Bansonga​—mbinganyi binudi nuipatshila?

“Unyeme nkuka ya bunsonga, kadi wipatshile buakane, ditabuja, dinanga, ditalala, pamue ne aba badi babila Mukalenge ne mutshima mukezuke.”​—2 TIMOTE 2:22.

1. Ditekemena dietu bua bansonga badi munkatshi muetu didi tshinyi?

“BANTEMU BA YEHOWA,” ke muakamba tshikandakanda tshia ba-pentekotiste bena ditunga dia Suède tshia Dagen (Dituku), “ntshisumbu tshidi tshiakidila bungi buvule bua bantu bapiabapia ku tshidimu tshionso ne tshikale ne musumba munene wa bansonga.” Imue misangu, udi umue wa ku musumba eu wa bansonga bena bukezuke ne batshinyi ba Nzambi. Kubangila ku buana buebe udi mukoleshibue mu njila wa buena-nkristo, peshi wewe muine uvua mudiumvuile mukenji wa Bukalenge ne muwanyishe. Mu mishindu yonso, tudi ne disanka bua muudi usanganyibua munkatshi muetu. Ne tudi batekemene se: neutungunuke ne kulonda njila wa buakane, anu muakenza bansonga bena nkristo balamatshi ba mikenji ba mu siekele wa kumpala. Mêyi a mupostolo Yone mmakulamika menemene: “Nudi ne bukole ne dîyi dia Nzambi didi munda muenu ne nuatshimunyi mubi.”​—1 Yone 2:14.

2. Mu “tshikondo tshia masanka a bunsonga,” ntshinyi tshidi mua kutatshisha bua kulonda njila wa buakane?

² Mu tshikondo tshietu etshi, bansonga bavule bena nkristo​—eyowa, tshitupa tshinene tshia kudibo—​badi batantamena matetshibua a bena bulongolodi ebu. Kadi, imue misangu utu utshinka se: ki mbipepele bua kunanukila mu njila eu to. Pautshidi mu “tshikondo tshia masanka a mu bunsonga,” bintu bipiabipia kabukabu bidi mua kukusamina muoyo ne udi mua kuikala ne mpampakenu mikole. (1 Kolinto 7:36) Kabidi, pamu’apa majitu a kukumbaja mu kalasa, ku nzubu ne mu tshisumbu atu amueneka mapite bukole. Kudi kabidi buenzeji bubi bua kudi Satana Diabolo muine. Bu mudiye mupangadije mu mishindu yonso bua kupambuisha bantu bungi buvule, udi uluisha aba badi bakumbane mua kupona bipepele​—anu muakenzaye mu budimi bua Edene. Kakatumika ne bukole buende bua ditabijijangana malu ku bukole kudi eu ukavua ne bidimu bia bungi, ukavua ne dimanya divule, mbuena kuamba ne: Adame, kadi wakaya kudi Eve, utshivua ne bidimu bikese ne muikale ne dimonamona dia mianda dishadile. (Genese 3:1-5) Kunyima kua siekele mivule, Satana wakenza bia muomumue mu tshisumbu tshia bena nkristo ba ku Kolinto, bavua kabayi banji kumonamona mianda. Ke padi mupostolo Paulo wamba ne: “Ndi ntshina bua se: mu mushindu kampanda peshi kansanga, anu muvua Satana mudinge Eve ku budimu buende, tshieledi tshienu tshia lungenyi katshivu kunyanguka ne kusesuka ku bululame ne budipope bia kudi Kristo.”​—2 Kolinto 11:3.

3, 4. Tela bimue biamu bia mudimu bidi Satana Diabolo utumika nabi bua kupambuisha bansonga, ne ntshinyi tshidi mua kubafikila?

