Kavua mutambe bununu bua kusadila Yehowa

BANUNU bavule badi bamona ne: bidimu bidi bibashadile bidi bia ditekemena dikese bua kulabulabo disanka kampanda. Mukaji mununu muenji wa manaya muende lumu wakamba ne: “Ndi munyange muoyo wanyi, ne dîba dia kuwushintulula ndimane kupita . . . Pandi ngendakana nkayanyi, ndi mvuluka muoyo wanyi, ne tshiena ne disanka bilondeshile njila umvua mudibueje . . . Tshiena ne diikisha muaba kayi wonso ne tshiena ne mushindu wa kupeta disulakana.”

Mukaji mununu uvua ne muoyo kukadi bidimu pabuipi ne 2 000 kavua mu lutatu lua mushindu’eu nansha. Uvua mukamba wa bidimu 84, kadi uvua muzanzamuke, muikale ne disanka, ne Nzambi wakamupa bua kulabulaye disanka dia pa buadi. Dîna diende divua Ana, ne uvua ne kabingila ka pa buaku bua kuikala ne disanka. Kavua tshinyi?

“Kavua upumbisha kuya ku ntempelo”

Mufundi wa Evanjeliyo Luka udi utulubula Ana. “Mpindieu,” ke mudiye wamba, “muprofete mukashi, dina diandi Ana wakadiku, yeye wakadi muana wa fanuele wa tshisamba tshia Ashê” mu Izalele. Bu muprofete mukaji, uvua ne dipa dia spiritu munsantu wa Nzambi, anyi bukole buenzeji, mu mushindu wa pa buawu. Ne Ana wakapeta tshikondo tshiakane bua kuamba mêyi a buprofete dituku kampanda.

Luka udi usakidila ne: “Mukaji eu wakadi mununu be, bayandi wakamubaka hatshivuaye kamama, wakashala n’andi bidimu muanda mutekete, wakashala mu lufuila bidimu makumi muanda mukulu ne binai.” (Luka 2:36, 37) Bushuwa, Ana wakavua mukamba patshivuaye nsongakaji. Bakamba buonso bena nkristo nansha bikale ne bidimu bungi munyi mbamanye mushindu udi dijimija mulume munanga mu lufu disamisha ku mutshima. Apo, amu bu bakaji bavule batshinyi ba Nzambi ba matuku etu aa, Ana kakashiila dibungama edi muaba bua kadimupumbishi kusadila Nzambi.

Luka udi utuambila ne: Ana “[kavua upumbisha kuya, NW] ku ntempelo,” mu Yeruzaleme. (Luka 2:37) Ne disuminyina dionso uvua wanyisha mabenesha avua afumina ku disadila ku nzubu wa Nzambi. Bienzedi biende biakamonesha patoke ne: yeye, bia muomumue ne mukalenge muimbi wa misambu wa bena Izalele Davidi, bavua anu ne tshintu tshimuepele tshivuabu balomba Nzambi. Ne tshintu atshi tshivua tshinyi? Davidi wakimba ne: “Nakulomba Yehowa bualu bumuepele​—mbobo bundi nkebakeba: bua meme kushikama mu nsubu wa Yehowa matuku onso a muoyo wanyi, bua kumona buimpe bua Yehowa, ne bua kuelangana meji a malu a mu ntempelo wandi.” (Musambu wa 27:4) Mu diumvuangana ne bualu ebu, Ana pende, mmufuanangane ne bakaji bena nkristo badiku lelu’eu, badi bapeta disanka pa kuikalaku pa tshibidilu mu muaba wa ntendelelu wa Yehowa.

Ana uvua utumbisha Nzambi pa kuenza mudimu munsantu butuku ne munya. Wakenza nanku ‘pa kujila biakudia ne kumulomba,’ bidi bileja dibungama ne disuminyina mu ditekemena dishintuluka. (Luka 2:37) Dikuatshibua dia bena Yuda ku bupika tshikondo tshile tshia siekele mivule kudi makole a bena matunga a bende, pamue ne dinyanguka dia nsombelu wa malu a Nzambi diakabuela too ne mu ntempelo ne kudi bakuidi bende, bidi mua kubadibua bu tubingila tuakasaka Ana ku dienza tshijila ne milombo kudi Yehowa. Kadi, uvua kabidi ne kabingila ka kuikala ne disanka, nangananga bua muanda kampanda wa dikema wakenzeka dimue dituku dia pa buadi mu tshidimu 2 K.B.B.

