Butoke buabu kabuakajima

MU BIKONDO bifundilebu Bible kuvua Bantemu bena lulamatu ba Yehowa bakamona mabika ne mala. Bakakama buluishi ne tshivua tshimueneka bu mapangila. Nansha nanku, kabakapuekesha maboko bua dishikila mioyo. Bushuwa, butoke buabu kabuakajima.

Tshilejilu, muprofete Yelemiya wakapeshibua mudimu kampanda bua kuikala muprofete wa Nzambi bua ditunga ditontolodi dia Yuda. Wakamanyisha didimuija pa bidi bitangila kabutu ka Yeruzaleme kavua ne bua kulua. (Yelemiya 1:11-19) Bu tshipeta, Yelemiya wakapeta misangu mivule buluishi kudi bena ditunga nende, bavua bamuangata bu mumanyishi wa biyole.

Muakuidi Pashhur, mfumu mulombodi wa midimu ya mu nzubu wa Nzambi, wakatuta umue musangu Yelemiya bua mulayi wakafilaye ne kumuelesha mu bikunyi. Ne ebi biakamueneka bu dimona mala, Yelemiya wakamba ne: “Bantu badi banseka matuku onso, bonso badi bangela nsenda. Misangu yonso indi ne bua kuakula, ndi ngela mbila, ngambila bantu ne: ‘Nebanukengeshe, nebanubutule!’ Pandi mbambila miaku ya [Yehowa, NW], badi bampenda, banseka matuku onso.” Muprofete wakateketa mu maboko kufikaye too ne ku diamba ne: “Tshiena mvuluka kabidi [Yehowa, NW] to, tshiena ngakula kabidi mu Dina diende to.”​—Yirmeya 20:1, 2, 7-9, MMM.

Kadi, Yelemiya kakatshimunyibua kudi diteketa mu maboko. Pa kuakula bua ‘dîyi dia Yehowa,’ wakamba ne: ‘Didi mu mutshima wanyi bu kapia kadi kosha munda mua mifuba yanyi; kudikanda kudi kuntonda, ne tshiena mua kupuwa.’ (Yelemiya 20:8, 9) Musakibue bikole bua kumanyisha malumbuluisha a Nzambi, Yelemiya wakakankamijibua kudi spiritu munsantu ne wakakumbaja mudimu wende.

Mupostolo Paulo uvua pende ne tubingila tuvule bua kuteketa mu maboko, bu yeye mua kutushiila muaba. Wakananukila bipupu bia ku bintu bifuka, didiina dia mazuwa mu mâyi, dikengeshibua, ne mikumu. Kupita apu, ‘tshivua tshimutatshisha ku dituku ne ku dituku tshivua disumpakana bua bisumbu bionso.’ (2 Kolinto 11:23-28, NW) Eyowa, Paulo uvua ku dituku dionso ne bua kuakama ntatu, pa kueleela meji pa bidi bitangila bisumbu bipiabipia bivuaye muambuluishe bua kuashibua. Ne kabidi, uvua mupange bupuangane ne uvua ne bua kuluangana ne “tshintu bu dieba mu mubidi,” bumue lumonu lukese. (2 Kolinto 12:7; Lomo 7:15; Galatia 4:15) Bamue bavua bafika too ne ku diakula bibi panyima pa Paulo, ne bionso ebi bivua bifika ku matshi ende.​—2 Kolinto 10:10.

Nansha nanku, Paulo kakalekela diteketa mu maboko bua kumupitadi dikanda. Tòo, kavua muntu wa bukole bua pa buabu nansha. (2 Kolinto 11:29, 30) Ntshinyi tshiakatungunuja ‘kapia kende ka munda’ bua kutema? Tshia kumpala, uvua ne binende bamukuatshishi, bamue bakaya nende too ne ku Roma muaba wakedibuaye mu nzubu wa lukanu. (Bienzedi 28:14-16) Tshibidi, mupostolo eu uvua wangata nsombelu wende ne nkatshinkatshi. Bamukengeshi ne baluishi bende ke bavua bapiile, ki m’Paulo nansha. Pabuipi ne ndekelu wa muoyo wende panu, wakatshinka mushinga wa mudimu wende mu mushindu muimpe ne wakamba ne: “Nkunshadile amu bua kupeta tshifulu tshia buakane, tshidi Mukalenge, nzuji muakane, ne bua kumpesha bu difutu mu dituku adi.”​—2 Timote 4:8, NW.

Kupita bionso, Paulo uvua pa tshibidilu usemena kudi Yehowa Nzambi mu masambila, ne ‘Mukalenge uvua muimane pabuipi nende ne wakamukolesha.’ (2 Timote 4:17) “Ndi ne bukole mu malu wonso,” ke muakamba Paulo, “ku diambuluisha dia eu udi umpesha bukole.” (Filipoi 4:13, NW) Diumvuangana ne Nzambi ne bena nkristo nende, pamue ne ditshinka biakane mushinga wa mudimu wende, biakambuluisha Paulo bua kutungunuka mu mudimu wa Yehowa.

Nzambi wakafundishisha Paulo ku spiritu ne: “Katupungidi ne dienza dia malu mempe, bualu pakumbana diba, netuvue kunowa patuikala katuyi batekete.” (Bena Ngalata 6:7-9, MMM) Kunowa tshinyi? Muoyo wa kashidi. Nunku, bua bualu ebu, ikala bu Yelemiya, Paulo, ne bantemu bakuabu bavule ba Yehowa ba lulamatu badi batedibue mu Mifundu. Eyowa, ikala anu bu buobu, ne kutshimunyibu kudi diteketa mu maboko. Kusu bua butoke buebe bujime.​—Fuanyikija ne Matayo 5:14-16.

[Bimfuanyi mu dibeji 25]

Paulo ne Yelemiya kabakajimija butoke buabu