³ Bia muomumue lelu’eu, baledi benu bena nkristo badi pamu’apa ne buowa bualu buenu. Katuena tuamba mudibo bela meji se: nudi bakokibue ku bubi, kadi, ku dimonamona diabo dia mianda mbamanye se: nangananga bansonga batu bapona bipepele ku “buenzeji bubi” bua Satana. (Efeso 6:11) Pamutu pa kuleja njiwu yawu patoke, mateyi a Satana mmakaja mushindu wa kuikalawu alobesha ne kuikalabo baalakena. Mu mushindu mulenga mutambe, televizion udi uleja dinanga dia bintu bia ku mubidi, tshiendenda tshia masandi, dibunda dia bibawu dikolesha ne ditendelela dia mpingu bu dijikija lutetuku patupu. Bieledi bia lungenyi bitekete bia bansonga bidi mua kuwujibua tente ne bintu ebi bidi kabiyi ‘bilelela, bikumbanyine kutabalela, biakane, bia bupeluke, ne bia kunanga.’ (Filipoi 4:8) Buenzeji bua balunda ntshiamu tshikuabu tshikole tshidi Satana utumika natshi. Balunda bebe badi mua kukuenzeja muabu muonso bua wewe kuidikija nsombelu wabu, mvuadilu wabu ne nkoselu wabu wa nsuki. (1 Petelo 4:3, 4) Dimue dituku mufundi wa bikandakanda William Brown wakafunda ne: “Bikalaku Nzambi kampanda bua bansonga, pa kumusha wa bena tshisumbu kayi tshionso tshia malu a Nzambi, bushuwa, nNzambi wa didikija bakuabu ne mianda ya mu nsombelu. . . . Bua bansonga, kuikala mushilangane nkubi kupite lufu.” Nsongakaji kampanda Ntemu muena ditunga dia Italie wakatonda patoke ne: “Mvua ne bundu bua kuambila balunda banyi se: ndi Ntemu. Bu mumvua mumanye ne: Yehowa kêna ne disanka bua bualu buanyi, mvua ne dibungama ne mutekete mu maboko.”

⁴ Kanudishimi, Satana mmusue kunufikisha ku kabutu kenu. Mu bulongolodi ebu, bansonga bavule nebajimije muoyo ku dikenga dinene bualu bavua badilekelele bua kubasesuishabo. (Yehezekele 9:6) Mushindu umu’epele wa kupanduka, nkutungunuka ne kulonda buakane.

Nudilame ku malunda mabi

5, 6. (a) Nditeta kayi divua nsongalume Timote mupetangane nadi mu Efeso muvuaye musombele? (b) Paulo wakapesha Timote mubelu kayi?

⁵ Mu mêyi makese, ke tshidi mubelu uvuabo bapeshe nsongalume Timote kudi Paulo umvuija. Munkatshi mua bidimu bipite pa dikumi, Timote uvua ufila mupostolo Paulo mu ngendu yende ya bu-misionere. Tshikondo kampanda tshivua Timote wenza mudimu wende mu tshimenga tshia bampangano tshia Efeso, Paulo uvua mu nzubu kampanda wa lukanu ku Rome, muindile bua kushipibua. Bu mukavua tshikondo tshia lufu luende tshisemena pabuipi, Paulo uvua mua kuikala uditatshisha bua kumanya mushindu uvua malu mua kupitakana bua Timote. Efeso uvua tshimenga tshiende lumu bua bubanji buatshi, tshiendenda tshia masandi, ne manaya mabi a dijikija lutetuku; kabidi, Timote ukavua pa kupangila kashidi diambuluisha dia mumulombodi wende musuibue.

