Bayidi banayi nebikale balobi ba bantu

Bantu ba mu Nazaleta bamane kukeba bua kushipa Yezu, wakaya mu tshimenga tshia Kapênuma, pabuipi ne Mbuu wa Galela, uvuabu babikila kabidi ne: “dijiba dia Genesaleta.” (Luka 5:1) Bualu ebu buvua bukumbaje mulayi wa buprofete uvua mu mukanda wa Yeshaya wa ne: bantu ba mu Galela bavua basombele pabuipi ne mbuu bavua ne bua kumona butoke bua bungi.​—Yeshaya 9:1, 2.

Eyowa, Yezu wakatungunuka ne kumanyisha mu Galela emu ne: “Bukalenge bua mu diulu mbusemene pabuipi.” (Matayi 4:17) Ke Yezu kupeta bayidi banayi. Bavua benze nende luendu kumpala, kadi pavuabu bapingane ne Yezu bafumina ku Yudaya, bakalukila ku mudimu wabu wa diloba. (Yone 1:35-42) Kadi mpindieu ntshikondo tshia kuikalabu ne Yezu dîba dionso bua abalongeshe mua kutungunuka ne kuenza mudimu wa diyisha pavuaye uya.

Pavua Yezu upitshila ku muelelu wa mbuu, wakamona Simona Petelo, muanabu Andele, ne bamue bena diabu balongolola tupamba tuabu. Yezu wakaya kudibu aku, kubuelaye mu buatu buvua Petelo, umulomba bua basemene mu mâyi. Pavuabu basemene kakese mu mâyi, Yezu wakasomba, kutuadijaye kulongesha misumba ya bantu bavua bunguile ku mpenga malu malelela a Bukalenge.

Pashishe, Yezu wakambila Petelo ne: “Semena muaba udi mâyi male, nuele tupamba tuenu bua kukuata mishipa.” Petelo wakandamuna ne: “Mulongeshi, tuvua batate butuku bujima ne katuvua bakuate kantu, kadi ku dîyi diebe, nempuekeshe tupamba.”​—Luka 5:4, 5.

Bakapuekesha tupamba tuabu ne kukuatabu mishipa mipite bungi, tupamba kutuadijatu kupandika! Bakabikila bena diabu bavua mu buatu pabuipi apu ne tshianza ne lukasa bua balue kubambuluisha. Mu minite mikese matu onso abidi akuwula ne mishipa mipite bungi, ianemesha bujitu, atuadija ne kudina. Pakamona Petelo bualu ebu, wakadiela panshi kumpala kua Yezu, wamba ne: “Mukalenge, umbuka kundi, bualu ndi muena mpekatu.” Yezu wakamuandamuna ne: “Lekela kutshina. Kutuadijila ku mpindieu newikale ukuata bantu ne muoyo.”​—Luka 5:8, 10.

Ke Yezu kuambila Petelo ne Andele ne: “Ndondayi, nennuvuije balobi ba bantu.” (Matayi 4:19) Wakambila kabidi balobi bakuabu babidi, Yakobo ne Yone, bana ba Zebedayi bia muomumue. Bobu pabu bakamulonda kabayi bajanguluka. Nunku bantu banayi aba bakalekela mudimu wabu wa diloba, kuluabu bayidi ba Yezu ba kumpala ba ku dîba ne ku dîba.