Lufu lua Yezu ku Gologota

Bakuidi banene bakaya ne Yezu ku dibalasa dia nguvena. Pilato kubebeja ne: ‘Nudi nubanda muntu eu ne malu kayi?’ Bobu kuamba ne: ‘Udi udiamba mudiye mukalenge!’ Pilato wakakonka Yezu ne: “Wewe udi Mukalenge wa bena Yuda anyi?” Yezu kuandamuna ne: “Bukalenge buanyi ki mbua pa buloba ebu to.”

Pashishe Pilato wakatuma Yezu kudi Helode mulombodi wa mu Galela, bua kumona bikalaye mua kupeta bualu bua kumubanda nabu. Helode kavua mupete Yezu ne bualu bubi to, ke yeye kumupingaja kudi Pilato. Nunku Pilato wakambila bantu ne: ‘Nansha meme anyi Helode katuena basangane muntu eu ne bualu bubi to. Ndi mmulekelela.’ Bantu bakela mbila ne: ‘Mushipa! Mushipa!’ Basalayi bakela Yezu mfimbu, kumutuilabu mate, ne kumututabu. Bakamuasa tshifulu tshia mêba ku mutu bamuseka bamba ne: ‘Muoyo au, Mukalenge wa bena Yuda.’ Ke Pilato kuambila kabidi bantu ne: ‘Tshiena musangane muntu eu ne bubi nansha bumue to.’ Kadi bakela mbila ne: “Yeye anu ku mutshi!” Nunku Pilato wakamufila bua bamushipe.

Bakaya ne Yezu muaba uvuabu babikila ne: Gologota, kumupopelabu ku mutshi, ne kuwimanyikabu. Yezu wakasambila ne: ‘Tatu, bafuile luse, bualu ki mbamanye tshidibu benza to.’ Bantu bakaseka Yezu bamba ne: ‘Biwikala muana wa Nzambi tuluka ku mutshi aku! Udisungile.’

Muena tshibawu mukuabu uvuabu bakudike ku mutshi ku luseke luende wakamba ne: “Umvulukaku pawikala mu Bukalenge buebe.” Ke Yezu kumulaya ne: “Newikale nanyi mu Mparadizu.” Mu mapingaja, mîdima yakabuikila buloba munkatshi mua mêba asatu. Bamue bayidi bakimana pabuipi ne mutshi au, nansha Mariya mamuende wa Yezu. Yezu wakambila Yone bua kutabalela Mariya bienze bu ne: uvua mamuende yeye.

Ndekelu wa bionso, Yezu wakamba ne: “Bualu buakumbanyi!” Wakinyika mutu wende, kukuulaye muoyo. Dîba adi, buloba buakakanka bikole. Tshilamba tshia bujitu tshia mu ntempelo tshivuabu bakosolole natshi muaba munsantu ne muaba mutambe bunsantu tshiakapandika mu bitupa bibidi. Mfumu wa basalayi wakamba ne: ‘Bushuwa eu uvua muana wa Nzambi!’