya mu tshibilu tshia dibaka anyi? Bantu ba bungi batu basue kuyamu bualu mutu malu mimpe. Tutu tumona bantu badi baselangana bavuale bimpe bia dikema. Mpala yabu itu ne disanka dia bungi. Dituku adi bonso babidi batu butua anu mimuemue ne buabu bobu, anu masanka ke adi mabindile.
2 Tshidibi, lelu eu dibaka ndilue muaba wa bilumbu bia bungi. Nansha mututu tujinga bua bantu badi bafuma ku diselangana kusombabu bimpe, tutu pamuapa tudiebeja ne: ‘Nebikale ne disanka mu dibaka diabu edi anyi? Nedinenge anyi?’ Bua mulume ne mukaji kusombabu bimpe ne kunengabu mu dibaka, badi ne bua kueyemena mibelu idi Nzambi utupesha bua dibaka ne kuyitumikila. (Nsumuinu 3:5, 6) Badi ne bua kuenza nanku bua bobu kushala mu dinanga dia Nzambi. Kadi tuanjayi kumona mudi Bible wandamuna nkonko inayi eyi: bua tshinyi kusela anyi kusedibua? Wewe musue kubuela mu dibaka, nnganyi uudi mua kusungula bua kuselangana nende? Mmunyi muudi mua kudilongolola bua kubuela mu dibaka? Ntshinyi tshidi mua kuambuluisha mulume ne mukaji bua kusombabu bimpe?
BUA TSHINYI KUSELA ANYI KUSEDIBUA?
3. Bua tshinyi ki mbimpe kubuela mu dibaka bua malu a patupu?
3 Bantu bakuabu batu bamba ne: muntu udi upeta disanka anu padiye usela anyi padiye uya ku dibaka. Kabiena nanku to, badi bashima. Yezu uvua mujike, kadi wakamba mudi bujike buikale tshintu tshimpe tshia kudi Nzambi ne wakakankamija bantu bavua mua kukokesha bua kushala bajike bua kushalabu bajike. (Matayo 19:11, 12) Mupostolo Paulo wakakula pende bua masanka adi nawu bajike. (1 Kolinto 7:32-35) Yezu ne Paulo kabavua bakandike bantu bua kusela anyi kusedibua to, bualu ‘kukandika bantu dibaka’ ndimue dia ku “mayisha a bademon.” (1 Timote 4:1-3) Muntu udi mujike udi ne mushindu wa kuenzela Yehowa mudimu kayi ne ditanaji to. Nunku ki mbimpe kubuela mu dibaka bua malu a patupu anyi anu bua kusankisha bantu bakuabu to.
4. Dibaka dimpe didi diambuluisha bua bana kukolelabu muaba wa mushindu kayi?
4 Kadi kudiku malu adi ne bua kutusaka bua kusela anyi kusedibua anyi? Eyowa. Dibaka didi padi tshintu tshimpe tshia kudi Nzambi udi mutunange. (Genese 2:18) Nunku didi ne adi masanka adidi dipetesha. Tshilejilu, dibaka dimpe didi diambuluisha bua kuenza dîku dia nsongo. Bana badi dijinga ne muaba muimpe udibu mua kubakolesha kudi baledi, kubananga, kubabela ne kubalombola. (Musambu 127:3; Efeso 6:1-4) Kadi bantu kabatu baselangana anu bua kulela to.
5, 6. (a) Bilondeshile Muambi 4:9-12, bulunda bukole budi bupetesha masanka kayi? (b) Bidi bikengela tshinyi bua dibaka kuikaladi bu mionji isatu milukakaja?
5 Tangila tshidi mvese wa nshindamenu wa tshiena-bualu etshi ne mikuabu idi pabuipi nende yamba: ‘Bantu babidi badi bapita umue, bua bobu badi bapeta difutu dimpe ku mudimu wabu. Bualu bua biadishindabu, umue neabishe mukuende; kadi diakabi didi kudi udi udishinda nkayende kayi ne mukuabu bua kumubisha. Bualu bukuabu, bialala bantu babidi kaba kamue badi bakuatshishangana luya; kadi udi ulala nkayende udi mua kukuata luya munyi? Muntu udi mua kupita mukuabu bukole, kadi bantu babidi badi mua kumupita yeye bukole; kabena mua kutula mionji isatu milukakaja lukasa.’—Muambi 4:9-12.
