DILONGESHA DIA 53
Mushindu wa kupita kapepe udi Yehowa wanyisha
Yehowa ‘nNzambi wa disanka.’ (1 Timote 1:11) Mmusue bua tuikale ne disanka ne tutunke ne muoyo. Udi usanka patudi tuangata dikisha ku mudimu bua kupita kapepe. Mu dilongesha edi, netumone mutudi mua kupita kapepe mu mushindu muimpe udi utusankisha ne usankisha kabidi Yehowa.
1. Ntshinyi tshitudi ne bua kuelela meji patudi tusungula mishindu ya dipita kapepe?
Ntshinyi tshiutu musue kuenza pautu upita kapepe? Bamue batu basue kusomba mu ditalala kumbelu babala mukanda, bateleja mijiki, bamona filme, anyi babuela ku Enternete. Bakuabu batu basue kuenza malu ne balunda babu bu mudi: kunyema lubilu, kunaya ndundu, anyi kuowela. Nansha tuetu basue kuenza malu kayi, mbimpe tudienzeje bua ikale malu “adi Mukalenge wanyisha.” (Efeso 5:10) Mbia mushinga bua kuenza nanku bualu mishindu ya bungi ya dipita kapepe idi ne malu adi Yehowa mukine bu mudi tshikisu, tshiendenda tshia masandi, anyi malu a mîdima. (Balayi Misambu 11:5.) Ntshinyi tshiatuambuluisha bua kusungula mishindu ya dipita kapepe bimpe?
Tuetu basungule balunda badi banange Yehowa, badi mua kutusaka bua kuenza malu mimpe ne kusungula mushindu muimpe wa kupita kapepe. Anu mutuvua bamone mu dilongesha dia 48, “muntu udi wenda ne bena meji nealue muena meji.” Kadi tuetu tusomba ne bantu badi kabayi banange mikenji ya Nzambi ‘netukenge.’—Nsumuinu 13:20.
2. Bua tshinyi mbimpe tutabalele bungi bua dîba ditudi tupitshisha bua kupita kapepe?
Nansha tuetu basungule mushindu muimpe wa kupita kapepe, mbimpe tutabalele kabidi bua katupitshishi dîba dia bungi to. Tshianana, tudi mua kupangila dîba dia kuenza malu adi ne mushinga wa bungi. Bible udi utukankamija bua tuenze “malu bimpe bitambe ne dîba [dietu].”—Balayi Efeso 5:15, 16.
BUELA MU BUONDOKE
Mona muudi mua kuangata mapangadika mimpe a mua kupita kapepe.
3. Epuka mishindu mibi ya dipita kapepe
Bua tshinyi tudi ne bua kusungula mishindu ya dipita kapepe bimpe menemene? Tangilayi FILME, pashishe nuandamune nkonko idi ilonda.
Nku tshinyi kudi manaya a mu Lomo wa kale mafuanangane ne imue mishindu idi bantu bapita kapepe lelu?
Mu filme eu, dipita kapepe divua dilongeshe Danny tshinyi?
Balayi Lomo 12:9, pashishe nuandamune lukonko elu:
Mmunyi mudi mvese eu mua kukuambuluisha bua kusungula mishindu mimpe ya dipita kapepe?
Mmalu kayi adi Yehowa mukine? Balayi Nsumuinu 6:16, 17 ne Galatiya 5:19-21. Panudi nubala mvese ne mvese yonso, nuandamune lukonko elu:
Mu malu adibu batele mu mvese eyi, ngepi atu atamba kumueneka mu mishindu ya dipita kapepe lelu?
Mua kusungula mushindu wa dipita kapepe bimpe
Dikonka ne:
Ntshinyi? Didi ne tshintu tshidi Yehowa mukine anyi?
Ndîba kayi? Didi dimpangisha bua kuenza malu adi ne mushinga wa bungi anyi?
Nnganyi? Didi dimfikisha ku ditamba kusomba ne bantu badi kabayi banange Yehowa anyi?
Mbimpe tuenze muetu muonso bua kubenga kusemena pabuipi ne njiwu. Ke bualu kayi tudi ne bua kuepuka dipita kapepe dionso ditudi tumona ne: ndibi
4. Enza malu bimpe bitambe ne dîba diebe
Tangilayi FILME, pashishe nuandamune lukonko ludi lulonda.
Nansha muvua muanetu utudi bamone mu filme eu kayi utangila bintu bibi, kadi ndutatu kayi luvuaye nalu?
Balayi Filipoyi 1:10, pashishe nuandamune lukonko elu:
Mmunyi mudi mvese eu mua kutuambuluisha bua tumanye bungi bua dîba ditudi mua kupitshisha patudi tupita kapepe?
5. Sungula mishindu mimpe ya dipita kapepe
Nansha mudi imue mishindu ya dipita kapepe kayiyi isankisha Yehowa, kudi mikuabu ya bungi idi imusankisha. Balayi Muambi 8:15 ne Filipoyi 4:8, pashishe nuandamune lukonko elu:
Mmishindu kayi mimpe ya dipita kapepe iutu munange?
Udi mua kupita kapepe mu mushindu muimpe
BAMUE BATU BAMBA NE: “Kutangila malu a tshikisu, a masandi, anyi a mîdima pandi mpita kapepe kakuena ne bualu to, bualu ki mmeme udi uenza to.”
Wewe udi wamba tshinyi?
TSHIA KUKUATA
Yehowa mmusue bua tusungule mishindu mimpe ya dipita kapepe idi isankisha.
Diambulula
Mmishindu kayi ya dipita kapepe idi bena Kristo ne bua kuepuka?
Bua tshinyi tudi ne bua kutabalela bungi bua dîba ditudi tupitshisha patudi tupita kapepe?
Bua tshinyi udi musue kusungula mishindu ya dipita kapepe idi isankisha Yehowa?
BIA KUTANGILA KABIDI
Nnganyi udi ne mudimu wa kutusunguila mishindu ya dipita kapepe?
Mona muudi mua kuangata mapangadika mimpe pa bidi bitangila dipita kapepe.
“Mushindu uutu ujikija lutetuku udiku ukuambuluisha anyi?” (Tshibumba tshia Nsentedi, 15/10/2011)
Bala malu adi mu “Ngakalekela lukinu,” umone tshivua tshisake muntu kampanda ku dishintulula mushindu uvuaye upita kapepe.
“Bible udi ushintulula nsombelu ya bantu” (Tshibumba tshia Nsentedi, 1/7/2010)
Mona muvua mamu mukuabu muangate dipangadika dimpe pa bidi bitangila mishindu ya dipita kapepe idi ne malu a mîdima.