⁶ Nunku, Paulo wakafundila “muanende munanga” mêyi adi alonda aa: “Mu nzubu mualabale kamutu anu ngesu ya ngolo ne ye argent, kadi mutu kabidi ya mitshi ne ya diima; imue idi bua midimu ya buneme; kadi mikuabu bua midimu ya patupu. Nunku, biadilama muntu bua kavu kufuanangana ne ya ndekelu eyi, neikale menemene luesu lua midimu ya buneme, lutumbe, ludi luambuluisha mfumu’alu, lulongolola bua mudimu wonso muimpe. Nunku, unyeme nkuka ya bunsonga, kadi wipatshile buakane, ditabuja, dinanga, ditalala, pamue ne aba badi babila Mukalenge ne mutshima mukezuke.”​—2 Timote 1:2; 2:20-22.

7. (a) ‘Ngesu ya midimu ya buneme’ ivua Paulo muakule bualu buayi idi ileja tshinyi? (b) Lelu’eu, mmunyi mudi bansonga mua kutumikila miaku eyi ya Paulo?

⁷ Nunku, Paulo uvua udimuija Timote ne: nansha ku balunda bende bena nkristo, kuvua mua kusanganyibua ‘ngesu ya midimu ya patupu’​—bantu bavua kabayi ne nsombelu mulenga. Pabi, pikala kutantshila bamue bena nkristo bela manyi mua kunyanga Timote, mmushindu kayipu udi kutantshila kua bena bulongolodi ebu mua kunyanga bansonga bena nkristo lelu’eu! (1 Kolinto 15:33) Abi kabiena biumvuija se: nudi ne bua kulekela kumvuangana ne balunda benu ba mu tulasa nansha. Tshidibi, nudi ne bua kutabalela bua kubenga kudilamatshisha bikole kudibo, nansha binuabadibua se: tshienda-nkaya. Bidi mua kuikala bualu bukole menemene. Pa nanku, nsongakaji kampanda wa ku ditunga dia Brezile wakamba ne: “Mbikole. Matuku wonso balunda banyi ba mu kalasa badi’anu bambikila mu mafesto peshi bua kuya kujikija lutetuku miaba idi kayiyi mikumbanyine bansonga bena nkristo. Badi bamba ne: ‘Munyi! Kuena ulua to? Udi mupale!’”

8, 9. (a) Mmunyi mudi ditantshila dine dia bansonga ba mu bulongolodi ebu badi bamueneka bakumbanyine mua kuikala njiwu bua muena nkristo? (b) Nkuepi kua kupetela balunda bakumbanyine bushuwa?

⁸ Bamue bansonga ba mu bulongolodi ebu badi mua kumueneka bakumbanyine amu bualu kabena banua mfuanka, kabena ne ngakuilu mubole peshi kabatu badifila mu tshiendenda tshia masandi. Nansha nanku, bu mudibo kabayi bipatshila buakane, ngenyi yabu ne mmuenenu yabu pa bintu bia ku mubidi idi mua kuikala ne buenzeji bubi kunudi. Tuambe mene, ntshinyi tshinudi natshi mu buobumue ne bantu badi kabayi bena kuitabuja? (2 Kolinto 6:14-16) Kabidi, bintu bia mushinga mukole bia mu nyuma binudi balamate peshi banange bikole bidi’anu “bupote” kudibu! (1 Kolinto 2:14) Nudiku mua kushala balunda babo ne kupanga kutupa ku mêyi-maludiki enu anyi?

⁹ Pa nanku, epukayi kutantshila bantu babi. Kutantshila kuenu kushikile kudi bena nkristo bapiluke badi badifila menemene mu malu a mu nyuma ne badi banange Yehowa bushuwa. Nuikale badimuke nansha kudi bansonga ba mu tshisumbu badi ne mmuenenu wa dizangika malu mabi peshi bena mbipishilu. Mu dikola dienu dia mu nyuma, nenuenze pamu’apa mashintuluka kampanda bua bidi bitangila disungula dia balunda. Nsongakaji kampanda Ntemu mukulumpe wakamba ne: “Ndi mudie malunda mapiamapia mu bisumbu bishilangane. Ebi mbingambuluishe bua kujingulula se: bushuwa katuena tukengela kuikala ne balunda ba mu bulongolodi ebu to.”

