Bua tshinyi kuditatshisha bua tshitendelelu?

MU MATUNGA wonso pa buloba, bantu badi batabalela tshitendelelu. Ku lukuabu luseke, kudi kabidi bavule badi bamba patoke mudibu kabayi batabalela tshitendelelu. Kadi, kuonso eku, ke muvuabu bela meji anyi?

Muntu mmuenjibue mushindu wa kusanka ki ng’anu ne bintu bia ku mubidi. Bantu badi bakengela ngikadilu ya mu nyuma. Nsombelu wa ku dituku ne ku dituku muibakila pa dikeba dia bintu bia ku mubidi nkayabi, ne amue mêba a didiolola, kêna utamba kusankisha muntu munda muende nansha. Bishilangane ne nyama, bantu badi bajinga kumanya, ‘Tshipatshila tshia muoyo tshidi tshinyi?’ ‘Muoyo eu wa matuku makese udi ne bintu bilenga bivule kadi udi kabidi ne bintu bibi kuîsu bia bungi, ke bionso bidiku anyi?’ Kuenaku muanji kudiebeja nkonko bu eyi anyi?

Kadi, miliyo mivule ya bantu badi ne muoyo mpindieu bakakolela mu nsombelu idi itekesha mu mikolo bua kutabalela tshitendelelu mu mushindu muimpe. Abi biakafumina pamue apa kudi baledi babo, balongeshi babo, bena mulongo nabo, nansha kudi mbulamatadi.

Skalabrino, nsongalume wa ku Albanie, wakumvuija se: mu bukokeshi bua bena Koministe, bantu bakalongeshibua ne: Nzambi kenaku. Kabidi, bivua njiwu kudibu bua kuakula pa malu a tshitendelelu; kuenza nenku kuvua mua kubabuejija mu buloko. Kadi, mu 1991, pavuaye mu ditunga dia Suisse bu muedi wa kambuendele, bakamupetesha mushindu wa kulonga Bible. Wakitaba. Mbua tshinyi?

Eyo, mu ditunga dia Albanie wakumvua ne: kudi mukanda udibo babikila ne: Bible, kadi kavua mumanye bidi bifundamu menemene to. Nenku, ku mbangilu ki ndijinga dia kumanya Bible diakamusaka to. Nansha muvuabu bamuambile bua se: uvua ne bua kulonga malu adi atangila dilongolola dia Nzambi bua bukua-bantu ne buloba, wakamona kabidi muanda eu bu mushindu wa kulonga muakulu wa ditunga. Ne lukasa luonso, wakasangana se: bivuaye ulonga biakajikija dijinga diende diondoke dia kumanya malu a mu nyuma. Wakumvua musangelu ne disanka pakalongaye malu adi atangila dilaya dia Nzambi dia bulongolodi bupiabupia mudi ditalala ne bua kuvulangana, mu bulongolodi mudi bantu mua kuikala ne muoyo wa kashidi ne kuikala ne bintu bionso bidi bikengedibua bua nsombelu wabu. Dijinga diende diakakola pakumvuaye ne: yeye ne bena dîku diende bavua mua kuikala mu bulongolodi ebu bupiabupia. Bu muvuaye Kayi mua kudilamina lumu luimpe buende nkayende, wakela bena dîku diabu nshinga ku ditunga dia Albanie bua kubamanyishalu.

Aleksei, udi musombele mu Russie, wakakema pende bua tshipeta tshidi dimanya dijalame dia Bible mua kupatula mu nsombelu wa muntu. Mutshimunyibue ne ntatu ne mupange mua kupeta diumvuija diakane dia tshipatshila tshia muoyo, wakangata dipangadika dia kudishipa. Diambedi, wakaya ku ditunga dia Finlande bua kukumbula mulunda wende wa balume. Mu njila mu kawulu, wakakula pa bidi bitangila ntatu yende ne bamue bena luendu. Munkatshi muabu muvua Ntemu wa Yehowa wa bakaji, wakamukankamija bua kulonga Bible bualu udi ufila mishindu ya kujikija ntatu bu eyi. Yeye uvua ne mpata. Mu dipingana diende, wakamona bualu bua mushindu umue. Musangu eu, Ntemu mukuabu ke wakakula ne kumumvuija se: yeye pende uvua ne ntatu ya mushindu umue kadi Bible wakamuambuluisha bua kuyitshimuna. Wakamukankamija bua kulonga Bible. Pakafikaye ku nzubu, nshinga wakadila. Mulunda wende mukuabu wa bakaji, uvua ulonga ne Bantemu ne uvua ne disanka dia bungi be. Aleksei wakatuadija kumona se: imue misangu Bible uvua bushuwa mua kumuambuluisha, kadi uvua mumanye se: kuoku kakuyi diambuluisha kavua mua kumumvua to. Wakitaba bua kuikala ne dilonga dia Bible ku nzubu ne Bantemu ba Yehowa dia pa tshibidilu, ne wakatuadija kubuela mu bisangilu. Kabiakamuangata mutantshi mule bua kujingulula se: aba badi bakudimuna nsombelu yabu bilondeshile bidi Bible ulongesha badi ne disanka dia bungi nansha buobu mua kumonangana ne ntatu idi ifikila bukua-bantu buonso.

Ne lungenyi lutuma ku mushindu udi bantu benjibue, Yezu Kristo wakamba ne: “Muntu kêna mua kuikala ne muoyo anu bua diampa nkayadi.” (Matayo 4:4, The New English Bible) Wakasakidila kabidi ne: “Disanka ndia aba badi bamanye bidibo bakengela mu nyuma.” (Matayo 5:3, NW) Diakalenga diabu didi difuma ku dimanya diabu diakane dia bidibu bakengela, kuela biidia bidi bikengedibua bua kubikumbaja, ne kupeta dibenesha dia Nzambi. Kadi, bitudi tukengela mu nyuma kabiena bikumbajibua anu pa kuya mu ekleziya peshi pa kubuela mu masangisha anyi mu misa. Ntendelelu udi ne mikiya mivule udi mua kusankisha mutshima, kadi udi uleja ne: udi ne mishindu milelela ya kujikija ntatu ya mu nsombelu anyi? Nansha bikala tshitendelelu kampanda tshiamba muditshi ne mikenji ya nshindamenu idi mimpe, pikalatshi mua kupangila kufila diumvuija dilelela dia tshipatshila tshia mu muoyo, tshidi mua kukumbaja biwudi ukengela mu nyuma anyi? Tudi kabidi ne bua kuditatshisha bikole bua kumanya bikala ntendelelu wa mushindu’eu mua kutufikisha ku malanda mempe ne Nzambi? Kabiyi nanku, katuena mua kupeta disankishibua dilelela nansha.

Pa bualu ebu bantu bavule badi bakeba tshintu kampanda tshidibu kabayi banji kupeta.

[Tshimfuanyi mu dibeji 3]

Biudi ukengela mu nyuma bidi bushuwa mua kukumbajibua pa kubuela mu ekleziya anyi?

[Tshimfuanyi mu dibeji 4]

Bavule mbasangane se: padibu bumvua bidi bifunda mu Bible, nsombelu wabu udi upeta diumvuija dipiadipia