Yelemiya kakalekela kuakula malu a Yehowa nansha

Bantu batu misangu mikuabu batunayila anyi batufikila munda patudi tubambila malu a Yehowa. Abi mbifuane kutujula muoyo wa kulekela kuamba malu a Nzambi. Ukadiku pebe mudiumvue nanku anyi?— Bible udi wakula bua nsongalume mukuabu uvua munange Yehowa kadi ukavua muambe kulekela bua kuamba malu a Yehowa. Dîna diende uvua Yelemiya. Tuanji tumonabi malu ende makuabu.

Pakavua Yelemiya nsongalume, Yehowa wakamuambila bua kudimuija bantu bua kulekelabu malu mabi. Yelemiya wakamona bualu abu bumukolele be; wakumvua kabidi buôwa. Ke yeye kuambila Yehowa ne: ‘Tshiena mumanye tshia meme kuakula to. Si ntshidi anu muana.’ Kadi Yehowa wakamuambila ne: ‘Kutshinyi to. Meme nenkuambuluishe.’

Nunku, Yelemiya wakabanga kudimuija bantu ne: bobu kabayi bashintuluke, nebabapeshe dinyoka. Buebe wewe, bantu bakenza tshivua Yelemiya mubambile atshi anyi?— Tòo! Bakamuseka, kumukuatshilabu ne tshiji tshikole. Bakuabu bine bajinga ne kumushipa! Udi umona ne: Yelemiya uvua mua kuikala mudiumvue bishi?— Wakumvua buôwa, yeye kuamba ne: ‘Tshiena ngakula kabidi bualu bua Yehowa nansha.’ Kadi wakalekela kubuamba anyi?— Tòo, kakalekela to! Yelemiya uvua munange Yehowa bikole bia kayi mua kulekela kuakula bualu buende nansha. Nunku, bu muvua Yelemiya kayi mulekele, Yehowa wakamukuba.

Tshilejilu, musangu mukuabu bantu babi bavua bele Yelemiya mu tshina tshile tshivua ne bitotshitotshi bia bungi. Kavuamu ne tshiakudia anyi mâyi nansha. Bantu abu bavua basue kushiyamu Yelemiya nanku bua afue. Kadi anu bua Yehowa, Yelemiya wakapanduka!

Tshilejilu tshia Yelemiya tshidi tshikulongeshaku tshinyi?— Nansha muvuaye umvua buôwa misangu mikuabu, kakalekela kuambila bantu bualu bua Yehowa to. Paudi wakula bua Yehowa, bantu badi mua kukuseka anyi kukukuatshila tshiji. Udi mua kubanga kumvua bundu anyi buôwa. Kadi kulekedi kuakula malu a Yehowa nansha. Yeye neakuambuluishe misangu yonso anu muvuaye muambuluishe Yelemiya.