Nyemayi majinga mabi

10, 11. (a) “Kunyema majinga a bunsonga” kudi kumvuija tshinyi? (b) Mmunyi mua “kunyema tshiendenda tshia masandi”?

¹⁰ Paulo wakasengelela kabidi Timote bua “kunyema majinga a bunsonga.” Muntu patshidiye nsonga, dijinda dia kuanyishibua, dia kunaya peshi dia kushala pamue kua mulume ne mukaji adi mua kuikala makole menemene. Wewe kuyi muakolele, majinga aa adi mua kukufikisha ku mpekatu. Ke bua tshinyi Paulo wakakula bua kunyema majinga mabi​—kunyema lubilu anu bu tshilumbu tshidi tshitangila muoyo peshi lufu.a

¹¹ Tshilejilu, dijinga dia kumanyangana kua mulume ne mukaji ndifikishe bansonga bavule bena nkristo ku kabutu ka mu nyuma. Nunku, mbikumbanyine bua Bible kutuambila bua “kunyema masandi.” (1 Kolinto 6:18) Padi nsongalume ne nsongakaji batantshilangana, badi mua kutumika ne dîyi-diludiki edi bua kuepuka nsombelu idi mua kubabueja mu ditetshibua​—bu mudi kuikala anu babidi mu tshibambalu kampanda peshi mu vwatire muimanyika. Kuenda ne tshibanji kudi mua kumueneka bu muanda udibo bamba ne: tshidibudibu tumputumpu, mianda ya kale ki ny’a lelu, pabi bikale bukubi bua bushuwa. Nansha mudibi biakanyine bua kutumika ne imue miaku bua kulejangana dinanga, bidi bikengela kujadika mikalu ne meji, nenku kuepuka nsombelu mubi. (1 Tesalonike 4:7) Kunyema masandi nkuepuka kabidi bua kutangila bindidimbi peshi programme ya televizion idi mua kujula majinga mabi munda muenu. (Yakobo 1:14, 15) Pikala ngenyi mibi ibuela mu tshieledi tshiebe tshia lungenyi kabiyi ku disua diebe, utume lungenyi ku tshintu tshikuabu. Juka uye kuendakana; uditue mu dibala mikanda; wenze mudimu kampanda wa ku nzubu. Nangananga disambila didi diambuluisha mushindu wa pa buawu mu tshikondo bu nunku.​—Musambu wa 62:8.b

12. Mmunyi mua kulonga mushindu wa kukina malu mabi? Fila tshilejilu.

¹² Nangananga, udi ne bua kulonga mua kukina, kutshina, ne kubenga bubi. (Musambu wa 97:10) Mmunyi muudi mua kukina tshintu tshidi pa kutshiangata muditshi amu, tshisankisha ne tshilengelela? Mpa kuela meji ku bipeta bibi! “Kanudingibu: kabatu baseka Nzambi. Bushuwa, tshionso tshidi muntu ukuna, ke tshiotshi tshianowaye; bualu, eu udi ukuna bua mubidi neanowe dinyanguka ku mubidi wende.” (Galatia 6:7, 8) Biwatetshibua bua kupona pa kukokela dijinga dibi, ela meji ku tshipeta tshitambe bubi​—mushindu wanyingalajabi Yehowa Nzambi. (Fuanyikija ne Musambu wa 78:41.) Ela kabidi meji ku mpukapuka ya dîmi kadiyi ditekemena peshi ku disama bu mudi SIDA. Ndekelu wa bionso, ela meji ku malanda ebe ne bakuabu ne kanemu ka bumuntu buebe biwajimija anu bua ngenzelu webe mubi. Kudi mua kupatuka kabidi bipeta bibi bianenga matuku mavule. Muena nkristo kampanda mukaji wakitaba ne: “Bayanyi ne meme muine tuvua bamanyangane kumpala kua kupetangana bua dibaka. Lelu’eu, nansha mutudi bena nkristo buonso babidi, nsombelu wetu wa masandi wa matuku mashale udi mpokolo wa dipanga kumvuangana ne mutshiawudi mu dibaka dietu.” Kabidi, kupu muoyo nansha kakese dijimija dia masanka ebe a mu bulongolodi bua Nzambi ne njiwu ya kuipatshibua mu tshisumbu tshia bena nkristo! (1 Kolinto 5:9-13) Ki nkufuta bipitshidile anu bua disanka dia katupa kîpi anyi?

