Bantemu ba Yehowa pa buloba bujima: Brésil

BRÉSIL nditunga dinenanenayi mu mishindu mivule. Ku bunene ne ku bungi bua bantu, nditunga ditanu ku matunga matambe kualabala a pa buloba. Ndiangate pamue ne tshia bibidi tshia buloba bua Amerike wa ku Sud ne mmuaba udi bantu ba bungi kupita matunga makuabo wonso a mu tshitupa tshia buloba etshi masanga. Brésil udi kabidi ne dîtu dikutakane dia kamana nsombi bua buloba bujima. Munkatshi mua dîtu edi ke mudi mupueka musulu mutambe yonso ya pa buloba bujima ku tshivuma​—Amazone.

Brésil udi kabidi munenanenayi mu ngumvuilu mukuabu. Bungi bua bamanyishi bende ba lumu luimpe lua Bukalenge bua Nzambi budi bantu bu 400 000, ne tshidimu tshishale bantu bapite pa 1 000 000 bavua babuela mu Tshivulukilu tshia lufu lua Kristo. Nunku, ditunga edi ndisunguluke pa kutangila mudimu wa dimanyisha Bukalenge. Malu adi menzeke matuku mashale aa adi umvuija bualu ebu.

Kusadila mu muaba udi dikengela dipite bunene

Antonio ne mukajende bakangata dipangadika dikole dia kushiya balela babo ne mudimu wa kueyemena uvua ufuta bimpe mu São Paulo bua kusadila mu muaba uvua dikengela dipite bunene dia bamanyishi ba Bukalenge mu ditunga dia Minas Gerais. Teritware wabu uvua usangisha nkolonyi wa bena mudimu ku ditanda kampanda dia dienza nsukadi. Dituku dia kumpala diakayabu kumanyisha ku muab’eu, bakatuadija malonga a Bible tshitema. Mu ngondo 18, bakavua balombola malonga mapite pa 40!

Kumpala, bisangilu bivua bienzeka amu mu ditanda edi. Kadi, bamanyishi bapiabapia bavua basue kumona Nzubu wa Bukalenge wa bushuwa. Nunku, bakafutshila mashinyi bua kushiya bantu 75 ku tshisumbu tshia pabuipi menemene. Pashishe, kuakenzeka mpuilu; bantu 45 ba ku balongi bapiabapia ba Bible bakabuelamu ne bakabela nkonko. Bantu 15 ba kudibo bakatambushibua musangu au. Bushuwa, binsonji bia disanka biakadipuekela!

Bakatumika ne kumpanyi wa mashinyi umue umue eu bua ngendu ya muomumue, ne bamfumu bakateka mishinga ya njila mipuekele. Bua dianyisha, Antonio wakapesha muena kumpanyi eu mukanda udi wambuluisha bua dilonga dia Bible. Wakitaba bua kutuadija dilonga Bible amu dilolo adi ne wakatambushibua kunyima kua ngondo mikese ya dilonga ne muoyo umue. Kumpala, mukajende wakatuila dilonga nkanana, kadi kunyima, mmuenenu wende wakatuyika. Lelu’eu yeye pende udi Ntemu wa Yehowa mutambule.

Mu Luishi 1992, tshisumbu tshimue tshia bamanyishi 22 ba mitalu tshiakenjibua. Mu 1994, bungi ebu bukavua bubande bufike ku 42, ne bampanda-njila ba pa tshibidilu 4, peshi bamanyishi ba lumu luimpe ba ku dîba ne ku dîba. Bu tshipeta, Antonio wakakoma se: “Mukajanyi ne meme tudi bamone se: tuetu ‘batete Yehowa,’ bu mudi Malaki 3:10 (NW) wamba, ‘neatuitshikijile dibenesha too ne muikala dikengela dia bintu kaditshiyiku kabidi.’”

Diabanya mikanda idi yumvuija Bible

Pamu’apa kakuabu kabingila kadi mudimu wa buambi ulubulukila ne biidia binene mu Brésil kadi ka se: Bantemu badi babanya mikanda idi yumvuija Bible misangu yonso. Tshilejilu, tshisumbu kampanda tshiakafundila filiale wa Société Watch Tower tshilomba mikanda 250 ya Les jeunes s’interrogent​—Réponses pratiques. Bua tshinyi dilomba dia bungi nunku?

Mukanda uvua umvuija ne: ‘Tshilongelu tshimue tshia mu tshimenga ntshiangate dipangadika dia kutumika ne mukanda eu bu tshintu tshia kulongesha natshi mu kamue ka ku tulasa. Dipangadika dia baludiki ba tshilongelu ndienjibue ku bumanyishi bua mu mpukapuka buenza kudi baledi ba balongi bàdì Bantemu ba Yehowa ne kudi umue wa ku baludiki ba tshilongelu. Yehowa atungunuke ne kubenesha basadidi bende padibu bapetesha dilongesha dimpe ne mukanda eu.’ Eyowa, Yehowa atungunuke ne kubenesha didiunda dimpe dia mudimu wa bumanyishi bua Bukalenge mu ditunga edi dinene dia Brésil.

[Kazubu mu dibeji 8]

NSOMBELU WA DITUNGA

Tshidimu tshia mudimu 1994

BUNGI BUBANDILE BUA BAMANYISHI: 385 099

MUAYENE: Ntemu 1 bua bantu 404

BAKABUELA MU TSHIVULUKILU: 1 018 210

MUAYENE WA BAMPANDA-NJILA: 38 348

MUAYENE WA MALONGA A BIBLE: 461 343

BUNGI BUA BATAMBULE: 24 634

BUNGI BUA BISUMBU: 5 928

BIRO BIA FILIALE: CESÁRIO LANGE

[Tshimfuanyi mu dibeji 9]

Mashinyi a tshisanji matumika nawu mu São Paulo mu bidimu bia 1940

[Tshimfuanyi mu dibeji 9]

Bumanyishi mu Budimi bua Bukua-mitshi mu Rio de Janeiro

[Tshimfuanyi mu dibeji 9]

Biro bia filiale ku Cesário Lange