Difutu dia Yobo​—mpokolo wa ditekemena

“Yehowa . . . wakabenesha ndekelu wa Yobo kunyima, kupita ne ntuadijilu wende.”​—YOBO 42:12, NW.

1. Nansha patu mateta atamba kubatekesha, ntshinyi tshitu Yehowa wenza bua tshisamba tshiende?

YEHOWA “utu ulua mufutshi wa aba badi bamukeba menemene.” (Ebelu 11:6, NW) Utu kabibi usaka bena tshisamba tshiende badifile bua kumanyisha ne bukitu buonso, nansha bikala mateta mabatekeshe bu bafue. (Yobo 26:5; Buakabuluibua 11:3, 7, 11) Ebi biakamueneka bilelela mu muanda udi ukoka ntema wa makenga a Yobo. Nansha muakamudingilabo malu kudi bamusambi basatu ba dishima, ditshina dia bantu kadiakamupuwisha to. Bishilangane, wakafila bumanyishi ne dikima dionso.

2. Nansha babakengesha ne bapetangana ne nsombelu mukole, mmunyi mutu Bantemu ba Yehowa bafika ku ditshimuna mateta abo?

² Bantemu ba Yehowa bavule ba lelu batu batata bua dikengeshibua dinene dia mushindu’eu ne bapetangana ne ntatu itu yamba kubafikisha ku lufu. (2 Kolinto 11:23) Kadi, anu bu Yobo, batu baleja dinanga bua Nzambi ne benza malu makane. (Yehezekele 14:14, 20) Badi kabidi batshimuna mateta abo ne dipangadika dikole bua kusankisha Yehowa, bakankamijibue bua kumanyisha ne dikima, ne kuikala ne ditekemena dilelela.

Yobo udi umanyisha ne dikima

3. Mbumanyishi bua mushindu kayi buakenza Yobo mu diakula diende dia ndekelu?

³ Mu mêyi ende a ndekelu, Yobo wakafila bumanyishi butambe bunene kupita bukavuaye mufile bangabanga. Wakapuwisha bamusambi bende ba dishima. Ne mêyi makole adi atapa ku muoyo, wakamba ne: “Mona muwakukuatshisha wakadi kayi ne bukole!” (Yobo 26:2) Yobo wakatumbisha Yehowa, eu udi bukole buende bulembeleja dibulunge-buloba dietu mu tshibuashibuashi ne ukuta mâyi mu mavuba pa mutu pa buloba. (Yobo 26:7-9) Kadi, Yobo wakamba ne: malu a mushindu’eu adi akemesha ‘adi anu ku mibangubangu ya bienzedi biende.’​—Yobo 26:14.

4. Ntshinyi tshiakamba Yobo pa bidi bitangila muoyo mutoke, ne bua tshinyi uvua mua kuakula mushindu’awu?

⁴ Mujadike muvuaye kayi bualu, Yobo wakamba ne: “Too ne pangakula muoyo, tshiakulekela muoyo wanyi mutoke nansha!” (Yobo 27:5, NW) Bishilangane ne malu avuabo bamushiminyine, kavua muenze bualu nansha bumue buvua buakanyine bivua bimufikile to. Yobo uvua mumanye se: Yehowa katu uteleja masambila a batontolodi, kadi neafute balami ba muoyo mutoke. Ebi bidi mua kutuvuluija se: mu katupa kîpi emu, ku kabutu ka Armagedon, bantu babi nebumbushibue pa miaba yabo ya bukole, ne kabakuepuka tshianza tshia Yehowa tshibutudi to. Too ne ku tshikondo atshi, tshisamba tshia Yehowa netshiendele mu muoyo mutoke watshi.​—Yobo 27:11-23.

