Bukalenge buakokesha pa buloba bujima

Udiku mumanye Bukalenge butudi tuakuila muaba eu anyi?— Mmuomu, m’Bukalenge bua Nzambi, buikala mua kuvuija buloba ebu mparadizu. Udiku musue kumanya malu a bungi a Bukalenge ebu anyi?—

Bukalenge buonso ebu butu ne mfumuabu. Mukalenge utu ulombola bantu ba muaba udiye. Udiku mumanye Mukalenge wa Bukalenge bua Nzambi anyi?— Mukalenge au ke Yezu Kristo. Mmusombele mu diulu. Ukadi pa kukokesha bantu bonso ba pa buloba. Udiku mumone ne: pikala Yezu mua kukokesha buloba bujima, netuikale ne disanka anyi?—

Netuikale ne disanka kadiyi kuamba! Mu Mparadizu, bantu kabakuluishangana anyi kuelangana kabidi mvita to. Muntu yonso neikale munange muinende. Muntu nansha umue kakusama anyi kufua to. Mpofu neitabale, mpudi-matshi neyumvue ne balema nebanyeme ne nebatumpike. Muntu yonso neikale ne biakudia bungi tshianana. Nekuikale diumvuangana pankatshi pa nyama yoyi nkayayi ne pankatshi payi ne bantu. Bantu bakadi bafue nebabike. Ba bungi ba ku bantu balume ne bantu bakaji baudi mulonge malu abu mu broshire eu bu mudi: Lebeka, Lahaba, Davidi ne Eliya nebabike pabu. Udiku musue kumonangana nabu pikalabu mua kubika anyi?—

Yehowa mmukunange ne mmusue bua wikale ne disanka. Wewe utungunuka ne kulonga malu ende, umutumikila, newikale ne muoyo wa kashidi mu mparadizu mulengeja bimpe. Ke tshiudi musue anyi?—