6 Tshia kumpala, mvese eyi idi ileja mudi kuikala ne balunda kuimpe. Bena dibaka badi ne bua kudia bulunda bukole. Anu bu mudi mvese eyi ileja, bulunda ebu budi bubafikisha ku diambuluishangana, dikoleshangana ne dilamangana. Dibaka diabu didi dikola kabidi padibu basakidila muntu muisatu. Bilondeshile mvese eu, mionji ibidi milukakaja idi mua kutukakana. Kadi mbikole bua kutulakaja mionji isatu milukakaja. Padi mulume ne mukaji badienzeja bua kusankisha Nzambi, dibaka diabu didi dilua anu bu mionji isatu milukakaja. Yehowa udi ne muaba mu dibaka diabu ne didi dikola.
7, 8. (a) Mmubelu kayi uvua Paulo mupeshe bajike badi baluangana ne dijinga dia kusangila ne mulume anyi ne mukaji? (b) Bilondeshile Bible, tudi ne bua kutekemena tshinyi patudi tubuela mu dibaka?
7 Nzambi udi witabila mulume ne mukaji bua kuangatangana anu padibu baselangane bilondeshile tshidi Bible wamba. (Nsumuinu 5:18) Nansha pakadi muntu mupitshishe tshikondo tshitu bansonga bumvua dijinga dikole dia kusangila ne mulume anyi ne mukaji, udi anu mua kuikala utshidi uluangana ne dijinga edi. Yeye kayi mudikande udi mua kufika ku dienza bualu bubi anyi bua bundu. Nyuma muimpe wakasaka Paulo bua kubela bajike ne: ‘Bikalabu kabayi mua kudikanda, babake biabu, bualu bua kubaka kudi kutamba kusamina muoyo buimpe.’—1 Kolinto 7:9; Yakobo 1:15.
8 Nansha muntu yeye mubuele mu dibaka bua bualu kayi, amanye ne: udi anu mua kupeta ntatu. Anu bu muvua Paulo muambe, bantu badi babuela mu dibaka ‘nebikale ne kanyinganyinga mu mibidi yabu.’ (1 Kolinto 7:28) Bantu badi mu mabaka batu ne ntatu itu bajike kabayi mua kupeta to. Kadi biwikale musue kubuela mu dibaka, ntshinyi tshiudi mua kuenza bua kukepesha ntatu ne kuvudija masanka? Tshia kumpala, udi ne bua kusungula mukaji muimpe anyi mulume muimpe.
MMUNTU KAYI UUDI MUA KUSOMBA NENDE BIMPE MU DIBAKA?
9, 10. (a) Paulo uvua muleje ne: kuselangana ne muntu udi kayi muena Kristo kudi mua kukebesha lutatu kayi? (b) Ntshinyi tshitu tshienzekela bantu batu babenga kutumikila mubelu wa Nzambi wa kuselangana anu mu Mukalenge?
9 Nyuma muimpe wakasaka Paulo bua kufunda mêyi adi mua kuambuluisha muntu bua kusungula mulume anyi mukaji wa kuselangana nende. Wakamba ne: ‘Lekelayi kulamakajibua ne badi kabayi bena ditabuja.’ (2 Kolinto 6:14) Mmufile tshilejilu etshi bilondeshile tshivua babidime benza. Pavuabu basuika nyama ibidi ya bunene bushilangane ku tshikokedi tshimue bua kudima nayi, bavua bayikengesha. Bia muomumue, padi muena Kristo uselangana ne muntu udi kayi muena Kristo nebikale ne bilumbu ne ntatu. Padi umue wa kudibu udienzeja bua kushala mu dinanga dia Yehowa, kadi mukuabu kayi udienzeja anyi kayi mene ubukonka, kabakuikala ne bipatshila bia muomumue to, ne kabakupetangana nansha. Ke bualu kayi Paulo wakabela bena Kristo bua kuselangana ‘anu mu Mukalenge.’—1 Kolinto 7:39.
