Yezu wandamuna mfumu mubanji

Yezu utshidi anu wendakana mu Peleya uya mutangile ku Yelushalema. Nsongalume kampanda mubanji udi umulonda lubilu ne utua binu kumpala kuende. Muntu eu ‘ngumue wa ku bamfumu,’ pamuapa uvua wenza mudimu bu mulombodi mu nsunagoga kampanda anyi mmuena mu ku Tshilumbuluidi tshinene. Udi webeja ne: “Mulongeshi Muimpe, ndi ne bua kuenza tshinyi bua kupiana muoyo wa tshiendelele?”​—Luka 8:41; 18:18; 24:20.

Ke Yezu kumuandamuna ne: “Bua tshinyi udi umbikila ne: muimpe? Kakuena muntu udi muimpe pa kumbusha anu umue, Nzambi.” (Luka 18:19) Pamuapa nsongalume eu uvua utela muaku “muimpe” bu muanzu uvua ba-labi benza nawu mudimu. Nansha muvua Yezu mulongeshi muimpe, wakambila muntu eu ne: muanzu eu “Muimpe” udi ukumbanyina anu Nzambi.

Yezu wakamubela ne: “Wewe musue kubuela mu muoyo, tungunuka ne kutumikila mikenji.” Nunku nsongalume eu wakamuebeja ne: “Mmikenji kayi?” Yezu wakatela Mikenji itanu ya mu Mikenji dikumi eyi: dishipangana, dienda masandi, buivi, dijadika bualu bua mafi, ne dinemeka baledi. Pashishe wakakumbaja Mukenji uvua ne mushinga wa bungi eu: “Udi ne bua kunanga mukuebe muudi mudinange.”​—Matayi 19:17-19.

Muntu eu wakamuandamuna ne: “Ndi mutumikile malu onso aa, ntshinyi tshikuabu tshitshidi tshinshadile?” (Matayi 19:20) Uvua mua kuikala mumone ne: uvua ne bua kuenza bualu kampanda buimpe, mmumue ne: bua dikima bua yeye kushisha kupeta muoyo wa tshiendelele. Pakajingulula Yezu ne: muntu eu uvua muenze dilomba diende edi ne muoyo mujima, ‘wakumvua dinanga bua bualu buende.’ (Mâko 10:21) Kadi muntu eu uvua ne tshipumbishi kampanda.

Muntu eu uvua munange bintu biende bikole, ke Yezu kumuambila ne: “Nkukushadile tshintu tshimue: Ndaku, upane bintu biudi nabi, upeshe bapele, ne neupete biuma mu diulu; pashishe luaku, undonde.” Eyowa, bua muntu eu kulua muyidi wa Yezu, uvua ne bua kuabanyina bapele makuta ende; bapele aba bavua kabayi mua kumualujilawu. Ke muntu eu kujuka ne kuya mubungame, Yezu mushale mumutangile ne umumvuila luse. Bu muvua muntu eu munange bikole bubanji anyi “bintu bia bungi,” bivuaye nabi, biakamupangisha bua kupeta biuma bilelela. (Mâko 10:21, 22) Yezu wakamba ne: “Nebikale bikole bua bantu badi ne makuta kubuelabu mu Bukalenge bua Nzambi!”​—Luka 18:24.

Bayidi bakakema bikole bua mêyi aa ne bua tshivua Yezu mulue kuamba etshi: “Mu bulelela, mbipepele bua kamelu kupitshila mu dîsu dia kashingi ka kutela naku kupita mudi muntu mubanji mua kubuela mu Bukalenge bua Nzambi.” Bualu ebu buakasaka bayidi bua kumuebeja ne: “Nnganyi menemene udi mua kupandishibua?” Lupandu mbualu bukole menemene budi muntu kayi mua kupeta anyi? Yezu wakabatangila buludiludi wamba ne: “Malu adi bantu kabayi mua kuenza, Nzambi udi mua kuenza.”​—Luka 18:25-27.

Petelo wakaleja ne: bavua basungule bualu bushilangane ne buvua muntu mubanji eu musungule pakambaye ne: “Tangila! Tuetu tudi bashiye bintu bionso, bakulonde; nanku, ntshinyi tshikalaku buetu tuetu?” Yezu wakaleja tshipeta tshia ndekelu bua disungula dimpe divuabu benze wamba ne: “Mu tshikondo tshia difukulula, padi Muana wa muntu usomba mu nkuasa wende wa Bukalenge wa butumbi, nuenu badi bandonde nenusombe mu nkuasa ya bukalenge 12, nulumbuluisha bisa 12 bia Isalele.”​—Matayi 19:27, 28.

Bushuwa, Yezu uvua wakula bua matuku a pa buloba atshivua alua pikalabu mua kupingajilula nsombelu uvuaku mu budimi bua Edene. Petelo ne bayidi bakuabu nebapete difutu dia kukokesha ne Yezu pa buloba bukudimuna mparadizu, difutu didi ne mushinga kupita bualu kayi buonso buvuabu mua kudipangisha!

Kadi masanka onso kaavua a kupeta anu mu matuku atshivua alua to. Bayidi bende bakapeta amue a kudiwu diakamue. Yezu udi wamba ne: “Kakuena muntu udi mushiye nzubu anyi mukaji anyi bana babu anyi baledi bende peshi bana bende bua Bukalenge bua Nzambi wapanga kupeta misangu ya bungi menemene mu tshikondo etshi, ne mu ndongoluelu wa malu udi ulua, muoyo wa tshiendelele.”​—Luka 18:29, 30.

Eyowa, muaba onso uvua bayidi bende baya, bavua mu malanda makole ne mashême ne bena Kristo nabu kupita too ne bena mu mêku abu a ku tshilelelu. Bia dibungama, bidi bimueneka ne: nsongalume mubanji eu wakapangila diakalenga adi pamue ne difutu dia muoyo mu Bukalenge bua Nzambi mu diulu.

Yezu wakasakidila ne: “Kadi ba bungi badi ba kumpala nebikale ba ndekelu, ne ba ndekelu nebikale ba kumpala.” (Matayi 19:30) Uvua usua kuamba tshinyi?

Muntu mubanji eu uvua munkatshi mua bantu “ba kumpala,” bavua balombodi ba bena Yuda. Bu muvuaye utumikila Mikenji ya Nzambi bivua bimueneka ne: uvua mua kulua umue wa ku bayidi ba Yezu ne kuenza malu mimpe a bungi munkatshi mua bantu bavua balonde Masiya mulelela. Kadi wakateka bubanji ne bintu bivuaye nabi pa muaba wa kumpala mu nsombelu wende. Bantu ba tshianana ba pa buloba bobu bakamona muvua malongesha a Yezu malelela ne afikisha ku muoyo. Mu mushindu kampanda bavua “ba ndekelu” kadi badi mpindieu balue “ba kumpala.” Badi mua kuindila ne muoyo kuulu kuulu bua kusomba mu nkuasa wa Bukalenge mu diulu pamue ne Yezu ne kukokesha buloba bukudimuna mparadizu.