Dibenesha dikena ditekemena

Mu dituku edi dia mushinga mukole, muana Yezu bakaya nende ku ntempelo wa Yeruzaleme kudi mamuende, Mariya, ne tatuende mudiishi Yozefe. Mununu Simona wakamona muana ne wakamba mêyi a bu-profete dîba adi. (Luka 2:25-35) Anu bu pa tshibidilu, Ana uvua ku ntempelo. “Ha diba adi,” ke mudi Luka ulonda, “wakalua.” (Luka 2:38) Ndisanka kayipu divua nadi Ana pakamonaye ne mêsu ende a bununu, eu uvua ne bua kuvua Masiya!

Matuku makumi anayi kumpala, muanjelo wa Nzambi wakakemesha balami ba mikoko bavua pabuipi ne Beteleme ne miaku eyi: “Kanutshinyi, bua monayi, ndi nnumanyisha lumu luimpe lua disanka dinene dikala nadi bantu buonso, bualu lelu’eu mu tshimenga tshia Davidi mbanulelele Mupandishi, udi Kristo Mukalenge.” Ne diakamue musumba wa biluilu bia mu diulu kudisangishawu kudi muanjelo, wimba utumbisha Nzambi, wamba ne: “Butumbi kudi Nzambi mulu mule muamua ne ditalala pa buloba munkatshi mua bantu ba bulengele!” (Luka 2:8-14, NW) Bia muomumue, Ana wakasakibua ku dimanyisha bualu budi butangila Eu uvua ne bua kuvua Masiya!

Yeye mumane kumona muana Yezu, Ana “wakasakidila Nzambi, wakambila bonso bakadi batekemene buhikudi bua Yelushalema bualu [bua muana, NW]” (Luka 2:38) Amu bu mununu Simona, wakapeta pende disanka dia kumona muana Yezu ku ntempelo, kakuyi mpata Ana uvua utekemena, usambila, ne windila Mupikudi mulaya. Lumu luimpe lua se: Yezu uvua Eu uvuabo bindile luvua luimpe lutambe kudiye mushindu uvuaye kayi mua kululama buende nkayende.

Bu muvua Ana kayi utekemena kuikala ne muoyo pakola Yezu, wakenza tshinyi? Ne disanka dionso, wakamanyisha bakuabo bualu budi butangila dipikudibua divua ne bua kuenzeka ku butuangaji bua Eu uvua ne bua kuvua Masiya.

Tshilejilu tshimpe tshia Ana

Mbatendeledi bungi munyi ba mu bulongolodi ebu badi ne bidimu 84, badi mua kufila bumanyishi bua mushindu’eu anyi batshidi batungunuka ne kutendelela [Nzambi] butuku ne munya? Pamu’apa, bavua mua kuikala bamane kulomba pansion bidimu bivule kumpala. Ana ne Simona bavua bashilangane ne bena malu a Nzambi ba bulongolodi ebu. Bakafila bilejilu bimpe bua basadidi banunu buonso ba Yehowa. Bushuwa, bakananga nzubu wa ntendelelu wa Yehowa ne bakamutumbisha ne muoyo wabo mujima.

Ana ntshilejilu tshia mpatshi tshia mukaji mukamba mutshinyi wa Nzambi. Bushuwa, diumvuija dia Luka bua mukaji mununu eu mudipuekeshi ndifuanangane menemene ne ngikadilu mikumbanyine ya mukamba wa tshitembu udi mulejibue mu 1 Timote 5:3-16. Muinamu, mupostolo Paulo udi wamba ne: mukamba wa mushindu’eu “udi unanukila mu kusengelela ne mu kulomba kuandi butuku ne munya,” udi “mukashi wa muntu umue,” ne ‘munanukile kulonda midimu mimpe yonso.’ Ana uvua mukaji wa mushindu’eu.

Lelu’eu, tudi tusangana bakamba banunu ba lulamatu badi batumbisha Nzambi butuku ne munya pa kuenza midimu minsantu mu binunu ne binunu bia bisumbu bia Bantemu ba Yehowa pa buloba bujima. Mmushindu kayipu utudi ne dianyisha bu mutudi ne “ba-Ana” ba matuku etu aa munkatshi muetu!

Nansha ku bukulakaje, balume ne bakaji badi mua kuditshipa kudi Yehowa ne kuleja patoke diditshipa edi pa kutambula batismo mu mâyi. Banunu ki mbatambe kukulakaja bua kusadila Yehowa ne kufila bumanyishi budi butangila Bukalenge bua Masiya, bubanjija mu mawulu buatuadila, mu katupa kîpi emu, bena butumike mabenesha mavule. Bantu banunu badi batumbisha Nzambi pa kuenza midimu minsantu badi mua kufila bujadiki bua mabenesha adibu bapete kudi Yehowa, amu bu muakabeneshibua Ana mu mushindu wa pa buawu kukadi siekele mivule. Kavua mutambe bununu bua kusadila Yehowa ne kutumbisha dîna diende dinsantu​—mbia muomumue bua bena nkristo bakulakaje lelu’eu.