5. Mmunyi muakumvuija Yobo meji malelela?

⁵ Anji kufuanyikija bantu basatu bena meji a mu bulongolodi ebu bateleja muvua Yobo ubaleja ne: muntu udi utumika ne nzanzu yende bua kupeta ngolo, mpalata ne makuabo mabanji a mu buloba ne mu mbuu. “Kadi,” ke muakambaye, “diheta dia meji didi ditamba dia mabue a perles mushinga mukole.” (Yobo 28:18) Basambi ba Yobo ba dishima kabavua mua kusumba meji malelela to. Mpokolo wawu udi Mufuki wa lupepe, mvula, makubakuba ne mikenyi. Bushuwa, “ditshina dia Yehowa mmuomumue ne:—meji, ne kumbuka ku malu mabi nkujingulula kua malu.”​—Yobo 28:28, NW.

6. Bua tshinyi Yobo wakakula bua nsombelu uvuaye nende bangabanga?

⁶ Nansha bua makenga ende, Yobo kakalekela kusadila Yehowa to. Pamutu pa kuela nyima kudi Mutambe Kutumbuka, muena muoyo mutoke eu wakatamba kuditatshisha bua kupingajija “bulunda buvuaye nabu ne Nzambi” bangabanga. (Yobo 29:4, NW) Yobo kavua uditambisha pavuaye uleja ‘muakambuluishaye bena tshinyongopelu, muakadivuadikaye ne buakane, ne muvuaye tatu menemene kudi bapele.’ (Yobo 29:12-16) Bishilangane, uvua wakula bua malu a mu nsombelu wende bu musadidi wa Yehowa. Udiku wenda udivudijila lumu lua mushindu’eu anyi? Bushuwa, Yobo wakela kabidi patoke dishima dia mabandu a batshinyi ba Nzambi ba dishima basatu bena mpala ibidi.

7. Yobo uvua muntu wa mushindu kayi?

⁷ Yobo wakasekibua kudi bansonga ‘bena ba-tatuabo bavua kabayi nansha mua kutekibua pamue ne mbua ya bisumbu biende bia mikoko.’ Bakamutobolola ne bakamutuila mata. Nansha muvuaye mu tshinyongopelu tshikole, kabakanemeka Yobo to. (Yobo 30:1, 10, 30) Kadi bu muvuaye mudifila ne muoyo mujima kudi Yehowa, uvua ne kuondo ka muoyo katoke ne uvua mua kuamba ne: “Yeye angidikishe mu tshidikishilu tshidi tshidikisha biakane, bua Nzambi amanye [muoyo mutoke, NW] wanyi.” (Yobo 31:6) Yobo kavua ngenda masandi anyi muena mpàngu misokoka to, ne kakapangila bua kuambuluisha bena lukengelu to. Nansha muvuaye mubanji, kavua weyemena bintu bia ku mubidi to. Kabidi, Yobo kakaditua mu ditendelela bintu bifuka pa kukukuila bintu bidi kabiyi ne muoyo bu mudi ngondo to. (Yobo 31:26-28) Bu muvuaye weyemena Nzambi, wakashiya tshilejilu tshilenga bu mulami wa muoyo mutoke. Nansha bua makenga ende wonso ne bua bamusambi ba dishima, Yobo wakadibingisha ne meji wonso ne wakafila bumanyishi bua mpatshi. Pakatua mêyi ende ku ndekelu, wakatangidila anu Nzambi, Mulumbuluishi wende ne Mumufutshi.​—Yobo 31:35-40.

