DILONGESHA DIA 24

Banjelu mbanganyi?

Bia pa mabeji

Yehowa mmusue bua tumanye dîku diende dia mu diulu. Mu dîku adi mutu banjelu badibu babikila ne: ‘Bana ba balume ba Nzambi.’ (Yobo 38:7) Bible udi wambaku tshinyi bua banjelu? Badi mua kutuenzela tshinyi? Banjelu bonso batu mu dîku dia Nzambi anyi?

1. Banjelu mbanganyi?

Yehowa wakafuka banjelu kumpala kua kufukaye buloba. Anu bu Nzambi, banjelu batu mu diulu; kabatu bamueneka to. (Ebelu 1:14) Banjelu batu miliyo ya bungi, ne bonso batu bashilangane. (Buakabuluibua 5:11) Batu “bakumbaja dîyi [dia Yehowa], batumikila tshidiye wamba.” (Misambu 103:20) Ku kale, kuvua misangu ivua Yehowa utuma banjelu bua kuambila bantu bende mêyi ende, bua kubambuluisha, ne kubasungila. Lelu, banjelu badi bafikisha bena Kristo kudi bantu badi bajinga kumanya Nzambi.

2. Satana ne bademon bende mbanganyi?

Banjelu bakuabu bakatombokela Yehowa. Wa kumpala wakamutombokela ke “udibu babikila ne: Diabolo ne Satana, udi upambuisha ba pa buloba bonso.” (Buakabuluibua 12:9) Satana uvua ukeba ba kukokeshaye, ke kusakaye Adama ne Eva ku ditombokela Nzambi; kuluaye kabidi kubueja banjelu bakuabu mu buntomboji abu. Banjelu batomboke abu ke badibu babikila ne: mbademon. Yehowa wakabipatshisha mu diulu e kuedibuabu pa buloba. Nebabutudibue.—Balayi Buakabuluibua 12:9, 12.

3. Satana ne bademon mbasue kutupambuisha mushindu kayi?

Satana ne bademon badi bapambuisha bantu ba bungi ne malu a mîdima adi tshilele tshibi tshia kubuelakana ne nyuma mibi. Tshilejilu, kudi bantu badi baya kudi bena mbuku ya mitoto, kudi bambi ba malu atshilualua, kudi bena lumona, ne kudi banganga. Bakuabu badi bakeba ngondapilu idi mibuelakane ne malu a mîdima. Mbitabijije kabidi bavule dishima dia ne: badi mua kuyukila ne bafue. Kadi Yehowa udi utudimuija ne: “Kuyi kudi bena mbuku, ne kuebeji malu kudi bantu batu bamba malu atshilualua.” (Lewitiki 19:31) Mmutudimuije nanku bua kutukuba kudi Satana ne bademon. Mbaluishi ba Nzambi, ne mbasue kutuenzela bibi.

BUELA MU BUONDOKE

Mona malu mimpe atu banjelu benza, njiwu idi nayi malu a mîdima, ne mutudi mua kudikuba kudi Satana ne bademon.

Muanjelu ulombola Bantemu ba Yehowa babidi badi bayisha ku nzubu ne ku nzubu.

4. Banjelu batu bambuluisha bantu bua bamanye Yehowa

Banjelu ba Nzambi kabatu bayisha bantu buludiludi to. Badi mua kufikisha batendeledi ba Nzambi kudi bantu badi basue kumumanya. Balayi Buakabuluibua 14:6, 7, pashishe nuandamune nkonko eyi:

Bua tshinyi tudi dijinga ne diambuluisha dia banjelu bua kuyisha?
Paudi umvua ne: banjelu badi mua kutufikisha kudi bantu badi bajinga kumvua malu a mu Bible, bidiku bikukankamija anyi? Bua tshinyi?

Bintu kabukabu bia malu a mîdima ne a nyuma mibi, bu mudi tshibayabaya tshia dibukila malu, ne lumuenu lua bena mbuku, mukanda wa bakishi, tuarte tua lubuku, bana ba bitetela bia malu a mipongo, musenga wa manananshi, bijimba, ne bintu bikuabu bia manga.