10 Imue misangu, bena Kristo bajike badi mua kuela meji ne: mbimpe kuikala nansha muselangane ne muntu udi kayi muena Kristo pamutu pa kudisombela nkaya. Bakuabu batu babenga mibelu ya mu Bible ne baselangana ne bantu badi kabayi benzela Yehowa mudimu. Misangu yonso batu badikebela dikenga. Batu badimona bakadi basombe ne muntu udibu kabayi mua kuenza nende malu adi ne mushinga wa bungi mu nsombelu to. Bunkaya budibu bapeta dîba adi mbupite buvuabu nabu kumpala kua kubuelabu mu dibaka. Diakalenga, kudi bena Kristo bajike binunu ne binunu badi beyemena mibelu ya Nzambi mu bualu ebu ne bayilonda. (Musambu 32:8) Nansha mudibu batekemena ne: nebabuele mu dibaka dimue dituku, badi bashala bajike too ne mualuabu kupeta wa kuselanganabu nende munkatshi mua basadidi ba Yehowa Nzambi.
11. Ntshinyi tshidi mua kukuambuluisha bua kusungula muntu muimpe wa kuselangana nende? (Bala malu adi mu kazubu kadi kamba ne: “Ntshinyi tshindi ntekemena kudi muntu utuaselangana nende?.”)
11 Tshidibi, ki mbasadidi ba Yehowa bonso badi bakumbane bua kuselangana nabu to. Paudi musue kubuela mu dibaka, sungula muntu udi ne ngikadilu idi ipetangana ne yebe, unudi nende ne bipatshila bimue mu mudimu wa Nzambi ne udi munange Nzambi bu wewe. Bena mu kasumbu ka mupika wa lulamatu mbafile mibelu ya bungi bua bualu ebu ne udi mua kuelelapu meji ne kusambila bua ikuambuluishe paudi wangata dipangadika dinene edi.a—Musambu 119:105.
12. Ntshinyi tshitubu benza mu matunga a bungi padi bana basua kuselangana? Ntshilejilu kayi tshia mu Bible tshidi mua kubambuluisha?
12 Mu matunga a bungi, baledi ke batu basunguila bana babu muntu wa kuselanganabu nende. Mu matunga au batu bamba ne: baledi ke badi mua kusungula muntu muimpe bualu badi ne meji a bungi ne bakadi bamonamone mianda. Misangu ya bungi mabaka au atu mimpe anu bu muvuabi ku kale. Tshilejilu tshia Abalahama uvua mutume muena mudimu wende bua kukebela Isaka mukaji tshidi mua kuambuluisha baledi badi mu nsombelu wa buena wende. Abalahama kavua ukeba mukaji wa mu dîku dia babanji anyi dia bantu bende lumu to. Kadi wakenza muende muonso bua kupetela Isaka mukaji munkatshi mua batendeledi ba Yehowa.b—Genese 24:3, 67.
MMUNYI MUUDI MUA KUDILONGOLOLA BUA KUSOMBA BIMPE MU DIBAKA?
13-15. (a) Mmunyi mudi mêyi adi mu Nsumuinu 24:27 mua kuambuluisha mulume udi musue kusela? (b) Ntshinyi tshidi mukaji udi musue kubuela mu dibaka ne bua kuenza?
13 Wewe wela meji bikole bua kubuela mu dibaka, mbimpe udiebeje ne: ‘Nkadiku mukumbane bua kubuela mu dibaka anyi?’ Kuitabi ne: eyowa anu bualu udi munange muntu kampanda, anyi bualu udi umvua dijinga dikole dia kusangila, peshi bualu udi ukeba muntu wa kusomba nende anyi bualu udi musue kulela to. Kadi kudi majitu masunguluke adi mulume ne mukaji badi basue kubuela mu dibaka ne bua kuanji kuelela meji.