Elihu udi wakula

8. Elihu uvua nganyi, ne mmunyi muakalejaye kanemu ne dikima?

⁸ Pabuipi apu pavua nsongalume Elihu, ndelanganyi wa Nahor muana wa balume wa Buz ne mulela wa Abrahama mulunda wa Yehowa. (Yeshaya 41:8) Elihu wakaleja kanemu bua bantu banunu pa kubenga kuteleja ditama dimue mu diyukidilangana adi. Kadi, wakakula ne bukitu buonso bilondeshile malu avuabo batupakana. Tshilejilu, wakatemeshila Yobo tshiji bualu “yeye wakadibingisha pamutu pa kubingisha Nzambi.” Elihu wakatamba buludiludi kutemeshila basambi ba dishima tshiji tshikole. Mêyi abo avua amueneka bu avua atumbisha Nzambi, kadi pawo avua menemene amubanda bualu bavua baditeka ku luseke lua Satana mu tshilumbu etshi. “Mûle tente ne mei” ne musakibue kudi spiritu munsantu, Elihu uvua ntemu wa Yehowa ukena kansungansunga.​—Yobo 32:2, 18, 21.

9. Mmunyi muakakula Elihu bua diondopibua dia Yobo?

⁹ Yobo wakatamba kuditatshisha bua kudibingisha pamutu pa kubingisha Nzambi. Bushuwa, uvua utembangana ne Nzambi. Kadi, bu muvua lufu lua Yobo luenda lusemena pabuipi, kuvua kamanyinu ka disangulujibua. Mmunyi muvuabi mua kuenzeka? Eyowa, Elihu uvua musakibue bua kuamba ne: Yobo uvua muanyishibue pa kufila mukenji eu: “Kumulekedi bua apueka mu tshiina! Bualu ngapetshi tshipikudi! Mubidi wende neutambe kusenena kupita ne mu bunsonga, neapingane ku matuku a bukole bua mu bunsonga buende.”​—Yobo 33:24, 25, NW.

10. Mmu bualabale kayi muvua Yobo ne bua kutetshibua, kadi ntshinyi tshitudi ne bua kuikala bashindika bilondeshile 1 Kolinto 10:13?

¹⁰ Elihu wakabela Yobo bualu wakamba mutuku kakuyi diambuluisha bua kusankila mu Nzambi pa kulama muoyo mutoke. Elihu wakamba ne: “Bualu ebu kabuikadi kudi Nzambi bua yeye kuenza malu mabi, anyi bua Wa Bukole Buonso kuenzeye bibi! Bualu bua Nzambi neafute muntu bu mudi bienzedi biandi.” Yobo wakenza bibi bitambe pa kuzangika buakane buende nkayende, kadi wakenza nanku kakuyi dimanya dijalame ne busunguluji. Elihu wakasakidila ne: “Tuakadi kusua bua Yobo atetshibue tô ne ku ndekelu, bualu bua wakuitaba bu mudi bantu babi bitaba.” (Yobo 34:10, 11, 35, 36) Bia muomumue, ditabuja dietu ne muoyo mutoke wetu bidi mua kujadikibua anu ‘bituatetshibua too ne ku ndekelu’ mu mushindu kampanda. Kadi, Tatu wetu wa dinanga wa mu diulu kakutulekela bua tuetu kutetshibua kupita patudi mua kuakama.​—1 Kolinto 10:13, NW.

11. Ntshinyi tshitudi ne bua kuvuluka patuatamba kutetshibua?

¹¹ Mu ditungunuka diende, Elihu wakaleja kabidi se: Yobo wakatamba kunekesha mu dizangika buakane buende nkayende. Ntema ivua ne bua kushindamena pa Mutuenji Munene. (Yobo 35:2, 6, 10) Nzambi “kena usungila mioyo ya bantu babi, ne udi uha badi mu dikenga malu makane a bobo kuangata,” ke muakamba Elihu. (Yobo 36:6) Muntu nansha umue kêna mua kudiombola ngenzelu ya Yehowa ne kuamba ne: kêna muakane. Mmutambe bunene mu mushindu utudi katuyi mua kumanya, ne bidimu biende kabiena bubadi. (Yobo 36:22-26) Patudi tutamba kutetshibua, tuvuluka se: Nzambi wetu wa tshiendelele udi muakane ne neatufute bua midimu yetu ya lulamatu idi imusamuna.

