Yezu udi upuwisha tshipepele tshikole pa mbuu

Yezu mmuenze malu a bungi dituku edi, ne mmutshioke. Pakafikabu dilolo, wakambila bayidi bende ne: “Tuyayi dishiya dia mâyi,” divua dia muamua dia tshitupa tshia buloba bua Kapênuma.​—Mâko 4:35.

Tshitupa tshia buloba tshia Gelasa tshivua ku muelelu wa Mbuu wa Galela lua ku est. Bavua babikila kabidi tshitupa tshia buloba atshi ne: Dekapoli. Bimenga bia mu Dekapoli mmuaba uvua bilele bia bena Greke bitangalake bikole nansha muvuamu bena Yuda ba bungi.

Bantu bakamanya pakumbuka Yezu mu Kapênuma. Kuvua matu makuabu avua pa kutuadija kuya dia muamua dia mbuu. (Mâko 4:36) Bushuwa mâyi kaavua manene bikole bua kuasabuka to. Mbuu wa Galela uvua anu bu dijiba dinene dia mâyi matalale, divua bule bua kilometre mitue ku 21, ne butshiama bua kilometre mitue ku 12. Kadi kadivua diondoke bikole to.

Nansha muvua Yezu muntu mupuangane, uvua ne bua kuikala mutshioke bua muvuaye muyishe bikole. Bobu bamane kutuadija luendu pa mâyi, wakadiolola panyima pa buatu, kuteka mutu pa musamu, kulalaye.

Bayidi bende ba bungi bavua bendeshi banene ba buatu, kadi luendu alu kaluvua lupepele to. Mikuna mminyunguluke Mbuu wa Galela, ne mâyi aa avua misangu ya bungi ne luya lukole. Imue misangu, kapepe katalale ka ku mikuna kavua katuta, kasambakana ne luya lua pa mâyi, bikebesha diakamue tshipepe tshikole pa mbuu. Ke tshiakenzeka. Katupa kakese mavuala akatuadija kudikuma ku buatu. Budi butuadija ‘kuwula ne mâyi ne budi mu njiwu.’ (Luka 8:23) Nansha nanku, Yezu udi anu mulale!

Bendeshi ba buatu bakadienzeja bikole bua kuludika buatu, benza nanku bilondeshile dimanya divuabu nadi dia mua kupita mu bipepele bikole. Kadi musangu eu mbikole. Bu muvuabu ne buôwa bua kufua, bakabisha Yezu, bamuela dîyi ne: “Mukalenge, tupandishe, tudi tuamba kufua!” (Matayi 8:25) Bayidi bavua ne buôwa, bela meji ne: bakavua pa kudina!

Pakajuka Yezu, wakambila bapostolo ne: “Bua tshinyi nudi ne buôwa nunku, nuenu bena ditabuja dikese?” (Matayi 8:26) Pashishe Yezu kutumina tshipepele ne mbuu dîyi ne: “Shiii! Puwa!” (Mâko 4:39) Tshipepele tshikole etshi kuimana, ne mbuu kubatama. (Mâko ne Luka badi balonda muyuki wa dikema eu, banji baleja muvua Yezu mubatamije tshipepele tshikole mu tshishima, pashishe balua kuakula bua dipanga ditabuja dia bayidi.)

Elabi meji muvua bualu ebu mua kuikala bulenge mioyo ya bayidi! Mbamone mudi mbuu uvua muvuandulula kudi tshipepele tshikole utalala talalaa. Badi bumvua buôwa bua dikema. Bambilangana ne: “Eu nnganyi menemene? Badi bamutumikila too ne kudi tshipepele ne mbuu.” Badi bafika ku muelelu mukuabu wa mbuu kabayi bapete njiwu. (Mâko 4:41–5:1) Pamuapa matu makuabu avua pa mbuu avua malukile ku muelelu wa ku ouest.

Bidi bitukolesha patudi tumanya ne: Muana wa Nzambi udi ne bukole pa lupepele! Patumaye ntema yende pa buloba mu bukokeshi bua Bukalenge buende, bantu bonso nebikale mu bukubi bualu kakuakuikala tshipupu nansha tshimue tshienza buôwa to!