14 Muntu mulume udi ukeba kusela udi ne bua kuela meji bimpe pa mêyi aa: ‘Longolola mudimu webe pambelu, udilongoluelawu mu budimi; pashishe wase nzubu webe.’ (Nsumuinu 24:27) Mbisue kumvuija tshinyi? Ku kale, pavua mulume ukeba ‘kuasa nzubu wende’ anyi kuenza dîku, uvua ne bua kudiebeja ne: ‘Ndiku mukumbane bua kudisha mukajanyi ne bana batudi mua kulela nende ne kubalama anyi?’ Uvua ne bua kuanji kuenza mudimu, mmumue ne: kudima. Ke mudibi kabidi lelu. Muntu udi musue kusela udi ne bua kudilongolola bua kuambula majitu ende. Udi ne bua kutungunuka ne kuenza mudimu padiku kakuyi tshidi tshimupangisha bua kuwenza. Dîyi dia Nzambi didi diamba ne: muena Kristo udi kayi udisha bena mu dîku diende, kayi ubananga ne ubalongesha Bible, mmubi kupita muntu udi kayi muena kuitabuja.—1 Timote 5:8.
15 Mukaji udi musue kubuela mu dibaka udi pende ne majitu adiye ne bua kuambula. Bible udi uleja imue midimu ne ngikadilu idi mukaji ne bua kuikala nayi bua kuambuluishaye bayende ne kulama nzubu wende. (Nsumuinu 31:10-31) Balume anyi bakaji badi bazuka bua kubuela mu dibaka kabayi badilongolole bua kuambula majitu abu mbadinangi, bualu ki mbele meji ku tshidibu mua kuenzela muena dibaka nabu to. Kadi bantu badi basue kubuela mu dibaka badi ne bua kudilongolola nangananga bua kutumikila mêyi a Nzambi.
16, 17. Mvese kayi idi bantu badi basue kubuela mu dibaka ne bua kuelela meji?
16 Muntu udi udilongolola bua kubuela mu dibaka udi ne bua kuela meji ku majitu adi Nzambi mupeshe mulume ne mukaji. Mulume muena Kristo udi ne bua kumanya tshidi kuikala mfumu wa dîku kumvuija. Bumfumu buende kabuena bumupesha bukokeshi bua kuikala ne malu makole to. Kadi udi ne bua kuidikija mushindu udi Yezu ukokesha. (Efeso 5:23) Bia muomumue, mukaji muena Kristo udi ne bua kumanya mudimu wa mushinga mukole udi Nzambi mupeshe bakaji. Neitabe bua kukokela ‘mukenji wa bayende’ anyi? (Lomo 7:2) Mukaji ukadi ku mikenji ya Yehowa ne ya Kristo. (Galatia 6:2) Bumfumu bua bayende mu dîku mmukenji mukuabu udiye ne bua kutumikila. Neitabe bua kusomba ne muntu muena mapanga ne kumukokela anyi? Yeye mumone ne: kena mua kuenza malu aa, mbimpe anji kuindila kabidi ndambu kumpala kua kuitaba bua bamusele.
17 Pashishe, mulume ne mukaji badi ne bua kuikala bakumbane bua kukumbaja majinga a pa buawu a yonso wa kudibu. (Filipoi 2:4) Paulo wakafunda ne: ‘Mulume ne mulume anange mukajende bu mudiye udinanga; ne mukaji anemeke bayende.’ Nyuma wa Nzambi wakambuluisha Paulo bua kujingulula ne: mulume utu musue kumvua ne: mukajende udi umunemeka bikole. Mukaji pende utu musue kumvua ne: bayende mmumunange bikole.—Efeso 5:21-33.
18. Bua tshinyi bantu badi batantshilangana badi ne bua kuikala ne didikanda?
18 Tshikondo tshidi bantu babangilangana katshiena anu tshia kusombeshangana ne kuendakana to. Kadi badi ne bua kulongangana ne kumona bikalabi bimpe bua bobu kuselangana. Badi kabidi ne bua kuikala ne didikanda. Badi mua kumvua dijinga dikole dia kusangila. Ki ndijinga dibi to, kadi muntu udi munange mukuabu kena mua kuitaba bua kumuenzela bualu budi mua kumunyangila malanda ende ne Nzambi to. (1 Tesalonike 4:6) Nunku panudi nutantshilangana, ikalayi ne didikanda bualu ngikadilu eu neanuambuluishe mu nsombelu wenu mujima nansha nuenu baselangane anyi kanuyi baselangane.