12. Ntshinyi tshidi mêyi a Elihu a nkomenu aleja pa bidi bitangila dilumbuluisha dia Nzambi pa bantu babi?

¹² Pavua Elihu wakula, tshipepele tshikole tshivua tshienda tshipupa. Bu muvuatshi tshienda tshisemena pabuipi, mutshima wende wakatuadija kukanka ne kuzakala. Wakakula bua malu manene avua Yehowa muenze ne wakamba ne: “Unvua dî edi, Yobo; imana biebe talalâ, elangana meji a midimu ya kukema idi Nzambi wenza.” Anu bu Yobo, tudi ne bua kutamba kuangata ne mushinga midimu ya Nzambi idi ikemesha ne buneme buende bukuate buôwa. “Katuena bamanye mua kujingulula malu onso a Wa Bukole Buonso,” ke muakamba Elihu. “[Udi muena bukole buvule, kakupepeja dilonda mikenji ne buakane buvule to. Bua bualu ebu bantu badi bamutshina, NW].” (Yobo 37:1, 14, 23, 24) Mêyi a Elihu a nkomenu adi atuvuluija se: pakumbaja Nzambi mu katupa kîpi emu dilumbuluisha diende pa bantu babi, kakupepeja dilonda mikenji ne buakane biende ne neakube aba badi bamutshina bu mudi bamutendeledi bende badi bamunemeka. Ndia muabi kayipu ditudi nadi bua kusanganyibua munkatshi mua balami ba muoyo mutoke ba mushindu’eu badi bangata Yehowa bu Mukokeshi Munene ukena mikalu! Unanukila anu bu muakenza Yobo, ne kulekedi Diabolo bua kukumbushaye pa muaba webe mubenesha munkatshi mua misumba eyi ya disanka idi midisangishe.

Yehowa udi wandamuna Yobo

13, 14. (a) Mbua bualu kayi buakatuadija Yehowa kuela Yobo nkonko? (b) Mmalu kayi atudi mua kulongela ku nkonko mikuabo ivua Nzambi muele Yobo?

¹³ Mmushindu kayipu uvua Yobo ne bua kukema pavua Yehowa uyukidilangana nende mu tshipepele tshikole! Tshipepele atshi tshivua tshienzedi tshia Nzambi, tshishilangana ne tshipepele tshikole tshiakatumika natshi Satana bua kuupula nzubu ne kushipa bana ba Yobo. Yobo kavua ne tshivuaye mua kuamba pavua Nzambi umuebeja ne: “Wewe wakadi kunyi hanakajadika bishimikidi bia buloba? . . . Wakaladika dibue dia ku ditumba mu muaba wadi nganyi, hakimba mitoto ya nkesha misambu diatshimue, ne hakela bana ba balume bonso ba Nzambi mbila yabo bua disanka diabo?” (Yobo 38:4, 6, 7) Yehowa wakalondakaja Yobo ne nkonko pa malu adi atangila mbuu, tshivualu tshiayi tshia divuba, kabundubundu, biibi bia lufu, butoke ne mîdima, ne bidimina nzaji (bisumbu bia mitoto). Yobo kavua ne tshivuaye mua kuamba pa kamuebejabu ne: “Wewe udi mumanye mikenji idi Nzambi welela bintu bia mu diulu, anyi?”​—Yobo 38:33.

