Bantemu ba Yehowa pa buloba bujima: Thailande
“DITUNGA dia badishikamine.” Ke tshidi dîna Thaïlande diumvuija. Ba muena muabu bapite pa 57 000 000 badi ne ngenyi kabukabu pa malu a Nzambi, mbenji ba mudimu mukole ba kalanda musenga. Nansha mudi tshitendelelu tshia ba-Buda ne buenzeji butambe bunene, bitendelelu bia bukua-buena nkristo bidi pabi bitumika mu ditunga edi didi ku sud-est wa Azi. Bantu buonso aba, badi ne dijinga dia kumvua lumu luimpe lua Bukalenge bua Nzambi.—Matayo 24:14.a
Bena tshimuangi badi bumvua lumu luimpe
Mu tumponya tutangalaja pa mikuna ya Thaïlande ku muelelu wa Myanmar, bulelela bua Bible budi buela miji munkatshi mua bena tshimuangi ba-Karen bapite pa 10 000. Bena dîku kampanda ba-Karen badi basombele muaba eu mBantemu ba Yehowa. Badi batangalaja lumu luimpe lua Bukalenge munkatshi mua bena tshimuangi. Mmunyi muakatuadija mudimu wabo?
Kukadi bidimu bivule katshia nsongalume kampanda wakosa bisuikidi biende ne Ekleziya Anglikan ne kuvuaye umue wa ku Bantemu ba Yehowa. Basaka kudi ministre [pastere] wabo, balela bende bavua bamuluisha. Kadi, wakananukila ne lutulu, ne buluishi bua dîku diende buakatuuya ku kakese ku kakese. Bamfumu ba Ekleziya Anglikan bakatungunuka ne dimupepeja diabo munkatshi mua bidimu bibidi too ne dituku diakatonkodibuabo pa muanzu wabo bua tshiendenda tshiabo tshia masandi. Bu muvua ekleziya katshiyi kabidi ne mulami, bena dîku edi ne balela bakuabo ba Ntemu biakabatonda ne bakapanga dikuatshisha. Dikumi ne umue ba kudibo bakumbuka mu ekleziya ne bakalomba Bantemu bua kulongabo nabo Bible.
Dilonga edi diakatungunuka bimpe, pamue ne bena tshimuangi bakuabo bavua baluamu. Bulelela buakatangalaka lukasa lukasa, kufikishabi too ne ku batismo wa Bantemu bapiabapia 17 mu musulu uvua upitshila mu kamponya ka bena tshimuangi. Ndisanka kayipu pa kumona kaku mukaji wa bidimu 88 winyibua mu mâyi pamue nabo!
Kasete ka vidéo kadi kajula dijinga dia kumanya bia bungi
Didiunda didi mua kuenzeka pashishe ndinene munkatshi mua bena tshimuangi. Dîba dia tshibilu tshia Tshivulukilu mu 1993, bantu 57 bakabuelamu. Mu dikumbula dia mutangidi wa tshijengu mu ngondo wa Lumungulu wa tshidimu atshi, bantu 67 bakadisangisha bua umue wa ku miyuki yende. Ne pabuipi ne bantu 250 bakadisangisha bua kutangila kasete ka vidéo ka Société Watch Tower ka Les Témoins de Jéhovah—Un nom et une organisation.
Mukaji wa pastere wa ba-batiste mu kamponya ka bena tshimuangi wakabuela mu muyuki wa patoke mulongolola kudi Bantemu ba Yehowa ne wakafunda mvese ya mu Bible yakakonkononyibua. Wakalondela bayende mushindu uvua miyuki miambulula ivuaye uteleja mu ekleziya wabo kayiyi imusankisha. Wakatontolola, wamba ne: bu yeye [mukaji] mua kuya mu bisangilu bia Bantemu ba Yehowa, bena parwase buonso nebalonde dikasa diende. Pakabuelaye kabidi mu bisangilu, bayende wakamuipata ne kele ne wakuosha note yende yonso ivuaye wangata mu bisangilu ne mikanda idi yumvuija Bible. Kadi nansha biobi nanku, pakalejabu filme ku vidéo, wakalua kabidi. Ku shòò mukaji eu wakalondela bayende biakamonaye. Ne mmuenenu mukuabo, wakajinga pende kutangila vidéo ne wakanyingalala bua muvuaye muoshe note yende ne mikanda idi yumvuija Bible.
Ke mushindu udi bantu bateleja lumu luimpe lua Bukalenge ku Thaïlande. Nanku badi benda bapeta budikadidi bua mu nyuma mu “ditunga dia badishikamine.”—Yone 8:32.
[Mêyi adi kuinshi]
a Bua mamanyisha a pa mutu, tangila Kalendrié ka Bantemu ba Yehowa 1994.
[Kazubu mu dibeji 24]
NSOMBELU WA DITUNGA
Tshidimu tshia mudimu 1993
BUNGI BUA BAMANYISHI: 1 434
MUAYENE: Ntemu 1 bua bantu 40 299
BUNGI BUA BANTU BAKABUELA MU TSHIVULUKILU: 3 342
MUAYENE WA BAMPANDA-NJILA: 232
MUAYENE WA MALONGA A BIBLE: 1 489
BUNGI BUA BADI BATAMBULE BATISMO: 92
BUNGI BUA BISUMBU: 39
BIRO BIA FILIALE: BANGKOK
[Tshimfuanyi mu dibeji 25]
Bamanyishi ba Bukalenge badi bamanyisha ne mitalu lumu luimpe lua Bukalenge
[Tshimfuanyi mu dibeji 25]
Biro bia kumpala bia filiale, 1947
[Tshimfuanyi mu dibeji 25]
Bena Dîku dia Betele kumpala kua biro bipiabipia bia filiale ku Bangkok, biunzulula mu dia 8 Luishi 1992