5. Benga malu a mîdima

Satana ne bademon bende mbaluishi ba Yehowa. Mbaluishi betu petu. Balayi Luka 9:38-42, pashishe nuandamune lukonko elu:

Mmalu kayi atu bademon benzela bantu?

Katuena ne bua kubuejija bademon mu malu etu to. Balayi Dutelonome 18:10-12, pashishe nuandamune nkonko eyi:

Bademon batu bajinga kubuelakana netu anyi kutunyanga mushindu kayi? Mbilela kayi bia bademon bitu muaba unudi basombele?
Buebe wewe, mbimpe mudi Yehowa utukandika malu a mîdima anyi? Bua tshinyi?

Tangilayi FILME udi muaba eu, pashishe nuandamune nkonko idi ilonda.

FILME: “Kandamenayi Diabolo” (5:02)

Buebe wewe, katshiseba kavua Palesa musuike muanende ku diboko kavua ne bubi anyi? Bua tshinyi?
Bivua bikengela Palesa enze tshinyi bua kudikuba kudi bademon?

Bena Kristo balelela batu anu bakandamena bademon. Balayi Bienzedi 19:19 ne 1 Kolinto 10:21, pashishe nuandamune lukonko elu:

Bua tshinyi mbimpe wewe kuosha anyi kushipa kantu konso kaudi naku kadi kapetangana ne malu a mîdima?

Mamu wosha bintu biende bia malu a mîdima.

6. Tshimuna mvita iudi nayi ne Satana ne bademon

Satana ke mfumu wa bademon. Kadi udi ulombola banjelu bonso ba lulamatu yeye mmfumu wa banjelu, Mikaele: dîna dikuabu dia Yezu. Mikaele udi ne bukole kayi? Balayi Buakabuluibua 12:7-9, pashishe nuandamune nkonko eyi:

Paudi ufuanyikija Mikaele ne banjelu bende ne Satana ne bademon, mbanganyi badi ne bukole kupita bakuabu?
Buebe wewe, bayidi ba Yezu badi ne bua kutshina Satana ne bademon bende anyi?

Udi mua kutshimuna mvita iudi uluangana ne Satana ne bademon. Balayi Yakobo 4:7, pashishe nuandamune lukonko elu:

Mmunyi muudi mua kudikuba kudi Satana ne bademon?

BAMUE BATU BAMBA NE: “Kunaya manaya anyi kumona filme ya malu a mîdima ki nkubi to! Owu mmanaya patupu.”

Nku tshinyi kudi ngelelu wa meji au muikale ne njiwu?

TSHIA KUKUATA

Banjelu ba Yehowa batu batuambuluisha. Satana ne bademon bende mbaluishi ba Yehowa, ne batu bapambuisha bantu ne malu a mîdima.

Diambulula

Mmunyi mutu banjelu ba Yehowa bambuluisha bantu bua bamumanye?
Satana ne bademon bende mbanganyi?
Bua tshinyi udi ne bua kulekela tshintu tshionso tshia malu a mîdima?

Tudi bajikije dilongesha edi mu dia:

Tshipatshila

Dikonkonona umone ni udiku ne bintu bidi mu diumvuangana ne malu a mîdima, nunku ulombe Yehowa meji a tshiudi mua kuenza nabi.

Tshikuabu:

Tshipatshila tshiebe tshikuabu

BIA KUTANGILA KABIDI

Mona tshidi tshijadika ne: Yezu ke Mikaele mfumu wa banjelu.

“Mikaele mfumu wa banjelu nnganyi?” (Tshiena-bualu tshia mu jw.org)

Mona bijadiki bia ne: Diabolo ki mbubi anyi tshikadilu tshia bubi patupu munda muetu to.

“Diabolo utuku menemene anyi?” (Tshiena-bualu tshia mu jw.org)

Mona muvua mamu mukuabu musuluke ku bupika bua bademon.

“Wapetshi tshipatshila tshia muoyo wende” (Tshibumba tshia Nsentedi, 1/7/1993)

Mona mudi Satana udinga bantu ne malu a mîdima.

“Bulelela pa bidi bitangila majimbu, mupongo ne bumpaka-manga” (Njila wa muoyo wa tshiendelele, tshitupa 5)