Yezu udi ulongesha bayidi bende mua kusambila

Malu onso avua Bafalese benza bavua baenza bua kudileja. Pavuabu benza bualu kampanda buimpe, bivua anu bua bantu babamone. Bavua basambila miaba ivua bantu mua kubamona. Bafalese bavua bakuata masambila male ku muoyo ne baambulula miaba ivua bantu mua kubumvua bu mudi mu nsunagoga ne mu masangu a njila. Ke bualu kayi bantu bakakema bikole pavua Yezu mubambile ne: ‘Kanuikadi nusambila bu Bafalese to. Badi bela meji ne: mêyi abu a bungi adi mua kuenza bua Nzambi abanyishe bikole, kadi kabiena nanku to. Disambila mbualu buebe ne Yehowa. Kuikadi wambulula malu anu amue amue au to. Yehowa mmusue bua umuambile muudi udiumvua menemene.

‘Nudi ne bua kusambila nunku: “Tatu wetu udi mu diulu, dîna diebe dijidibue. Bukalenge buebe bulue. Disua diebe dienzeke kabidi pa buloba muomumue ne mu diulu.”’ Yezu wakabambila kabidi ne: bavua ne bua kusambila bua biakudia biabu bia ku dituku, bua bababuikidile mpekatu yabu, ne bua malu makuabu adi atangila muntu ne muntu.

Yezu wakamba ne: ‘Kanulekedi kusambila to. Tungunukayi ne kulomba Tatu wenu Yehowa bintu bimpe. Muledi yonso utu musue kupesha muanende bintu bimpe. Muanebe yeye mukulombe diampa, neumupeshe dibue anyi? Yeye mukulombe mushipa, neumupeshe nyoka anyi?’

Pashishe Yezu wakumvuija dilongesha edi wamba ne: ‘Binuikala nuenu nudi bamanye mua kupesha bana benu bintu bimpe, Tatu wenu Yehowa udi mua kupanga kunupesha nyuma muimpe anyi? Nuenu tshienu nkulomba.’ Utu utumikila mubelu wa Yezu eu anyi? Wewe utu ulomba malu a mushindu kayi mu disambila?