Kuipatshila malanda masheme ne Yehowa

13, 14. (a) Bua tshinyi kabiena bikengela kunyema amu malu mabi patupu? (b) Mmunyi mua “kuipatshila bua kumanya Yehowa”?

¹³ Kadi, kabien’amu bikengela kunyema bubi nansha. Timote uvua kabidi mukankamijibue bua “kuipatshila buakane, ditabuja, dinanga ne ditalala.” Ebi bidi bikengela mapangadika makole. Bia muomumue, muprofete Hoshea wakasengelela ditunga dia Izalele dipange ditabuja ne: “Luayi ne tualukilayi kudi Yehowa . . . Netuipatshile bua kumanya Yehowa.” (Hoshea 6:1-3) Ukadiku mudifundile tshipatshila tshia mushindu’eu anyi? Bua kutshikumbaja, kabien’amu bikengela kubuela mu bisangilu ne kufila baledi bebe mu mudimu wa budimi nansha. Muena nkristo kampanda mukaji wakatonda patoke ne: “Baledi banyi mbankoleshe mu bulelela, ngakatambushibua kumpala kua dîba. . . . Mvua mpumbisha bisangilu ku mpukapuka ne tshivua mua kupitshisha ngondo mujima tshiyi mupatuke mu buambi; kadi, tshivua mudie malanda masheme a pa nkayanyi ne Yehowa nansha kakese.”

¹⁴ Nsongakaji mukuabu wakitaba pende ne: kakafika ku dimanya Yehowa bu Mulunda ne Tatu, uvua utamba kumuangata bu Spiritu muikale tshidingijilu, bualu bua mu meji budi kabuyi bulelela. Wakaditua mu tshiendenda tshia masandi ne kulua mamu mujike wa bidimu 18. Kuenji pebe tshilema tshia muomumue! “Ipatshila mua kumanya Yehowa,” bilondeshile mubelu wa Hoshea. Pa kusambila ne pa kuenda ne Yehowa ku dituku ne ku dituku, udi mua kumuvuija mulunda webe wa pa muoyo. (Fuanyikija ne Mika 6:8; Yelemiya 3:4.) “Kêna kule ne yonso wa kutudi” bituamukeba. (Bienzedi 17:27) Mbia mushinga bua kuikala ne programme wa dilonga Bible pa nkayebe ku musangu ne ku musangu. Ki nkuenza programme mukodiakane ne mukole nansha. Nsongakaji kampanda udi ubikidibua ne: Melody, udi wamba ne: “Dituku dionso, ndi mbala Bible munkatshi mua minute 15.” Wikale udilamina dîba bua kubala nimero wonso wa Tshibumba tshia Nsentedi ne Réveillez-vous! Wikale ulongolola bisangilu bia tshisumbu bua kumona mua “kusaka [bakuabu] ku dinanga ne ku midimu mimpe.”​—Ebelu 10:24, 25.

Upeshe baledi bebe mutshima webe

15. (a) Bua tshinyi bitu pamu’apa bikole bua kutumikila baledi? (b) Pa tshibidilu, bua tshinyi mbitambe buimpe bua bansonga kuikalabo ne butumike?

