Bitendelelu bia dishima bidi bipendesha Nzambi

Bikala Nzambi dinanga, bua tshinyi malu mabi a bungi mmenza kudi bitendelelu bidi bidiamba mudibi biamba Nzambi? Mu tshikoso, buonso buabi mbia dishima; bidi bipendesha Nzambi. Mmunyi mudibi bimupendesha? Mmunyi mudi Nzambi umvua? Neabienzele tshinyi?

1. Bua tshinyi malongesha a bitendelelu bia dishima adi apendeshisha Nzambi?

Bitendelelu bia dishima “[mbishintakaje] bulelela bua Nzambi ku dishima.” (Lomo 1:25) Tshilejilu, bitendelelu bia bungi ki mbilongeshe bena kuitabuja babi dîna dia Nzambi to. Pende Bible udi uleja ne: bantu badi ne bua kutela dîna Nzambi. (Lomo 10:13, 14) Bamfumu ba bitendelelu bakuabu batu bamba ne: padi bualu bubi buenzeka, ndisua dia Nzambi. Kadi adi ndishima. Nzambi katu ukebesha malu mabi nansha. (Balayi Yakobo 1:13.) Bia dibungama, mashimi a bitendelelu mmasemeje bantu kule ne Nzambi.

2. Bua tshinyi malu adi bitendelelu bia dishima bienza adi apendeshisha Nzambi?

Bitendelelu bia dishima kabitu bienzela bantu malu bu Nzambi to. Bible udi wamba ne: “Mpekatu [ya bitendelelu bia dishima] mmidiunguije mushiki too ne mu diulu.” (Buakabuluibua 18:5) Munkatshi mua bidimu nkama ya bungi, bitendelelu mbibuelakane mu malu a tshididi, mbitue mvita mpanda, ne mbikebeshe anyi mbitabe lufu lua bantu bungi kabuyi kubala. Bamue bamfumu ba bitendelelu badi ne nsombelu wa bena kantu ku bianza, ne batu balomba bena kuitabuja babu makuta bua bikale ne nsombelu au. Malu adibu benza aa adi ajadika ne: ki mbamanye nansha Nzambi to, ke bualu kayi kabena ne bukenji bua kuikala baleji mpala bende to.​—Balayi 1 Yone 4:8.

3. Mmunyi mutu Nzambi umvua bua bitendelelu bia dishima?

Bikala malu adi bitendelelu bia dishima bienza akufikisha tshiji, udi wela meji ne: Yehowa yeye udi mua kuikala umvua bishi? Mmunange bantu, ne udi umvua tshiji bua bamfumu ba bitendelelu badi bamupendesha ne bakengesha bena kuitabuja babu. Mmulaye ne: bitendelelu bia dishima nebibutudibue ne “[kabiakuikalaku] kabidi nansha.” (Buakabuluibua 18:21) Mu katupa kîpi emu, Nzambi neabutule bitendelelu bia dishima bionso.​—Buakabuluibua 18:8.

BUELA MU BUONDOKE

4. Nzambi katu wanyisha bitendelelu bionso to

Ba bungi batu bela meji ne: bitendelelu bidi anu bu njila mishilangane idi ifikisha yonso kudi Nzambi. Kadi mmuomu anyi? Balayi Matayi 7:13, 14, pashishe nuandamune lukonko elu:

• Ntshinyi tshidi Bible wamba bua njila udi ufikisha ku muoyo?

Tangilayi FILME, pashishe nuandamune lukonko ludi lulonda.

FILME: Katupa ka filme wa Nzambi udi witaba mishindu yonso ya dimutendelela anyi? (3:22)

• Bible udi wambaku ne: kudi bitendelelu bia bungi bidi bisankisha Nzambi anyi?

5. Bitendelelu bia dishima kabiena bidikija dinanga dia Nzambi to

Bitendelelu bia dishima bidi bipendesha Nzambi mu mishindu ya bungi. Dibuelakana diabi mu mvita ke bualu bubi butambe budibi bienza. Tshilejilu, tangilayi FILME. Pashishe nuandamune nkonko idi ilonda.

FILME: Mudimu wa bitendelelu mu mvita mibidi ya buloba bujima (2:22)

• Ntshinyi tshivua bitendelelu bia bungi bienze mu mvita mibidi ya buloba bujima?

• Mmunyi muudi umona tshivuabi bienze atshi?

Balayi Yone 13:34, 35 ne 17:16. Pashishe nuandamune nkonko eyi:

• Mmunyi mudi Yehowa umvua padi bitendelelu bibuelakana mu mvita?

• Bitendelelu bia dishima ke bidi bikebesha malu mabi a bungi. Mmalu kayi adi aleja ne: bitendelelu bia dishima kabiena bidikija dinanga dia Nzambi to?

6. Nzambi mmusue kupatula bantu mu bitendelelu bia dishima

Balayi Buakabuluibua 18:4,a pashishe nuandamune lukonko elu:

• Udi umvua bishi bua muudi mumanye ne: Nzambi mmusue kupandisha bantu badi bitendelelu bia dishima bipambuishe?

7. Tungunuka ne kulonga malu a Nzambi mulelela

Bitendelelu bia dishima bidi mua kunyanga mushindu uudi umona Nzambi anyi? Fuanyikijabi ne: muana kampanda udi ubenga kutumikila tatuende, umbuka kumbelu, ne utuadija kuenza malu mabi matambe. Tatu kena wanyisha bidi muanende au wenza to. Bua tshinyi ki mbimpe kuela tatu tshilumbu pambidi bua mudi muanende ntomboji au udituala?

• Mbia meji bua kuela Yehowa tshilumbu pambidi ne kulekela kulonga malu ende bua malu adi bitendelelu bia dishima bienza anyi?

TSHIA KUKUATA

Malongesha a bitendelelu bia dishima ne malu mabi matambe adibi bienza adi apendeshisha Nzambi. Nzambi neabutule bitendelelu bia dishima.

Diambulula

• Mmunyi muudi umvua bua malu adi bitendelelu bia dishima bilongesha ne bienza?

• Mmunyi mutu Yehowa umvua bua bitendelelu bia dishima?

• Nzambi neenzele bitendelelu bia dishima tshinyi?

BIA KUTANGILA KABIDI

Mona mishindu minene ibidi ya bitendelelu bitu kabiyi bisankisha Nzambi.

“Bitendelelu bionso bidi muomumue anyi? Bidi bifikisha bionso kudi Nzambi anyi?” (Tshiena-bualu tshia mu jw.org)

Bua tshinyi Yehowa mmusue bua tumutendelele pamue ne bakuabu?

“Bidi bikengela anu kuikala mu tshitendelelu anyi?” (Tshiena-bualu tshia mu jw.org)

Mumpele mukuabu wakumvua bibi be bua malu avua enzeka mu tshitendelelu tshivuaye! Kadi malu au kaakamupangisha bua kulonga bulelela bua Nzambi to.

“Tshivua mumpele mupatukile mu tshitendelelu tshivuaye” (Tabulukayi! 2/2015)

Munkatshi mua bidimu nkama ya bungi, bitendelelu mbishiminyine Nzambi malu. Malu au mmafikishe bantu ku dimona ne: Nzambi kena ubatabalela ne mmuena tshikisu. Mona bulelela budi butangila mashimi asatu a ku mashimi au.

“Mashimi adi asaka bantu bua kubenga kunanga Nzambi” (Tshibumba tshia Nsentedi 1/11/2013)