¹⁴ Nkonko mikuabo yakaleja se: kumpala kua muntu kayi muanji kufukibua ne mupeshibua bukenji pa mishipa, nyunyu, nyama, ne bintu bitu bilandala, Nzambi uvua ubitabalela​—kakuyi diambuluisha kayi dionso anyi meji a bantu. Nkonko mikuabo ya Yehowa ivua itela bifukibua bu mudi mbowa, nyunyu ya otrishe, ne tubalu. Bakebeja Yobo ne: “Nyunyu wa mukanku udi ubanda mulu, udi wibaka disua diandi kulu bua mukenji webe, anyi?” (Yobo 39:27) Bushuwa, kabiena nanku to! Anjibi kufuanyikija ngandamuinu wa Yobo pakamuebeja Nzambi ne: “Muntu udi udiula mei andi neasue kubambakasha mei ne Wa Bukole Buonso, anyi?” Kabiena bikemesha pakamba Yobo ne: “Mona, ndi muntu muhuekele; nenkukudimune wewe dî kai? Ndi nteka tshianza tshianyi ku mishiku yanyi.” (Yobo 40:2, 4) Bu mudi Yehowa misangu yonso muakane, bituatetshibua bua kudiabakena pa bidi bimutangila, tudi ne bua ‘kuteka tshianza tshietu ku mishiku yetu.’ Nkonko ya Nzambi yakatumbisha kabidi dikala ku mutu kua bionso diende, buneme ne bukole biende bu mudibi bilejibua mu bufuki.

Behemote ne Leviatan

15. Behemote udi pa tshibidilu wangatshibua bu nyama kayi, ne ntshinyi tshidi imue ya ku ngikadilu yende?

¹⁵ Pashishe Yehowa e kutela Behemote, nyama utu pa tshibidilu wangatshibua bu nguvu. (Yobo 40:15-24) Nyama eu munenanenayi, wa bujitu buvule ne wa tshiseba tshijoboke; utu udia bisosa ne ‘bisuku bibishi.’ Mpokolo ya bukole buende ne makanda ende bidi mu tshikundukundu tshiende ne mu mifùngù (misunyi) yende ya difu. Mifuba ya bibelu biende idi ne bukole bu bua [milonda ya] “tshiamu tshia mitaku.” Behemote katu utshina muenji mukole wa mâyi, kadi utu wuowela kakuyi lutatu pa kubanda ne musulu.

16. (a) Diumvuija dia Leviatan didi dikumbanyina tshifukibua kayi, ne ng’amue malu kayi adi amutangila? (b) Bukole bua Behemote ne Leviatan budi mua kutumanyisha tshinyi pa bidi bitangila dikumbaja majitu matuomekela mu mudimu wa Yehowa?

¹⁶ Nzambi e kuebeja kabidi Yobo ne: “Udi mumanye mua kuhatula [Leviatan, mu mâyi ne ndobo, NW] anyi? Udi mumanye mua kushindika ludimi luandi ne muonshi, anyi?” Mushindu udibo bumvuija Leviatan udi uleja se: nngandu. (Yobo 41:1-34) Kêna mua kutua ndondo wa ditalala ne muntu kayi yonso nansha, ne kakuena muntu wa meji udi mua kusonsola nyama eu utu udikoka ne tshimbambila tshionso. Mikete kayitu imunyemesha, ne “udi useka tshiona tshia kabenda hamuelaboku.” Tshiji tshikole tshia Leviatan tshitu tshisabisha mâyi muondoke bu nyingu wa mafuta [peku]. Muanda wa se: Leviatan ne Behemote ivua ne bukole buvule kupita Yobo wakamuambuluisha bua kudipuekeshaye. Tuetu petu, tudi ne bua kumanya ne budipuekeshi buonso se: pa nkayetu katuena ne bukole to. Kadi tudi tukengela meji ne makanda bia kudi Nzambi bua kuepuka mênu a lulengu a Satana, Nyoka, ne kukumbaja midimu yetu mituomekela mu mudimu wa Yehowa.​—Filipoi 4:13; Buakabuluibua 12:9.

17. (a) Yobo “wakamona Nzambi” mu ngumvuilu kayi? (b) Ntshinyi tshiakalejibua ku nkonko ivua Yobo kayi mua kuandamuna, ne mmunyi mudibi mua kutuambuluisha?

