Dîku dia ba Yezu mu luendu ditangile ku Yelushalema

Tudi mu muvu wa luya. Nanku, ntshikondo tshivua dîku dia Jozefe pamue ne balunda ne balela babu ne bua kuenza luendu luabu lua ku tshidimu batangile ku Yelushalema. Bavua bayaku bua tshibilu tshia Pasaka, anu muvua Mikenji ilomba. (Dutelonome 16:16) Kumbuka ku Nazaleta kupueka ku Yelushalema, nduendu lua kilometre mitue ku 120. Etshi ntshikondo tshia kayumbayumba ne disanka bua bantu bonso. Yezu ukavua mpindieu ne bidimu 12, udi ne muoyo kuulu kuulu, muikale ne disanka dia pa buadi bua tshibilu atshi ne bua mpunga wa kuya kabidi ku ntempelo.

Bua Yezu ne dîku diabu, Pasaka ki ntshibilu tshia tshianana tshia dituku dimue to. Dituku divua dilondela dia Pasaka divua ntuadijilu wa Tshibilu tshia Mampa kaayi mela Luevene tshia matuku muanda mutekete. (Mâko 14:1) Bavua batshiangata bu tshitupa tshia tshikondo tshia Pasaka. Luendu lua kumbuka kuabu ku Nazaleta, kushala mu Yelushalema, ne kupingana luvua luangata mbingu mitue ku ibidi. Kadi tshidimu atshi, luakangata matuku a bungi bua bualu kampanda budi butangila Yezu. Bualu abu mbua tshivuabu balue kumona pakavuabu bapingana bumbukila ku Yelushalema.

Pavua Jozefe ne Mariya mu luendu, bavua bela meji ne: Yezu uvua munkatshi mua balela ne balunda babu bavua benza luendu tshiapamue batangile ku nord. Kadi pavuabu batule mu njila bua butuku bukavua buila, kabakamumona to. Nanku badi benda bamukeba munkatshi mua badibu benze nabu luendu, kadi kabakamumona to. Kabakapeta muanabu muaba nansha umue to! Ke Jozefe ne Mariya kualukila ku Yelushalema bua kumukeba.

Bakamukeba dituku dijima kabayi bamupeta to. Nansha dituku dibidi kabena anu bamupeta to. Ndekelu wa bionso, badi basangana muanabu dituku disatu mu ntempelo uvua ne bibambalu bia bungi. Badi bamona Yezu musombe munkatshi mua bamue balongeshi bena Yuda. Udi uteleja, wela nkonko, ne ubakemesha bua lungenyi luende.

Mariya wakamuebeja ne: “Muananyi, bua tshinyi udi mutuenzele nunku? Mona, meme ne tatuebe tudi basumpakane bikole tuenda tukukeba.”​—Luka 2:48.

Yezu udi ukema bua muvuabu kabayi bamanye muaba uvuaye ne bua kuikala. Udi ubebeja ne: “Nuvua nunkebela tshinyi? Kanuvua bamanye ne: ndi ne bua kuikala mu nzubu mua Tatu wanyi anyi?”​—Luka 2:49.

Bu muapetshianganyibu mpindieu, Yezu wakapingana kuabu ku Nazaleta ne Jozefe ne Mariya ne utungunuka ne kubakokela. Uvua wenda ukola mu meji ne ku mubidi. Nansha mutshidiye muana, badi bamuanyisha kudi Nzambi ne kudi bantu. Bushuwa, Yezu mmushiye tshilejilu tshimpe katshia anu ku buana buende tshia kukeba malu a mu nyuma ne kabidi tshia kuleja baledi bende kanemu.