Yezu udi ufila mibelu bua mabanji

Pavua Yezu udia kua Mufalese, tshisumbu tshia bantu tshivua pa mbelu tshimuindile. Bantu bavua benza kabidi bia muomumue pavuaye mu Galela. (Mâko 1:33; 2:2; 3:9) Padiye mu Yudaya apa, bantu ba bungi mbasue kumumona ne kumuteleja, bikale ne mmuenenu mushilangane bikole ne wa Bafalese bavuaye udia nabu.

Tshidi Yezu wamba kumpala etshi tshidi ne diumvuija dia pa buadi bua bayidi bende, udi wamba ne: “Nudimukile luevene lua Bafalese ludi lubombo.” Yezu ukavua mubadimuije kumpala, kadi tshidiye umona ku mêsa a biakudia tshidi tshileja mudi mubelu eu ne mushinga. (Luka 12:1; Mâko 8:15) Bafalese bavua mua kuikala baleja muvuabu balamata Nzambi bua kusokoka malu abu mabi, kadi bavua njiwu ivua ikengela kuela patoke. Yezu udi umvuija ne: “Kakuena tshintu tshidi tshisokoka bimpe menemene tshiapanga kusokolodibua, ne kakuena bualu busokoka buikala kabuyi mua kumanyika to.”​—Luka 12:2.

Pamuapa bantu ba bungi bavua bunguile Yezu mbena Yuda bavua kabayi bamumvue ulongesha mu Galela. Nunku Yezu udi wambulula ngenyi minene ikavuaye muleje kumpala. Uvua wambila bantu bonso bavua bateleja ne: “Kanutshinyi badi bashipa mubidi, kadi panyima pa bualu ebu kabayi bakokesha kuenza bualu bukuabu.” (Luka 12:4) Anu muvuaye muenze kumpala, wakaleja muvuabi ne mushinga bua bayidi bende batekemene ne: Nzambi neabakumbajile majinga abu. Bavua kabidi ne bua kuitaba Muana wa muntu ne kumanya ne: Nzambi uvua mua kubambuluisha.​—Matayi 10:19, 20, 26-33; 12:31, 32.

Pashishe muntu kampanda wa mu musumba wa bantu wakamuambila lutatu luvuaye nalu ne: “Mulongeshi, ambila muanetu angabanyine panyi bumpianyi.” (Luka 12:13) Mikenji ivua yamba ne: muanabute uvua upeta bitupa bibidi bia bumpianyi, nunku kakuvua ne bua kuikala dikokangana to. (Dutelonome 21:17) Kadi bidi bimueneka ne: muntu eu uvua ujinga kupeta bintu bia bungi kupita bivua mikenji imuanyishila. Yezu wakabenga ne budimu buonso bua kuditua ku tshiende. Wakebeja ne: “Mulumiana, uvua munteke mulumbuluishi anyi mukoshi wa bilumbu pankatshi penu nuenu babidi nnganyi?”​—Luka 12:14.

Pashishe Yezu wakadimuija bantu bonso ne: “Kangulayi mêsu ne nudilame ku nkuka ya mishindu yonso, bualu nansha padi muntu ne bintu bia bungi, muoyo wende kawena ufumina ku bintu bidiye nabi to.” (Luka 12:15) Nansha muntu muikale ne bubanji bua mushindu kayi, kakufuaku tshikondo kampanda ne kubishiya bionso anyi? Yezu wakashindika bualu abu ne tshilejilu tshidi katshiyi kupua muoyo tshidi patshi tshileja mudibi ne mushinga bua kuikala ne dîna dimpe ku mêsu kua Nzambi etshi:

“Budimi bua mubanji mukuabu buvua bukuame bimpe. Nunku wakatuadija kuelangana meji munda muende ne: ‘Tshiena ne muaba wa kusangishila bia pa madimi anyi to, ngenze tshinyi mpindieu?’ Pashishe wakamba ne: ‘Nengenze nunku: nengupule mayeba anyi, nengibake a manene bikole, ne nensangishilamu ntete yanyi yonso ne bintu bianyi bionso, ne nendiambile ne: “Wewe udi ne bintu bimpe bia bungi bilama bua bidimu bia bungi; ikisha, diaku, nuaku, usanke.”’ Kadi Nzambi wakamuambila ne: ‘Wewe muntu mutshimbakane, badi bakulomba muoyo webe butuku ebu. Nunku, nnganyi udi ne bua kuangata bintu biuvua mulame?’ Ke mudibi bua muntu udi udilamina biuma, kadi kayi mubanji ku mêsu kua Nzambi.”​—Luka 12:16-21.

Bayidi ba Yezu ne bantu bakuabu bavua bamuteleja bavua mua kuenza malu mu mushindu mubi bua kukeba anyi kudikunguijila bubanji bua bungi. Anyi kuditatshisha bua malu a mu nsombelu kuvua mua kubabueja mu ditanaji bua kuenzela Yehowa mudimu. Ke bualu kayi Yezu wakambulula mibelu mimpe ivuaye mufile kukavua tshidimu tshijima ne tshitupa mu Muyuki wende wa pa mukuna ne:

“Lekelayi kuditatshisha bua mioyo yenu bua tshinuikala mua kudia anyi kuditatshisha bua mibidi yenu bua tshinuikala mua kuvuala. . . . Tangilayi bimpe nyunyi ya bikololo: Kayitu ikuna mamiinu anyi inowa; kayitu ne diyeba anyi nzubu wa kulamina bintu; kadi Nzambi udi uyidisha. Nuenu kanuena ne mushinga wa bungi kupita nyunyi anyi? . . . Tangilayi bimpe mudi bilongo bia kapapankole bikola: Kabitu bienza mudimu mukole anyi biluka manda; kadi ndi nnuambila ne: nansha Solomo mu butumbi buende buonso kavua muvuale bu tshimue tshia kudibi to. . . . Nunku lekelayi kukeba tshinuadia ne tshinuanua, ne lekelayi kuditatshisha ne dielakana . . . Tatu wenu mmumanye ne: nudi dijinga ne bintu ebi. . . . Tungunukayi ne kukeba Bukalenge buende, ne nebanusakidile bintu ebi.”​—Luka 12:22-31; Matayi 6:25-33.

Nnganyi wikala ne bua kukeba Bukalenge bua Nzambi? Yezu wakaleja ne: anu bantu bakese, mmumue ne: “kasumbu kakese ka mikoko” ka bena lulamatu ke kavua ne bua kuenza nunku. Panyima pa matuku bakalua kuleja ne: bantu abu bavua anu 144 000. Ntshinyi tshiapetabu? Yezu udi ubajadikila ne: “Tatu wenu mmuanyishe bua kunupesha Bukalenge.” Bantu aba kabavua ne bua kuimanyina mu dikeba dia bintu bia pa buloba bivua bivi mua kuiba to. Kadi mioyo yabu ivua ne bua kuikala pa “biuma bidi kabiyi bijika mu diulu,” muikalabu ne bua kukokesha ne Kristo.​—Luka 12:32-34.