¹⁷ Mupuekeshibue nkong, Yobo wakajingulula mmuenenu wende mubi ne kuitaba se: uvua muakule kakuyi dimanya. Kadi, wakaleja ditabuja pa kuamba ne: uvua ne bua ‘kumona Nzambi.’ (Yobo 19:25-27) Mmunyi muvuabi mua kuenzeka, bu mudi muntu nansha umue kayi mua kumona Nzambi ne kushala ne muoyo? (Ekesode 33:20) Bushuwa menemene, Yobo wakamona mushindu utu bukole bua Nzambi, kuteleja mêyi a Nzambi, ne mêsu ende a busunguluji akunzuludibua bua kumona bulelela pa bidi bitangila Yehowa. Bua bualu ebu, Yobo ‘wakadipiisha ne wakasomba mu lupuishi ne mu butu.’ (Yobo 42:1-6) Nkonko mivule ivuaye kayi mua kuandamuna yakajadika dikala dia Nzambi ku mutu kua bionso ne yakaleja bukese bua muntu, nansha eu udi mudifile kudi Yehowa anu bu muvua Yobo mudifile. Malu aa adi atuambuluisha bua kumona se: bipatshila bietu kabiena ne bua kuzangikibua kupita ditumbisha dîna dia Yehowa ne dibingisha bumfumu buende bukena mikalu ku mutu kua bionso. (Matayo 6:9, 10) Muanda wetu wa kumpala utudi ne bua kuditatshishila nkulama muoyo mutoke kudi Yehowa ne kutumbisha dîna diende.

18. Ntshinyi tshivua basambi ba Yobo ba dishima ne bua kuenza?

¹⁸ Netuambe tshinyi bua basambi ba dishima bavua badiamba nkayabu muvuabo bakane? Mu buakane buonso, Yehowa uvua mua kushipa Elifaze, Bildade, ne Zofare bualu kabavua bakule malu malelela adi amutangila, anu bu muakakula Yobo. “Nunku nudiangatshile balume ba ngombe muanda mutekete ne bimpanga muanda mutekete, nuye n’abi kudi muntu wanyi Yobo,” ke muakamba Nzambi, “nubifile bu milambu ya kuosha bua bualu buenu; ne muntu wanyi Yobo neanulombele Nzambi.” Balunda basatu aba bavua ne bua kudipuekesha pa kutumikila. Yobo mulami wa muoyo mutoke uvua ne bua kubalombela, ne Yehowa wakanyisha disambila diende. (Yobo 42:7-9) Kadi, ntshinyi tshitudi mua kuamba bua mukaji wa Yobo, wakamubela bua kutshipa Nzambi ne kufua? Biakamueneka se: bakalengeja nende mianda ku diambuluisha dia dilekelelangana bilema dia Yehowa.

Mafutu malaya adi atupetesha ditekemena

19. Pa bidi bitangila Yobo, mmunyi muakaleja Yehowa kabukulu kende ku mutu kua Diabolo?

¹⁹ Katupa kîpi kunyima kua Yobo mumane kupatuka mu makenga ende ne mupetulule makanda mu mudimu wa Nzambi, Yehowa wakamushintuluila mianda. Kunyima kua Yobo mumane kulombela balunda basatu abu, Nzambi ‘wakakudimuna nsombelu wa Yobo’ ne kumuvudijila ‘bintu bionso bivuaye nabi diambedi misangu ibidi.’ Yehowa wakaleja mudiye ku mutu kua Diabolo pa kukandika tshianza tshisamishanganyi tshia Satana ne kuondopa Yobo mu tshishima. Nzambi wakipata biluilu bia ba-demon ne kubakandamena pa kunyungulula Yobo ne biluilu Biende bia banjelu.​—Yobo 42:10; Musambu wa 34:7.