TSHIA KUENZA BUA DIBAKA KUNENGADI
19, 20. Bua tshinyi muena Kristo udi ne bua kumona dibaka mu mushindu mushilangane ne wa bena lelu? Fila tshilejilu.
19 Bua dibaka kunengadi, mulume ne mukaji badi ne bua kumanya bimpe tshidi mitshipu yabu yumvuija. Mu mikanda ne mu filme, batu baleja dibaka bu ndekelu wa tshintu tshivua bantu bindile ne muoyo kulu kulu. Kadi mu nsombelu wetu wa matuku onso, dibaka ki ndekelu wa malu to; ntuadijilu wa tshintu tshidi Yehowa muenze bua tshinenge. (Genese 2:24) Diakabi, bantu ba bungi lelu eu kabena badimona nanku to. Mu matunga makuabu bantu batu bafuanyikija dibaka ne dijita dienza ne mionji ibidi. Kadi ki mbamanye ne: tshilejilu etshi tshidi tshipetangana bimpe ne mushindu udi bantu bamona dibaka lelu to. Mmushindu kayi? Nansha mudi dijita dimpe ne bua kunenga matuku onso atudi nadi dijinga, bidi kabidi ne bua kuikala bitekete bua kudisuika ne kudisulula.
20 Bantu ba bungi lelu badi bamona dibaka bu tshintu tshia matuku makese. Badi babuela mu dibaka bualu badi bela meji ne: nedikumbaje majinga abu, kadi bikale ne lungenyi lua kudishipa padi malu kaayi enda bimpe. Kadi tuvuluke ne: Bible yeye udi ufuanyikija dibaka ne monji. Mionji itubu balukakaja bua kuendesha nayi mazuwa anyi kuimanyika kayitu miteketangane to, kadi itu mionji mikole idi mua kubenga kukoseka nansha padiku tshipepele tshikole. Bia muomumue, Nzambi mmuenze dibaka bua kunengadi. Tuvuluke mêyi a Yezu a ne: ‘Muntu kapanduludi tshidi Nzambi mubumbakaje.’ (Matayo 19:6) Wewe musue kubuela mu dibaka mbimpe wikale ne lungenyi lua buena elu. Lungenyi elu ludiku luvuija dibaka tshintu tshitudi katuyi mua kutua tshiadi anyi? Tòo.
21. Mulume ne mukaji badi ne bua kumonangana mushindu kayi? Ntshinyi tshidi mua kubambuluisha bua kuenza nanku?
21 Mulume ne mukaji badi ne bua kutungunuka ne kutuangana mushinga. Yonso wa kudibu yeye ukeba bua kumona ngikadilu mimpe ya mukuende ne mudiye udienzeja bua kusombabu bimpe, nebapete disanka dia bungi mu dibaka diabu. Kuanyisha ngikadilu mimpe ya muena dibaka nebe nansha mudiye muena bilema nkubula meji anyi? Yehowa kena mua kubula meji nansha kakese, pende utu utuanyisha nansha mutudi bena bilema. Mufundi mukuabu wa misambu ya mu Bible wakamba ne: ‘Yehowa, bu wewe mubale dipambuka dia bantu, mmuntu kayi wakadi mua kuimana, Mukalenge?’ (Musambu 130:3) Bia muomumue, mulume ne mukaji badi ne bua kuanyishangana ne kubuikidilangana.—Kolosai 3:13.
22, 23. Bua tshinyi Abalahama ne Sala badi tshilejilu tshimpe bua bantu badi mu mabaka lelu?
22 Dibaka didi mua kupetesha masanka a bungi padidi dinenga bidimu bia bungi. Bible udi wakula bua dibaka dia Abalahama ne Sala pakavuabu bakulakaje. Bavua bapete pabu ntatu ne makenga. Tshilejilu, ela meji muvua Sala ukavua ne bidimu bitue ku 60 mua kuikala mumvue pakumbukabu mu nzubu wabu muimpe mu tshimenga tshia Ula, bua kuya kusombela mu ntenta too ne muvuaye ne bua kufua. Kadi wakakokela bumfumu bua bayende. Sala wakambuluisha Abalahama ne kumukuatshisha ne kanemu kuonso bua kukumbaja mapangadika ende. Dikokela diende kadivua dia pamutu pamutu to. Nansha “munda munda,” uvua ubikila bayende ne: mukalenge wanyi. (Genese 18:12; 1 Petelo 3:6) Kanemu kavuaye naku kudi Abalahama kavua kafumina mu muoyo.