¹⁵ Baledi batshinyi ba Nzambi badi mua kuikala diambuluisha ne dikuatshisha bia bushuwa. Kadi, mona tshiwudi ne bua kuenza, wewe muine: “Bana, nutumikile baledi benu mu buobumue ne Mukalenge, bualu, ke tshidi tshiakane: ‘Unemeke tatu’ebe ne mamu’ebe’; etshi tshidi dîyi-dituma dia kumpala didi ne dilaya: ‘bua wikale ne disanka ne ushale ne muoyo musangu mule pa buloba.’” (Efeso 6:1-3) Bulelela, udi wenda ukola, ne udi mua kuikala ukengela budikadidi buvule. Udi mua kuikala kabidi wenda ujingulula mikalu ya baledi bebe. Mupostolo Paulo wakitaba se: “Ba-tatu betu mbantu bavua mua kuenza anu ebi bivuabo batamba kuelela meji.” (Ebelu 12:10, The Jerusalem Bible) Kadi, pa kutangila masanka awikala ne bua kupeta, mbitambe buimpe wewe kubatumikila. Baledi bebe mbakunange ne mbakumanya kupita muntu kayi yonso. Nansha kanuyi nupetangana mu malu mavule dîba dionso, pa tshibidilu mbasue diakalenga diebe. Bua tshinyi udi ubatantamena padibo baditatshisha bua “kukukolesha bilondeshile mibelu ne dinyoka pamue ne nkoleshilu wa lungenyi bia Yehowa”? (Efeso 6:4) Bushuwa, anu mupote ke “udi upanga kuleja kanemu bua mibelu ne manyoka bia tatuende.” (Nsumuinu 15:5) Nsonga wa meji neanyishe bukokeshi bua baledi bende ne neabapeshe kanemu kadi kabakumbanyine.​—Nsumuinu 1:8.

16. (a) Bua tshinyi ki mbia meji bua bansonga kusokoka baledi babu malu adi abatonda? (b) Ntshinyi tshidi bansonga mua kuenza bua kuakaja diyukidilangana ne baledi babo?

¹⁶ Ebi bidi biumvuija kuambila baledi bebe bulelela, kubamanyisha malu adi akutonda, bu mudi ngelakanyi ya munanunanu bua bulelela peshi ngenzelu mubi uvua mukubombe anu bua didilekelela diebe. (Efeso 4:25) Kusokoka baledi bebe malu adi atatshisha lungenyi luebe nkuakolesha. (Musambu wa 26:4) Bushuwa, bamue baledi kabatu batamba kudikolesha bua kuyukidilangana [ne bana babo] to. Nsongakaji kampanda wakadiabila ne: “Mamu katu usomba musangu nansha umue bua kuyukila nanyi. Tshitu ne dikima nansha dikese bua kumuambila malu adi antonda mu mutshima, ntu’amu ntshina bua kavu kunkanyina.” Biwikala mu nsombelu wa mushindu’eu, usungule ne meji tshikondo tshiakanyine bua kumanyisha baledi bebe malu adi akutonda mu mutshima. Nsumuinu 23:26 udi ufila musengelelu eu: “Muan’anyi, mpesha kuoko mutshima webe.” Utete mua kuyukila nabu ku musangu ne ku musangu pa malu adi akutangila, bangabanga ne tunyinganyinga tukole kuelatu miji.

Tungunuka ne kuipatshila buakane!

17, 18. Ntshinyi tshiambuluisha nsonga bua kutungunuka ne kuipatshila buakane?

¹⁷ Pakavuaye pa kujikija difunda mukanda wende muibidi, Paulo wakasengelela Timote ne: “Ushale mu malu awakulonga ne akukufikishabo ku ditaba.” (2 Timote 3:14) Udi ne bua kuenza muomumue. Kulekedi bakupumbisha kudi muntu kampanda peshi tshintu kansanga bua kuipatshila buakane nansha. Bulongolodi bua Satana​—nansha mudibo bulobeshangana—​mbuwule tente ne malu mabi. Mu tshitupa tshîpi emu, bukadi pa kujimina pamue ne aba buonso badi ku luseke luabu. (Musambu wa 92:7) Wikale muangate dipangadika dikole dia kubenga kubutudibua pamue ne bena mudimu ba Satana.