20. Mmu mishindu kayi muakafutshibua ne muakabeneshibua Yobo kudi Yehowa?

²⁰ Bana babu ba balume, ba bakaji ne bamanyangana nabu ba Yobo bakatungunuka ne kudia pamue nende, kusankidilangana nende, ne kumukankamija bua tshipupu tshivua Yehowa mulekelelele bua kumuvuilatshi. Yonso wa kudibo wakapa Yobo mfranga ne kakanu ka ku munu ka ngolo. Yehowa wakabenesha ndekelu wa Yobo kupita ne ntuadijilu wende, e kupetaye mikoko 14 000, tumelo 6 000, ngombe 1 000, ne mashina a tubalu 1 000. Yobo wakafika kabidi ku dipeta bana ba balume muanda-mutekete ne ba bakaji basatu, bungi bua muomumue ne bavuaye nabu bangabanga. Bana bende ba bakaji​—Jemima, Keziya, ne Keren-happuch—​bavua balengele kupita bakaji buonso ba mu ditunga, ne Yobo wakabapesha bumpianyi munkatshi mua bana babo ba balume. (Yobo 42:11-15) Yobo wakashala kabidi ne muoyo munkatshi mua bidimu bikuabo 140 ne wakamona bipungu binayi bia ndelanganyi yende. Muyuki udi ukomesha ne: “Nunku Yobo wakafua, muntu mununu, matuku andi mûle tente ne disanka.” (Yobo 42:16, 17) Divula dia bungi bua matuku a muoyo wende divua tshishima tshia Yehowa Nzambi.

21. Mmunyi mutudi bambuluishibue kudi muyuki wa mu Mifundu udi wakula bua Yobo, ne ntshinyi tshitudi ne bua kupangadija bua kuenza?

²¹ Muyuki wa mu Mifundu udi wakula bua Yobo udi utamba kutudimuija bua mateyi a Satana ne utuambuluisha bua kumona mudi bukokeshi bukena mikalu ku mutu kua bionso busuikakaja ku muoyo mutoke. Anu bu Yobo, muntu yonso udi munanga Nzambi neatetshibue. Kadi tudi mua kunanukila anu bu muakenza Yobo. Wakatundubuka mu matetshibua ende ne ditabuja ne ditekemena, ne mafutu ende avua mavule. Bu mutudi basadidi ba Yehowa lelu’eu, tudi ne ditabuja dilelela ne ditekemena. Ne nditekemena kayipu bunene didi Mufutshianganyi Munene muteke kumpala kua yonso wa kutudi! Kulama mu tshieledi tshia lungenyi difutu dia kuya mu diulu nekuambuluishe bela manyi bua kusadila Nzambi pa kulonda mikenji mu matuku abo a muoyo atshidi mashala pa buloba. Bavule badi ne ditekemena dia kuikala ne muoyo pa buloba kabakumona lufu, kadi aba bafua nebafutshibue ne dibiishibua ku lufu mu Mparadizu pa buloba, pamue ne Yobo muine. Ne ditekemena dilelela dia mushindu’eu mu mutshima ne mu lungenyi, buonso badi banange Nzambi bajadikà mudi Satana mushimianganyi ne bimane tendee ku luseke lua Yehowa bu balami ba muoyo mutoke ne bu babingishi badifile ba bukokeshi buende bukena mikalu ku mutu kua bionso.

Mmunyi muwandamuna?

◻ Ng’amue malu kayi akaditatshisha Yobo bua kuamba mu diandamuna diende dia ndekelu kudi bamusambi bende ba dishima?

◻ Mmunyi muakadileja Elihu bu ntemu wa Yehowa ukena kansungansunga?

◻ Ng’imue nkonko kayi yakelabo Yobo kudi Yehowa, ne mbuenzeji kayi budiyi nayi?

◻ Mmunyi muudi mubabidile muyuki wa mu Mifundu udi wakula bua Yobo?

[Bimfuanyi mu dibeji 18]

Mêyi a Yehowa pa bidi bitangila Behemote ne Leviatan akambuluisha bua kupuekesha Yobo