23 Abi kabiena biumvuija ne: Abalahama ne Sala bavua bapetangana mu malu onso to. Tshilejilu, musangu mukuabu Sala wakamba bualu bukuabu buvua ‘bubungamije Abalahama bikole.’ Kadi Abalahama wakalonda mubelu wa mukajende pakamubelabu kudi Yehowa ne bualu ebu buakapetesha dîku diabu disanka. (Genese 21:9-13, MMM) Lelu, balume ne bakaji nansha bakadi benze bidimu bia bungi mu dibaka badi mua kulongela malu a bungi kudi Abalahama ne Sala.
24. Mmabaka a mushindu kayi adi atumbisha Yehowa Nzambi? Bua tshinyi?
24 Mu tshisumbu tshia bena Kristo mudi bena mabaka ba bungi badi basombe mu ditalala. Mu mabaka aa bakaji badi banemeka babayabu bikole ne balume pabu mbanange bakaji babu ne badi babangata ne mushinga. Pashishe badi bakuatshishangana bua kuteka disua dia Yehowa pa muaba wa kumpala. Wewe musue kubuela mu dibaka, sungula muntu muimpe wa kuselangana nende, dilongolola bimpe bua nuenu kusomba mu ditalala, mu dinanga ne bua nuenu kuikala ne nsombelu udi utumbisha Yehowa Nzambi. Dîba adi, dibaka dienu nedinuambuluishe bua kushala mu dinanga dia Nzambi.
[Mêyi adi kuinshi]
a Bala nshapita 2 wa mukanda wa Nsapi wa disanka mu dîku, mupatula kudi Bantemu ba Yehowa.
b Bantu bakuabu ba kale bavua balamate Nzambi bavua ne bakaji ba bungi. Pavua Yehowa mu malanda ne bantu abu ne bena Isalele, wakabalekela basela bakaji ba bungi. Kavua mubanjije disela dia bakaji ba bungi to, kadi uvua mubelele mikenji bua kusombabu bimpe ne bakaji abu. Bena Kristo badi ne bua kumanya ne: Yehowa katshiena witabila basadidi bende bua kusela bakaji ba bungi to.—Matayo 19:9; 1 Timote 3:2.
[Kazubu/Bimfuanyi mu dibeji 114]
NTSHINYI TSHINDI NTEKEMENA KUDI MUNTU UTUASELANGANA NENDE?
Dîyi dia kulonda: ‘Bubidi buabu nebalue mubidi umue.’—Matayo 19:5.
Imue nkonko iudi ne bua kudiela
▪ Bua tshinyi mbimpe kuindila bua kuanji kushindama kumpala kua kubuela mu dibaka?—1 Kolinto 13:11; Matayo 19:4, 5.
▪ Nansha munkadi mukumbane bua kubuela mu dibaka, bua tshinyi mbimpe kuanji kuindilaku kabidi ndambu?—1 Kolinto 7:32-35.
▪ Meme musue kubuela mu dibaka, bua tshinyi mbimpe muntu ungasungula ikale muntu ukadi muenzele Yehowa mudimu ne lulamatu bidimu ndambu?—1 Kolinto 7:39.
▪ Mmunyi mudi mvese idi ilonda eyi mua kuambuluisha muanetu wa bakaji bua kujingulula ngikadilu idi mulume muimpe ne bua kuikala nayi?—Musambu 119:97; 1 Timote 3:1-7.
▪ Mmunyi mudi Nsumuinu 31:10-31 mua kuambuluisha muanetu wa balume bua kusungula mukaji muimpe?
[Tshimfuanyi mu dibeji 119]
Bantu ba bungi batu benza bimpe patubu basungula bua muntu muisatu ikale ku luseke luabu padibu batantshilangana