Mu Yelushalema bua Tshibilu tshia Nzubu ya ntenta

Yezu wakamanyika bikole mu bidimu bia panyima pa yeye mumane kutambula. Bena Yuda binunu bia bungi bavua bamone bishima biende, ne malu avuaye muenze avua matangalake bikole mu buloba buonso. Mpindieu, mu Tshibilu tshia Nzubu ya ntenta (anyi tshia Bitanda) mu Yelushalema, bantu ba bungi bavua benda bamukeba.

Bantu bavua bakula bua Yezu mu mishindu mishilangane. Bamue bavua bamba ne: “Mmuntu muimpe.” Bakuabu pabu bandamuna ne: “Ki mmuntu muimpe to. Udi upambuisha musumba wa bantu.” (Yone 7:12) Bavua bakule malu a bungi aa matuku a kumpala a tshibilu atshi. Kadi muntu nansha umue kavua ne dikima dia kuakuila Yezu mu bantu to, bualu bavua batshina tshivua bamfumu ba bena Yuda mua kuenza.

Pavuabu munkatshi mua tshibilu, Yezu wakamueneka mu ntempelo. Bantu ba bungi bakakema bua muvuaye ulongesha mu mushindu muimpe mutambe. Kavua mubuele mu tulasa tua ba Labi to, nunku bena Yuda bavua badiebeja ne: “Mmunyi mudi muntu eu ne dimanya dia Mifundu dia mushindu eu pende kayi mulonge tulasa?”​—Yone 7:15.

Yezu wakamba ne: “Malu andi ndongesha ki nganyi to, kadi nga udi muntume. Muntu yeye musue kuenza disua Diende, neamanye bikala dilongesha edi difumina kudi Nzambi anyi bingikala ngakula bilondeshile meme nkayanyi.” (Yone 7:16, 17) Malongesha a Yezu avua apetangana ne Mikenji ya Nzambi, nunku bidi bimueneka patoke ne: uvua ukeba butumbi bua Nzambi kadi ki mbuende to.

Pashishe Yezu wakamba ne: “Mose wakanupesha Mikenji, ki mmuomu? Kadi muntu nansha umue wa kunudi kena utumikila Mikenji ayi to. Nudi nukeba kunshipa bua tshinyi?” Bamue bantu ba mu musumba, pamuapa benyi bavua bafumine mu misoko mikuabu, kabavua bamanye tshivua tshipitakana to. Buabu buobu kabivua bia meji bua muntu kampanda ajinge bua kushipa mulongeshi wa nunku to. Nunku bakela meji ne: bu muvua Yezu muambe mêyi aa, kuvua anu bualu kampanda. Bakamba ne: “Udi ne demon. Udi ukeba kukushipa nnganyi?”​—Yone 7:19, 20.

Bulelela, tshidimu tshimue ne tshitupa kumpala, bamfumu ba bena Yuda bakajinga bua kushipa Yezu yeye mumane kuondopa muntu mulume kampanda dituku dia Nsabatu. Yezu udi wenza mudimu ne lungenyi kampanda ubeleshisha meji bua kuela meji abu mabi patoke. Udi ukoka ntema yabu uleja ne: bilondeshile Mikenji, bavua ne bua kutengula muana dituku dia muanda mukulu nansha diodi dikale dia Nsabatu. Pashishe udi webeja ne: “Bikalabu batengula muntu dituku dia nsabatu bua kubenga kushipa Mikenji ya Mose, nuenu nudi nunkuatshila tshiji tshikole bualu mvua muondope muntu mumvue bimpe menemene dituku dia nsabatu anyi? Lekelayi kulumbuluishangana bilondeshile tshimuenekelu, kadi nulumbuluishe ne dilumbuluisha diakane.”​—Yone 7:23, 24.

Bena mu Yelushalema bavua bamanye tshivua tshienzeka bakamba ne: “Muntu eu ke udi [bakokeshi] bakeba bua kushipa au, ki mmuomu? Kadi tangilayi! udi wakula kumpala kua bantu ne kabena bamuenza bualu. Bakokeshi mbafike ku dimanya bulelela ne: yeye ke Kristo anyi?” Kadi bua tshinyi bantu kabavua bitaba ne: Yezu uvua Kristo? Bakamba ne: “Tudi bamanye kudi muntu eu mufumine; kadi padi Kristo ulua, muntu kakumanya kudiye mufumine to.”​—Yone 7:25-27.

Diakamue anu ku ntempelo aku, Yezu wakandamuna ne: “Nuenu nudi bammanye meme ne bamanye kundi mufumine. Meme tshiena mudiluile mu meme nkayanyi to, kadi Yeye uvua muntume udiku bulelela, ne kanuena bamumanye to. Ndi mumumanye, bualu ndi muleji mpala udi ufuma kudiye, ne Yeye au ke uvua muntume.” (Yone 7:28, 29) Bantu bakajinga bobu bua kumukuata anyi kumuela mu buloko, peshi kumushipa bua muvua Yezu muambe mêyi aa patoke. Kadi dijinga diabu edi kadiakakumbana, bualu tshikondo tshia Yezu kufua katshivua tshianji kukumbana to.

Kadi bantu ba bungi bakitabuja Yezu muvuabi bikengela. Uvua muende pa mâyi, mubatamije bipepele, mudiishe bantu binunu bia bungi mu tshishima ne mampa makese ne mishipa, muondope babedi, muendeshe balema, mutabeje mêsu a bampofu, muondope bena nsudi ne mubishe too ne bafue. Eyowa, bivua bikumbane bua muvuabu bebeje ne: “Padi Kristo ulua, kakuenza bimanyinu bipite bidi muntu eu wenza to, ki mmuomu?”​—Yone 7:31.

Pakumvua Bafalese musumba wa bantu wamba mêyi aa, bobu ne bamfumu ba bakuidi bakatuma balami bua kukuata Yezu.