Lufu lua Yezu ludi mua kutupandisha mushindu kayi?

Tutu tuenza mpekatu, tukenga, ne tufua bualu Adama ne Eva (mulume ne mukaji ba kumpala) bakabenga kutumikila Nzambi.a Nansha nanku, kuetu ki nkujike to. Yehowa mmutulongoluele njila wa tuetu kupandukila ku mulawu wa mpekatu ne lufu au mu Muanende Yezu Kristo. Bible udi wamba ne: padi Yezu mufue, mmufile tshia kupikulangana natshi. Tshia kupikulangana natshi ntshintu tshifuta bua kukuula muntu uvuabu bakuate. Tshintu tshivua Yezu yeye mufute mmushinga wa muoyo wende mupuangane wa buntu. (Balayi Matayi 20:28.) Pavua Yezu muanyishe bua kulekela bukenji buvuaye nabu bua kushala ne muoyo kashidi pa buloba, mmutukanguile njila wa tuetu kupetuluila bionso bivua Adama ne Eva bajimije. Yezu mmuleje kabidi ne: yeye ne Yehowa mbatunange bikole. Dilongesha edi nedikupeteshe kabidi dianyisha dia bungi dia bualu bua lufu lua Yezu.

1. Lufu lua Yezu ludi lutuambuluisha lelu mushindu kayi?

Mutudi bena mpekatu, tudi tuenza malu a bungi adi anyingalaja Yehowa. Nansha nanku, tuetu banyingalale banyingalelamu bua mpekatu yetu, balombe Yehowa bua atubuikidilaku mu dîna dia Yezu Kristo, ne badienzeje bikole bua kubenga kuenzulula bilema bietu abi, netudie bulunda bukole ne Nzambi. (1 Yone 2:1) Bible udi wamba ne: “Kristo wakafua musangu umue bua kashidi bua mpekatu, muntu muakane bua bantu badi kabayi bakane, bua kunulombola kudi Nzambi.”​—1 Petelo 3:18.

2. Lufu lua Yezu nelutuambuluishe kumpala eku mushindu kayi?

Yehowa wakatuma Yezu bua afile muoyo wende mupuangane wa buntu “bua muntu yonso udi uleja ditabuja [kudi Yezu] kabutudibu, kadi apete muoyo wa tshiendelele.” (Yone 3:16) Anu bua tshivua Yezu muenze atshi, matuku makese aa Yehowa neajimije bintu bibi bionso bidi buntomboji bua Adama bukebeshe. Mmumue ne: tuetu bitabuje mulambu wa Yezu, netupete mushindu wa kushala ne muoyo kashidi pa buloba ebu bukudimuna Mparadizu!​—Yeshaya 65:21-23.

BUELA MU BUONDOKE

3. Lufu lua Yezu ludi lutusulula ku bupika bua mpekatu ne lufu

FILME: Bua tshinyi Yezu wakafua?​—Tshitupa 1 (2:01)

• Ndiakalenga kayi divua Adama mujimije pavuaye mutombokele Nzambi?

Balayi Lomo 5:12, pashishe nuandamune lukonko elu:

• Mpekatu wa Adama mmukuenzele tshinyi?

Balayi Yone 3:16, pashishe nuandamune lukonko elu:

• Yehowa uvua mutume Muanende pa buloba bua tshinyi?

1. Adama mmuntu uvua mupuangane wakatombokela Nzambi, e kubuejijaye bantu mu njila wa mpekatu ne lufu

2. Yezu mmuntu uvua mupuangane wakatumikila Nzambi, e kubuejijaye bantu mu njila wa bupuangane ne muoyo wa tshiendelele

4. Lufu lua Yezu ludi mua kuambuluisha bantu bonso

FILME: Bua tshinyi Yezu wakafua?​—Tshitupa 2 (2:00)

• Mmunyi mudi lufu lua muntu umuepele mua kuambuluisha bantu bonso?

Balayi 1 Timote 2:5, 6, pashishe nuandamune lukonko elu:

• Adama mmuntu uvua mupuangane wakatubuejija mu njila wa mpekatu ne lufu. Yezu uvua pende muntu mupuangane. Mmu ngumvuilu kayi muakafilaye “tshia kupikulangana natshi tshidi tshikumbanangane”?

5. Tshia kupikulangana natshi ndipa didi Yehowa mukupeshe

Balunda ba Yehowa badi bangata tshia kupikulangana natshi bu dipa didiye mupeshe yonso wa kudibu. Tshilejilu, balayi Galatiya 2:20, pashishe nuandamune lukonko elu:

• Ntshinyi tshidi tshileja ne: mupostolo Paulo uvua wangata tshia kupikulangana natshi bu dipa divuabu bamupeshe yeye?

Pavua Adama muenze mpekatu, yeye ne tuetu ndelanganyi yende yonso tuakapia tshibawu tshia lufu. Kadi Yehowa wakatuma Muanende bua afue bua tuetu nebe kupeta diakalenga dia kushala ne muoyo kashidi.

Paudi wenda ubala mvese eyi, fuanyikijabi muvua Yehowa mua kuikala umvua pavuaye umona Muanende ukenga. Balayi Yone 19:1-7, 16-18, pashishe nuandamune lukonko elu:

• Tshiudi wewe umvuaku ntshinyi bua malu adi Yehowa ne Yezu bakuenzele?

TSHIA KUKUATA

Lufu lua Yezu ndutukanguile njila wa Yehowa kutubuikidila mpekatu yetu; luolu ndudi lutupetesha ditekemena dia kushala ne muoyo kashidi.

Diambulula

• Yezu wakafua bua tshinyi?

• Mmu ngumvuilu kayi muvua muoyo mupuangane wa buntu wa Yezu muikale tshia kupikulangana natshi tshidi tshikumbanangane?

• Lufu lua Yezu ludi mua kukuambuluisha mushindu kayi?

BIA KUTANGILA KABIDI

Mona tshidibu babikidila muoyo mupuangane wa buntu uvua Yezu mufile bu tshia kupikulangana natshi.

“Nku tshinyi kudi mulambu wa Yezu muikale ‘tshia kupikula natshi bantu ba bungi’?” (Tshiena-bualu tshia mu jw.org)

Mona tshitudi ne bua kuenza bua kupandishibua.

“Mmushindu kayi udi Yezu upandisha bantu?” (Tshiena-bualu tshia mu jw.org)

Yehowa udi mua kubuikidilangana nansha mpekatu mipite bubi anyi?

“Mandamuna a nkonko ya mu Bible” (Tshibumba tshia Nsentedi, 1/5/2013)

Mona muvua dimanya dia malu a mulambu wa Kristo diambuluishe muntu bua kushintulula bikadilu biende.

“Tshitu kabidi ku bupika bua tshikisu to” (Tshiena-bualu tshia mu jw.org)