TSHITUPA TSHIA 8

Masiya udi umueneka

BIDIMU bipite pa 500 muprofete Danyele mumane kumanyisha mulayi, Gabaliele muanjelu wa Nzambi wakamuenekela nsongakaji mukuabu utshivua kamama wa mu ndelanganyi ya Mukalenge Davidi, diende Mariya. Gabaliele wakambila Mariya ne: “Muoyo au, wewe udibu baleje kalolo kapite bungi; Yehowa udi nebe.” (Luka 1:28) Kadi Mariya wakumvua buôwa. Muoyo wa Gabaliele uvua umvuija tshinyi?

Gabaliele wakamuambila ne: “Mariya lekela kutshina, bualu wewe udi mutokele Nzambi ku muoyo. Tangila, newimite difu, neulele muana wa balume, neumuinyike dîna ne: Yezu. Yehowa Nzambi neamupeshe nkuasa wa butumbi wa tatu wende Davidi . . . Bukalenge buende kabuakuikala ne ndekelu to.” (Luka 1:​30-33) Lumu luimpe be! Mariya uvua ne bua kulela Masiya, “kankanunuina” kavuabu balaye!

Tshidimu tshiakalonda, Yezu wakaledibua ku Beteleheme. Butuku abu muanjelu wakambila balami bavua muaba au ne: “Tangilayi! Ndi mulue kunumanyisha lumu luimpe lua disanka dinene . . . bualu mbanulelele lelu Musungidi mu tshimenga tshia Davidi, yeye udi Kristo Mukalenge.” (Luka 2:​10, 11) Pashishe dîku dia ba Yezu diakaya kusombela ku Nazaleta, kuakakolelaye.

Mu tshidimu tshia 29, tshidimu tshivua Masiya ne bua kumueneka, Yezu wakatuadija kuenzela Nzambi mudimu bu muprofete, pavuaye ne “bidimu bitue ku makumi asatu.” (Luka 3:23) Bantu ba bungi bakajingulula ne: Nzambi ke uvua mumutume. Bavua bamba ne: “Mbatujudile muprofete munene munkatshi muetu.” (Luka 7:​16, 17) Mmalu kayi avua Yezu ulongesha?

Yezu wakalongesha bantu bua kunanga ne kutendelela Nzambi: Wakamba ne: “Yehowa Nzambi wetu udi anu Yehowa umue; udi ne bua kunanga Yehowa Nzambi webe ne muoyo webe mujima ne anyima webe yonso ne lungenyi luebe luonso ne bukole buebe buonso.” (Mâko 12:​29, 30) Wakamba kabidi ne: “Udi ne bua kutendelela anu Yehowa Nzambi webe, ne yeye nkayende ke uudi ne bua kuenzela mudimu wa tshijila.”​—⁠Luka 4:⁠8.

Yezu wakabela bantu bua kunangangana: Wakamba ne: “Udi ne bua kunanga muntu nebe bu muudi mudinange.” (Mâko 12:31) Wakamba kabidi ne: “Malu onso anudi basue bua bantu banuenzele, nudi ne bua kubenzelawu penu. Ke tshidi mikenji ne mêyi a baprofete biamba.”​—⁠Matayi 7:⁠12.

Yezu wakambila bantu malu a Bukalenge bua Nzambi ne tshisumi tshionso: Wakamba ne: “Ndi ne bua kumanyisha lumu luimpe lua Bukalenge bua Nzambi mu bimenga bikuabu, bualu bakantuma bua bualu ebu.” (Luka 4:43) Bua tshinyi Bukalenge bua Nzambi budi ne mushinga wa bungi?

Mifundu minsantu idi ilongesha ne: Bukalenge bua Nzambi mmbulamatadi wa mu diulu wikala mua kukokesha pa buloba. Yezu Masiya ke Mukalenge wabu udi Nzambi muteke. Muprofete Danyele wakadianjila kumona mu diulu muvua Nzambi upesha Masiya ‘bukokeshi, butumbi ne bukalenge.’ (Danyele 7:14) Bukalenge ebu nebujadike mparadizu pa buloba bujima ne nebupeshe bantendeledi ba Nzambi muoyo wa tshiendelele. Etshi ki ndumu luimpe anyi?

[Kazubu mu dibeji 21]

Mmunyi muwandamuna?

• Ntshinyi tshivua Gabaliele muanjelu wa Nzambi muambile Mariya?

• Mmulayi kayi uvua mukumbane mu tshidimu tshia 29?

• Mmalu kayi avua Yezu mulongeshe?

• Bukalenge bua Nzambi ntshinyi? Ntshinyi tshiakumbajabu?

[Kazubu mu dibeji 21]

Yezu Masiya nnganyi?

Miaku ibidi eyi: “Masiya” ne “Kristo” idi yumvuija “Muela manyi,” mbuena kuamba ne: muntu udi Nzambi musungule bua kuenza mudimu kampanda. Nzambi wakapesha Yezu Masiya muoyo. Wakenza tshishima tshinene bua Yezu kuledibuaye kudi Mariya kakuyi diambuluisha dia tatu wa pa buloba.

Bua tshinyi bantu ba bungi bakitabuja Yezu? Bua amue malu adi alonda aa:

• Malongesha ende avua afumina mu Mifundu minsantu.

• Malongesha ende ne tshilejilu tshiende bivua bikoka bantu bavua banange bulelela ne buakane.

• Wakenza bishima bia bungi ne bukole bua kudi Nzambi.

• Wakakumbaja milayi ya bungi idi mu Mifundu minsantu.

[Tshimfuanyi mu dibeji 20, 21]

Gabaliele wakambila Mariya ne: neulele Masiya