¹⁸ Bua kabingila aka, udi ne bua kukonkonona ku musangu ne ku musangu bipatshila biebe, majinga ebe ne bintu biwudi ukengela. Udiebeje se: ‘Padi baledi banyi ne bena mu tshisumbu kabayi bammona, ntu ndama ngikadilu wa tshitembu mu ngakuilu wanyi ne mu bienzedi bianyi anyi? Mbalunda ba mushindu kayi bandi nsungula? Ntu ngidikija mvuadilu ne nkoselu wa nsuki wa balunda banyi ba mu bulongolodi ebu anyi? Mbipatshila kayi bindi mudifundile? Ntuku njinga bikole mudimu wa ku dîba ne ku dîba​—peshi mudimu kampanda wa mu bulongolodi ebu bua malu bua Satana bukadi pa kufua?’

19, 20. (a) Bua tshinyi nsonga kêna ne bua kuela meji se: ki mmukumbanyine bua kukumbaja malu adi Yehowa umulomba? (b) Nndongoluelu kayi idi bansonga buobo bine mua kubabidila?

¹⁹ Pamu’apa udi mumone dikengedibua dia kuenza amue mashintuluka mu ngelelu webe wa lungenyi. (2 Kolinto 13:11) Kuedi meji se: kuena mukumbane mua kuenza mashintuluka aa nansha. Uvuluke se: Yehowa kêna ukulomba bualu kampanda nansha bumue budi bupite makokeshi ebe bukole. Muprofete Mika wakebeja ne: “Ntshinyi tshidi Yehowa ukulomba pebe, ki ng’amu kutumikila mikenji, kunanga buimpe ne kuenda ne bupuekele ne Nzambi webe anyi?” (Mika 6:8) Nebikale bipepele bua wewe kuenza nunku biwababidila ndongoluelu idi Yehowa muangate bua kukuambuluisha. Ushale pabuipi ne baledi bebe. Wikale udisangisha ne tshisumbu tshia bena nkristo ku musangu ne ku musangu. Nangananga, udikoleshe bua kumanya mua kukeba diambuluisha kudi bakulu. Badi baditatshisha bua diakalenga diebe, ne badi mua kuikala mpokolo wa dikuatshisha ne dikolesha mu nyuma buebe wewe. (Yeshayi 32:2) Kupita bionso bituatedi ebi, udime malanda masheme ne a musangelu ne Yehowa Nzambi. Yeye neakupeshe bukole ne disua bua wewe kumona mua kuipatshila bidi biakane!

²⁰ Kadi, bamue bansonga badi benza madikolela bua kukola mu nyuma badi bapangila kukumbaja tshipatshila tshiabu pa kuteleja mijiki mipange bukezuke. Tshiena-bualu tshidi tshilonda netshikonkonone tshilumbu etshi ne ntema ya pa buayi.

[Mêyi adi kuinshi]

Utshidi muvuluke anyi?

◻ Bua tshinyi bansonga nangananga mbakumbanyine mua kupona mu “mateyi” a Satana?

◻ Bua tshinyi bidi njiwu bua kupita kutantshila bansonga ba mu bulongolodi ebu?

◻ Mmunyi mua kunyema tshiendenda tshia masandi?

◻ Mmunyi mua kuipatshila malanda masheme ne Yehowa?

◻ Bua tshinyi mbia mushinga bua kuyukidilangana ne baledi bebe?

[Tshimfuanyi mu dibeji 16]

Pamutu pa kuditapulula ne bakuabo mu tshikondo tshia ditantshilangana, mbia meji bua kulonga mua kumanyangana bikadilu pa kudifila mu manaya