Adama ne Eva badi babenga kutumikila Nzambi

Dimue dituku pavua Eva nkayende, nyoka wakayukila nende. Wakamuambila ne: ‘Mbulelela ne: Nzambi mmunukandike bua kudia bimuma bia mitshi yonso anyi?’ Eva wakamuandamuna ne: ‘Tudi mua kudia bimuma bia mitshi yonso pakumbusha anu bia mutshi umue. Tuetu badie bimuma bia mutshi au netufue.’ Nyoka wakamba ne: ‘Kanuakufua to. Bushuwa, nuenu badie bimuma bia mutshi au, nenuikale bu Nzambi.’ Uvua muambe bulelela anyi? Tòo, uvua mushime. Kadi Eva wakitaba. Bu muvua Eva mushale anu mutangile tshimuma, tshiakamusamina muoyo. Wakadia tshimuma atshi, kupeshaye Adama pende. Adama uvua mumanye ne: bobu babenge kutumikila Yehowa, bavua ne bua kufua. Nansha nanku wakadia anu tshimuma atshi.

Ku ndekelu kua dituku adi, Yehowa wakayukila ne Adama ne Eva. Wakabebeja bua tshinyi bavua babenge kumutumikila. Eva wakela nyoka tshilumbu pambidi, Adama pende kuelaye Eva tshilumbu pambidi. Bu muvua Adama ne Eva babenge kutumikila Yehowa, wakabipata mu budimi; kutekaye banjelu ne muele wa mvita wa kapia ku tshibuelelu tshia budimi bua kubapangisha bua kupinganamu.

Yehowa wakamba bua eu uvua mushime Eva ne: bavua ne bua kumunyoka pende. Mu bulelela ki nnyoka uvua muyukile ne Eva to. Yehowa kavua mufuke nyoka mu mushindu wa yoyi kuakula to. Muanjelu mubi ke uvua muenze bua nyoka akule. Uvua muenze nunku bua kushima Eva. Badi babikila muanjelu eu ne: Satana Diabolo. Mu matuku atshilualua, Yehowa neabutule Satana bua katungunuki ne kushima bantu bua kuenzabu malu mabi to.